އިސްރާއީލް އިން ޣައްޒާގައި 95 މީހަކު ޝަހީދު ކޮށްލައިފި
ޣައްޒާގައި އިސްރާއީލް އިން ދެމުން އަންނަ ހަމަލާތައް އިތުރު ކޮށްފައިވާ މި ދަނޑިވަޅަކީ، ހަނގުރާމަ ހުއްޓާލުމަށް އެމެރިކާގެ ރައީސް ޑޮނަލްޑް ޓްރަމްޕް ގޮވާލައްވާފައި ވަނިކޮށް.
އިސްރާއީލް އިން ދިން ހަމަލާގައި ގެއްލުން ވެފައިވާ ސަރަހައްދެއް
އިސްރާއީލް އިން ޣައްޒާގައި ހިންގަމުން އަންނަ ހަނގުރާމައިގައި ހަމަލާތައް ވަރުގަދަ ކޮށްފައިވާއިރު، ޣައްޒާ އިން އިތުރު 95 މީހަކު ޝަހީދު ކޮށްލައިފި އެވެ.
އިސްރާއީލް އިން ވަނީ ޣައްޒާގެ ކެފޭ ތަކާއި، ސްކޫލުތަކާއި އަދި އިންސާނީ އެހީ އަށް ބޭނުންވާ ކާބޯ ތަކެތި ބެހުމުގެ މަސައްކަތް ކުރަމުން އަންނަ މަރުކަޒުތަކަށް ވެސް ހަމަލާ ދީފަ އެވެ.
ހޯމަ ދުވަހު އިސްރާއީލް އިން ދިން ހަމަލާތަކުގައި ޣައްޒާ ސިޓީ އާއި އުތުތު ސަރަހައްދުގައި ވަނީ 62 މީހަކު ޝަހީދު ކޮށްލައިފަ އެވެ. އޭގެ ތެރޭގައި އަލް ބަޤާ ނަމަކަށް ކިޔާ ކެފޭ އަކަށް ދިން ހަމަލާގައި ޝަހީދުވީ މީހުން ވެސް ހިމެނެ އެވެ. އިސްރާއީލް އިން ދިން މި ހަމަލާގައި ނޫސްވެރިޔެއްގެ ގޮތުގައި މަސައްކަތް ކުރަމުން އައި އިސްމާއީލް އަބޫ ހަތަބް ވެސް ވަނީ ޝަހީދު ކޮށްލައިފަ އެވެ. މީގެ އިތުރުން އަންހެނުންނާއި ކުޑަ ކުދިން ވެސް ވަނީ ޝަހީދު ކޮށްލައިފަ އެވެ.
އިސްރާއީލް އިން ވަނީ ޒައިތޫން ސަރަހައްދުގައި އިންސާނީ އެހީ ބެހުމުގެ މަސައްކަތް ކުރަމުން އައި މަރުކަޒަކަށް އަމާޒުކޮށް ވެސް ހަމަލާތަކެއް ދީފަ އެވެ. މީގެ އިތުރުން ހާލުގައި ޖެހިފައިވާ އެތައް ބަޔަކު ހިމާޔަތް ހޯދުމަށް ތިބި ޔަފާ ސްކޫލަށް އަމާޒުކޮށް ވެސް ވަނީ ހަމަލާ ދީފަ އެވެ.
މީގެ އިތުރުން އަލް އަޤްސާ ހޮސްޕިޓަލްގެ ގޯތި ތެރެއަށް ދިން ހަމަލާގައި އެތައް ބަޔަކަށް ވަނީ އަނިޔާވެފަ އެވެ. ހޮސްޕިޓަލްގައި ތިބި މީހުންނަށް އަމާޒުކޮށް ހަމަލާ ދީފައި ވަނީ އެއްވެސް އިންޒާރެއް ވެސް ދިނުމެއް ނެތި އެވެ. އެ ހަމަލާއާ ގުޅިގެން ޣައްޒާގެ މީޑިއާ އޮފީހުން ބުނެފައި ވަނީ، މިއީ ޣައްޒާގެ ޞިއްޙީ ނިޒާމަށް އަމާޒުކޮށްގެން ދެމުންް އަންނަ ސިސްޓަމެޓިކް ހަމަލާތަކެއް ކަމަށެވެ.
ޣައްޒާގައި އިސްރާއީލް އިން ދެމުން އަންނަ ހަމަލާތައް އިތުރު ކޮށްފައިވާ މި ދަނޑިވަޅަކީ، ހަނގުރާމަ ހުއްޓާލުމަށް އެމެރިކާގެ ރައީސް ޑޮނަލްޑް ޓްރަމްޕް ގޮވާލައްވާފައި ވަނިކޮށެވެ. އަދި ހަނގުރާމަ ހުއްޓާލުމަށް އެމެރިކާ އިން ވަނީ ހުށަހެޅުމެއް ވެސް ހުށަހަޅައިފަ އެވެ.
އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ ވިދާޅުވަމުން ގެންދަވަނީ، ފަލަސްޠީނުގެ މިނިވަން ކަމަށް މަސައްްކަތް ކުރަމުން އަންނަ ހަމާސް ޖަމާއަތް މުޅިން ބަލި ކުރެވެންދެން ހަނގުރާމަ ކުރިއަށް ގެންދާނެ ކަމަށެވެ. އިސްރާއީލްގެ ހަމަލާތައް އިތުރު ކޮށްފައިވާއިރު، ދާދި ފަހުން އިސްރާއީލްގެ ވަޒީރަކު ވަނީ ޣައްޒާގެ އިންސާނީ އެހީގެ ޕްރޮގްރާމް ހުއްޓާލަން ޖެހޭ ކަމަށް ވެސް ގޮވާލައްވައިފަ އެވެ.
