މީޑިއާ ކޮންޓްރޯލް ކުރާ ބިލާއި ގުޅިގެން އެކިކަހަލަ އިންޒާރު ލިބޭ ނޫސްވެރިންނަށް ރައްކާތެރިކަން ކަށަވަރު ކޮށްދިނުމުގެ ގޮތުން މިނިވަން މުއައްސަސާގެ ކޮމެޓީގެ ފަރާތުން ފުލުހަށް ހުށަހަޅަން ނިންމައިފި އެވެ.

ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން ހޯމަ ދުވަހު ނޫސްވެރިންނާ އެކު ބެއްވި ބައްދަލުވުމުގައި، ނޫސްވެރިންނަށް ލިބެމުންދާ އެކިކަހަލަ އިންޒާރު ތަކާއި ގުޅިގެން އެ ނޫސްވެރިންނަށް ރައްކާތެރިކަން ކަށަވަރު ކޮށްދިނުމަށް ފުލުހަށް ހުށަހަޅަން މިނިވަން މުއައްސަސާތަކުގެ ކޮމެޓި އަށް ހުށަހެޅީ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް އެވެ. މީކާއިލް ގެ ހުށަހެޅުމަށް ކޮމެޓިގެ ހުރިހާ މެންބަރުންވަނީ ތާއީދު ކުރައްވާފަ އެވެ.

މީކާއިލް ގެ ހުށަހެޅުމަށް ތާއީދު ކުރައްވާ ކެލާ ދައިރާގެ މެންބަރު އިބްރާހިމް ޝަރީފް ވިދާޅުވީ، އެ ހުށަހެޅުމަށް ތާއީދު ކުރާ ކަމަށެވެ. އަދި ހުރިހާ ނޫސްވެރިންވެސް އެ ކޮމެޓީއަށް ލިޔުމުން އެކަން ހުށަހެޅުމުން އެކަން ބަލާނެ ކަމަށް ޝަރީފް ވިދާޅުވި އެވެ.

އޭގެ އިތުރުން ރައްޔިތުންގެ މަޖިލީހަށް ހުށަހަޅާފައިވާ މީޑިއާ ކޮންޓްރޯލް ބިލުގައި ނޫސްވެރިންގެ ހިމާޔަތުގައި އެއްވެސް ކަމެއް ހިމަނާފައި ނެތް ކަމަށާއި އެ ބިލުގެ ސަބަބުން ނޫސްވެރިންނަށް އަދި ނޫސްވެރިކަމަށް އެއްވެސް ކުރިއެރުމެއް ނެތް ކަމަށް ނޫސްވެރިން ވަނީ ފާހަގަކޮށްފަ އެވެ.