ޣައްޒާގެ ރައްކާތެރި ސަރަހައްދުތަކުގައި އިސްރާއީލްގެ ހަމަލާތައް އިތުރު ކުރަނީ

އިސްރާއީލް އިން ޣައްޒާގައި ހިންގަމުން އަންނަ ހަނގުރާމައިގައި، ޣައްޒާގެ ރައްކާތެރި ސަރަހައްދުތަކުގެ ގޮތުގައި ކަނޑައަޅާފައިވާ ތަންތަނަށް ދެމުން އަންނަ ހަމަލާތައް އިތުރު ކުރަން ފަށައިފި އެވެ.

އިސްރާއީލްގެ އަސްކަރިއްޔާ އިން ވަނީ އަލް މަވާސީ ސަރަހައްދުގައި ހަމަލާތައް އިތުރު ކުރަން ފަށައިފަ އެވެ. މި ސަރަހައްދަކީ އިސްރާއީލްގެ އަސްކަރިއްޔާ އިން އަމިއްލަ އަށް، ރައްކާތެރި ސަރަހައްދެއްގެ ގޮތުގައި ކަނޑައަޅާފައިވާ ސަރަހައްދެކެވެ. 

އިސްރާއީލްގެ އަސްކަރިއްޔާ އިން އަންނަނީ ހޮނިހިރު ދުވަހުގެ ހެނދުނުން ފެށިގެން އަލް މަވާސީ ސަރަހައްދުގައި ހަމަލާތައް ދެމުންނެވެ. އިސްރާއީލްގެ ހަމަލާތަކުގައި އެ ސަރަހައްދުން ހަތަރު މީހަކު ޝަހީދުވެފައިވާއިރު، އިތުރު ހަ މީހަކަށް ވަނީ އެކި ވަރުގެ ޒަޚަމުތައް ލިބިފަ އެވެ. 

ހުކުރު ދުވަހުގެ ހަވީރު ޣައްޒާގެ ސިޓީގައި ހުރި ވަގުތީ ހިޔާތަކަށް އިސްރާއީލްގެ އަސްކަރިއްޔާ އިން ދިން ހަމަލާގައި 15 އަށް ވުރެ ގިނަ ޓެންޓުތައް ވަނީ މުޅިން ވީރާނާވެފަ އެވެ. ޞިއްޙީ ކުއްލި ފަރުވާ ދިނުމުގެ މަސައްކަތް ކުރަމުން އަންނަ ފަރާތްތަކުން އަދި ވެސް އަންނަނީ އެ ސަރަހައްދުގައި ޙަރަކާތްތެރި ވަމުން ކަމަށް ރިޕޯޓުތައް ބުނެ އެވެ. 

އިސްރާއީލްގެ އަސްކަރިއްޔާ އިން ބުނަމުން އަންނަނީ ހަމާސް ޖަމާއަތް މުޅިން ބަލި ކުރެވެންދެން އެ ހަނގުރާމަ ކުރިއަށް ގެންދާނެ ކަމަށެވެ. ހަމާސްއާ ދެކޮޅަށް ކަމަށް ބުނެ އިސްރާއީލް އިން ހިންގަމުން އަންނަ ހަނގުރާމައިގައި ވަނީ ޣައްޒާގެ ގިނަ އަދަދެއްގެ ރައްޔިތުން ޝަހީދުކޮށްލައިފަ އެވެ. އަދި އެތައް ބަޔަކަށް ޒަޚަމުވެފައިވާއިރު، އޭގެ ތެރޭގައި ގިނައީ އަންހެނުންނާއި ކުޑަ ކުދިންނެވެ. 

ޣައްޒާ އަށް މިވަގުތު އިންސާނީ އެހީ އެތެރެ ކުރުމާއި، އިންސާނީ އެހީ ބެހުމުގެ މަސައްކަތް ކުރަމުން އަންނައިރު ވެސް، އިސްރާއީލްގެ އަސްކަރިއްޔާ އިން އަންނަނީ ޣައްޒާ އަށް ދެމުން އަންނަ ހަމަލާތައް އިތުރު ކުރަމުންނެވެ. ޚާއްސަކޮށް އެހީ ބެހުމުގެ މަސައްކަތް ކުރަމުން އަންނަ މަރުކަޒުތަކަށް އަމާޒުކޮށް އަންނަނީ ގިނަ ހަަމަލާތަކެއް ދެމުންނެވެ.