އިސްރާއީލް އިން ޣައްޒާގައި ހިންގަމުން އަންނަ ހަނގުރާމައިގައި ހޮނިހިރު ދުވަހުގެ ރޭ ދިން ހަމަލާތަކުގައި ހަތް މީހަކު ޝަހީދުވެފައިވާ ކަަމަށް ހާމަކޮށްފި އެވެ. 

ޣައްޒާގެ ދެކުނުގައި ޚާން ޔުނިސްގައި އިސްރާއީލް އިން ދިން ޑްރޯމް ހަމަލާއެއްގައި ފަސް މީހަކު ވަނީ ޝަހީދުވެފަ އެވެ. މި ހަމަލާގައި ޝަހީދުވީ މީހުންގެ ތެރޭގައި ދެ އަންހެނުންނާއި، އެއް ކުޑަ ކުއްޖަކު ހިމެނޭ ކަމަށް ވަނީ ބުނެފަ އެވެ. މިއީ ޓެންޓު ތަކުގައި ހިމާޔަތް ހޯދައިގެން އުޅެމުން އައި ބައެއް ކަމަށް ވެސް ބުނެފައިވެ އެވެ. 

އުުތުރު ޣައްޒާގެ ޒައިތޫން ސަރަހައްދުގައި ހުރި ގެއަކަށް އަމާޒުކޮށް އިސްރާއީލްގެ އަސްކަރިއްޔާ އިން ދިން ހަމަލާގައި ފަލަސްޠީނުގެ ދެ ކުޑަ ކުދިން ޝަހީދުވެފައިވާ ކަމަށް ވެސް ވަނީ ބުނެފަ އެވެ. އަލް ޖަޒީރާގެ ނޫސްވެރިން ރިޕޯޓު ކޮށްފައިވާ ގޮތުގައި ޣައްޒާގައި އިސްރާއީލްގެ އަސްކަރިއްޔާ އިން މެދު ކެނޑުމެއް ނެތި ހަމަލާތައް ދެމުން އަންނައިރު އާންމު ރައްޔިތުންނަށް ލިބެމުން އަންނަ ގެއްލުންތައް ދަނީ އިތުރު ވަމުންނެވެ.

މީގެ އިތުރުން، އިސްރާއީލްގެ އަސްކަރިއްޔާ އިން އަންނަނީ ޣައްޒާގެ އުތުރުގެ ބައެއް ސަރަހައްދު ތަކުން މީހުން ހުސް ކުރުމުގެ އިންޒާރު ވެސް ދެމުންނެވެ. ޣައްޒާގެ އުތުރުގައި ތިބި ފަލަސްޠީނުގެ މީހުން ވަގުތުން އެ ސަރަހައްދު ހުސް ކުރުމަށް އިސްރާއީލްގެ އަސްކަރިއްޔާ އިން އަންގާފައިވާއިރު، އަސްކަރީ އޮޕަރޭޝަން ކުރިއަށް ގެންދާ ކަމުގެ އިޝާރާތެއް ވެސް ދީފައިވާ ކަމަށް ރިޕޯޓު ކޮށްފައިވެ އެވެ. 

އެގޮތުން އިސްރާއީލްގެ އަސްކަރިއްޔާގެ ތަރުޖަމާނު އަވިޗޭ އަދުރާއި ވިދާޅުވެފައި ވަނީ ޓެރަރިސްްޓު ޖަމާއަތްތަކާ ދެކޮޅަށް، އެ ޖަމާއަތްތަކުގެ ޤާބީލުކަން ނައްތާލުމުގެ މަޤުސަދުގައި އިސްރާއީލްގެ ސިފައިން އެ ސަރަހައްދުތަކުގައި ވަރަށް ހަރުކަށި ކަމާއެކު ޙަރަކާތްތެރި ވަމުންދެ އެވެ. 

ސޯޝަލް މީޑިއާގެ އެކްސްގައި އޭނާ ކޮށްފައިވާާ ޕޯސްޓެއްގައި މެޕެއް ހިމަނައި ވިދާޅުވެފައި ވަނީ، އަލް މަވާސީ ސަރަހައްދުން ވެސް މީހުން ހުސް ކުރުމަށް އަމުރު ކޮށްފައިވާ ކަމަށެވެ. އެ ސަރަހައްދަކީ އިސްރާއީލް އިން އަމިއްލަ އަށް، ރައްކާތެރި ސަރަހައްދެއްގެ ގޮތުގައި ކަނޑައަޅާފައިވާ ސަރަހައްދެކެވެ.