އިސްރާއީލްގެ ރަހީނުން މިނިވަން ކުރުމަށް އައު ފުރުސަތުތަކެއް ހުޅުވިއްޖެ ކަމަށް ނަތަންޔާހޫ ވިދާޅުވެއްޖެ

އިސްރާއީލް އިން ޣައްޒާގައި ހިންގަމުން އަންނަ ހަނގުރާމައިގެ ތެރޭގައި، ހަމާސް ޖަމާއަތުން ރަހީނު ކޮށްފައިވާ އިސްރާއީލްގެ ރައްޔިތުން މިނިވަން ކުރުމުގެ އައު ފުރުސަތުތަކެއް ހުޅުވިއްޖެ ކަމަށް، އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ ވިދާޅުވެއްޖެ އެވެ.

އިސްރާއީލްގެ އަސްކަރިއްޔާގެ އޮފިސަރުންނާ މުޚާތަބު ކުރައްވައި ވާހަކަ ދައްކަވަމުން ނަތަންޔާހޫ ވިދާޅުވީ، 12 ދުވަހުގެ މުއްދަތަކަށް އީރާނާ ދެކޮޅަށް ކުރިއަށް ގެންދިޔަ ހަނގުރާމައިގެ ސަބަބުން އިސްރާއީލަށް ކާމިޔާބީތަކެއް ލިބިފައިވާ ކަމަށެވެ. އަދި އެ ކާމިޔާބީތަކާ އެކު، ހަމާސް އިން ރަހީނުކޮށްފައިވާ އިސްރާއީލްގެ ރައްޔިތުން މިނިވަން ކުރުމަށް އައު ފުރުސަތުތަކެއް ހުޅުވިފައިވާ ކަމަށް ވެސް ނަތަންޔާހޫ ވިދާޅުވި އެވެ.

އިތުރަށް ނަތަންޔާހޫ ވިދާޅުވީ އިސްރާއީލް އިން ކުރިއަށް ގެންދަމުން އަންނަ އޮޕަރޭޝަންގެ މަގުސަދަކީ ހަމާސް ޖަމާއަތް ބަލި ކުރުން ކަމަށެވެ. އަދި އެ ހަނގުރާމައިގައި ހަމާސް ޖަމާއަތް މުޅި ބަލި ކުރެވުމާ އެކު، ރަހީނުން މިނިވަންކޮށް، ސަލާމަތް ކުރުމުގެ މަސައްކަތް ވެސް ކުރިއަށް ދާނެ ކަމަށް ނަތަންޔާހޫ ވިދާޅުވެފައިވެ އެވެ. 

ނަތަންޔާހޫގެ މި ވާހަކަތަކާ ގުޅިގެން ރަހީނުންގެ ގޮތުގައި ތިބި މީހުންގެ އާއިލާތައް ތަމްސީލު ކުރަމުން އަންނަ ޖަމިއްޔާ އިން ވަނީ އެކަމަށް މަރުޙަބާ ކިޔައިފަ އެވެ. އެގޮތުން މިހާތަނަށް 20 މަސް ދުވަސް ވަންދެން ރަހީނު ކޮށްފައިވާ ރައްޔިތުން މިނިވަން ކުރުމަށް ނަތަންޔާހޫގެ ސަރުކާރުން ކުރަމުން އަންނަ މަސައްކަތާއި، އެކަމަށް ދެމުން އަންނަ އަހަންމިޔައްތުކަން ފާހަގަ ކުރާ ކަމަށް ވެސް ވަނީ ބުނެފަ އެވެ. 

ހޮސްޓޭޖަސްް އެންޑް މިސިން ފެމިލީސް ފޯރަމް އިން ބުނެފައި ވަނީ، ބޮޑު ވަޒީރު ނަތަންޔާހޫގެ އެ ވާހަކަ ތަކަކީ ހަމާސް އިން ރަހީނު ކޮށްފައިވާ 50 ރަހީނުން މިނިވަން ކުރުމުގެ އެއްބަސްވުމަކަށް އާދެވެނޭ ކަމުގެ އުންމީދު އޮތް ވާހަކަތަކެއް ކަމަށެވެ. 

އިސްރާއީލް އިން ޣައްޒާގައި ހިންގަމުން އަންނަ ހަނގުރާމައިގެ ތެރޭގައި، އިސްރާއީލްގެ 251 މީހަކު ވަނީ ރަހީނު ކޮށްފަ އެވެ. އޭގެ ތެރެއިން 50 މީހުން އަދިވެސް ރަހީނުންގެ ގޮތުގައި ތިބި ކަމަށް ބެލެވެ އެވެ. އިސްރާއީލްގެ އަސްކަރިއްޔާ އިން ބުނެފައި ވަނީ ރަހީނު ކޮށްފައިވާ މީހުންގެ ތެރެއިން 27 މީހަކު މަރުވެފައިވާ ކަމަށެވެ.