ރައީސް ޑރ.މުހައްމަދު މުއިއްޒު ދިވެހިންނާއި އިންޑިއާގެ ކިބައިން މައާފަށް އެދެން ޖެހޭ ކަމަށް ރައްޔިތުންގެ މަޖިލީހުގެ ކެލާ ދާއިރާގެ ކުރީގެ މެމްބަރު އިބްރާހިމް ޝަރީފް ވިދާޅުވެއްޖެއެވެ.

ޝަރީފް އެފަދައިން ވިދާޅުވީ ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުންނެވެ. އޭނާ ވިދާޅުވީ ރާއްޖޭގެ ޚާރިޖީ ސިޔާސަތު އޮތީ ލަދުގަންނަން ޖެހޭ މިންވަަރަށް ބޮއްސުންލާފައި ކަމަށެވެ.

މި ސަރުކާރު ވެރިކަމަށް އައީ ވެސް އިންޑިއާ އަށް ވަރަށް ބޮޑަށް ފާޑުކިޔާ މަލާމާތް ކުރުމަށް ފަހުގައި ކަމަށާއި ވެރިކަމާއި ހަވާލުވުމަށް ފަހުގައި ވެސް ސަރުކާރުގެ އިސް ވެރިންގެ ފަރާތުން ފެނިގެން ދިޔައީ އެފަދަ ކަންކަން ކަމަށް އޭނާ ވިދާޅުވިއެވެ.

އެހެންނަމަވެސް މިހާރު އިންޑިއާ އާއި އެކުގައި އޮތް ގުޅުން ބަދަހިކުރަން ބޭނުން ވެގެން ރާއްޖޭގެ ސަރުކާރުން މަސައްކަތް ކުރާތަން ފެންނަ ކަމަށް އޭނާ ވިދާޅުވިއެވެ.

ސަރުކާރުން އިންޑިއާ އާއި އެކު ގުޅުން ބަދަހި ކުރަން މަސައްކަތް ކުރަނީ ސަރުކާރަށް ގޮތް ހުސްވުމުން ކަމަށް ވެސް އޭނާ ވިދާޅުވިއެވެ. އިންޑިއާ އާއި މެދު ރާއްޖޭގެ ވެރިން އަމަލު ކުރި ގޮތަކީ ލަދުވެތި ގޮތެއް ކަމަށް އޭނާ ވިދާޅުވިއެވެ.

އެގޮތުން ރާއްޖޭގެ ސަރުކާރުގެ އިސް މީހުން އިންޑިއާގެ ވެރިންނަށް ބަދު ބަސް ބުނުމުގެ ސަބަބުން ދެ ޤައުމުގެ ގުޅުމަށް ވަރަށް ބޮޑަށް އަސަރު ކުރި ކަމަށް އޭނާ ވިދާޅުވިއެވެ.

އޭނާ ވިދާޅުވީ އެކަމުގެ ގެއްލުން ދިވެހިންނަށް ލިބެމުންދާ ކަމަށެވެ. އަދި އިންޑިއާގެ ރައްޔިތުންގެ ހިތުގައި އެކަމުގެ ސަބަބުން ރާއްޖެ އާއި މެދު ނުރަނގަޅު ތަސައްވުރެއް އުފެދިގެން ދިޔަކަމަށް އޭނާ ވިދާޅުވިއެވެ.

ޝަރީފް ވަނީ އިންޑިއާ އާއި ރާއްޖެއާ ދެމެދު އޮތް ޒަމާންވީ ގުޅުމަށް އަސަރުކުރުމަކީ އެކަމުގެ އަސަރު ސީދާ ރައްޔިތުންނަށް ކުރާ ކަމެއްކަމަށް ވިދާޅުވެފައެވެ.

އިތުރަށް ވާހަކަދައްކަވަމުން ޝަރީފް ވިދާޅުވީ ރާއްޖެއިން ބޭރުގެ ޤައުމުތަކާއި އެކު ރަނގަޅު ގުޅުމެއް ބާއްވަން ނުކުޅެދިފައިވާ ކަމަށެވެ. ސަބަބަކީ މި ސަރުކާރުގެ ޚާރިޖީ ސިޔާސަތު ދޯހަޅިވުން ކަމަށް އޭނާ ވިދާޅުވިއެވެ.

އެގޮތުން ރާއްޖެ އަށް ޤައުމުތަކުން އެހީ ލިބުމަށް މަގުފަހިކުރުމަށް ސަރުކާރަށް ކާމިޔާބު މަސައްކަތްތަކެއް ކުރެވިފައި ނުވާ ކަމަށާއި އެއީ ސަރުކާރުގެ ޚާރިޖީ ސިޔާސަތުތަކާއި މެދު ސުވާލު އުފެދޭ އެއް ސަބަބު ކަމަށް އޭނާ ވަނީ ވިދާޅުވެފައެވެ.

ޝަރީފް ވަނީ މި ސަރުކާރަށް ވަރަށް ބޮޑަށް ފާޑު ވިދާޅުވެފައެވެ.