އަޅާނުލާ ތިބެވޭކަށް ނެތް، މިއަދު ކުރިމަތީގައި މިއޮތީ މާސިންގާ ބޮޑު ސްކޭމް ސަރުކާރެއް: އަބްދުﷲ ޝާހިދު
23 ޖޫން 2025 | ހޯމަ 18:03މިއީ އެމްޑީޕީގެ ސަފުތައް ވަރުގަދަކޮށް، އަލުން ރުކުރުވާލަންވީ ވަގުތު، އެމްޑީޕީ އެއަލުން އެކަތިގަނޑަކަށް ވެގެން މި އަތުގުޅާލަނީ ރައީސް މުއިއްޒުގެ މި ސަރުކާރު ޖަވާބުދާރީ ކުރުވުމަށް
އެމްޑީޕީގެ ރައީސް އަބްދު ﷲ ޝާހިދު ހޯމަ ދުވަހުގެ ރޭގެ އެމްޑީޕީ ޖަލްސާގައި ވާހަކަދައްކަވަނީ
ބީރުކަންފަތް ދީގެން، ލޮލަށް ނުފެންނަކަމަށް ހަގައިގެން އަޅާނުލައި މިއަދު ތިބެވެން ނެތްކަމަށާއި، ކުރިމަތީގައި މިއޮތީ ބޮޑު މާސިންގާ ސްކޭމް ސަރުކާރެއް ކަމަށް މޯލްޑިވިއަން ޑިމޮކްރެޓްސް (އެމްޑީޕީ) ގެ ރައީސް އަބްދުﷲ ޝާހިދު ވިދާޅުވެއްޖެއެވެ.
އަބްދުﷲ ޝާހިދު މިފަދައިން ވިދާޅުވީ ހޯމަ ދުވަހުގެ ރޭ ކުރީގެ ރައީސް މުހައްމަދު ނަޝީދާއި ޑިމޮކްރެޓްސްގެ މެމްބަރުން އެމްޑީޕީއާއި ގުޅިވަޑައިގަތުމަށް ސަލްޓަން ޕާކުގައި ބޭއްވި ޖަލްސާގައި ވާހަކަދައްކަވަމުންނެވެ.
އަބްދުﷲ ޝާހިދު ވިދާޅުވީ މިއީ އެމްޑީޕީގެ ސަފުތައް ވަރުގަދަކޮށް، އަލުން ރުކުރުވާލަންވީ ވަގުތު ކަމަށާއި އެމްޑީޕީ އެއަލުން އެކަތިގަނޑަކަށް ވެގެން މި އަތުގުޅާލަނީ ރައީސް މުއިއްޒުގެ މި ސަރުކާރު ޖަވާބުދާރީ ކުރުވުމަށް ކަމަށެވެ.
އަބްދުﷲ ޝާހިދު ވިދާޅުވީ މާޒީގެ އަޅުންނަށް ވެގެން ތިބެވެން ނޯންނާނޭ ކަމަށާއި ހަމަ އެކަނި މާޒީއަށް ބަލަން ތިބެއްޖެ ނަމަ ހަމައެކަނި އޮންނާނި އެ މާޒީގެ ފަސްބާޑި ޖަހަން ތިބުން ކަމަށެވެ.
އޭނާ ވިދާޅުވީ މާޒީއަކީ ބަދަލުކުރެވޭނޭ އެއްޗެއް ނޫން ކަމަށާއި ކުރިއަށް ދެވޭނީ ހަމަ އެކަނި މުސްތަގުބަލަށް އުންމީދު ކޮށްގެން ކަމަށެވެ. އަދި އެމްޑީޕީ މި ނުކުންނަނީ ކުރިއަށް ވުރެވެސް މާގަދަކޮށް އެކަތިގަނޑަކަށް ވެެގެން ކަމަށް ވެސް ޝާހިދު ވިދާޅުވިއެވެ.
ޝާހިދު ވިދާޅުވީ މިއަދު ރާއްޖޭގެ ހާލަތު މިއޮތީ ލޯމަރާލައިގެން ކަންފަތަށް އަޑު ނީވޭގޮތަށް ބީރުކަންފަތް ދީގެން ތިބެވެން އޮތް މަންޒަރެއް ނޫން ކަމަށާއި ކުރިމަތީގައި ފެންނަ މިއޮތީ ބޮޑު ސްކޭމް ސަރުކާރެއް ކަމަށެވެ.
ބޮޑު ސިންގާ ސްކޭމް ސަރުކާރެއް އަޅުގަނޑުމެންގެ ކުރިމަތީގައި މިއޮތީ. ބަންކަރިންގ ގެ ސްކޭމް، ޑޮލަރުގެ ސްކޭމް، ރަސްމާލޭ ބިއްލޫރި ޓަނަލްގެ ސްކޭމް، ޗާގޯސްގެ ސްކީމް، އިންޑިއާ އައުޓޭ ކިޔާފައި ނިކުތް ސްކީމް، ބޯހިޔާވަހިކަން އޮޅުވާލުމަށް، ފްލެޓް ތައް އޮޅުވާލުމަށް އޮތް ސްކީމް، އެއީ މި ސަރުކާރަކީ، މި ސަރުކާރަކީ ޑރ، ބޭސް ދޭނަމޭ ކިޔާފަ އޮޅުވާލި ސަރުކާރު.އެމްޑީޕީ ގެ ރައީސް އަބްދުﷲ ޝާހިދު
ޝާހިދު ވިދާޅުވީ މިއަދު ރާއްޖޭގެ ހުރިހާ ސަރަހައްދެއްގައި ވެސް އެމްޑީޕީގެ ވެރިކަމުގައި ފަށާފައި ހުރި ހުރިހާ ތަރައްގީގެ މަޝްރޫއުތަކެއް ވެސް ހުރީ ހުއްޓާލާފައި ކަމަށެވެ.
އޭނާ ވިދާޅުވީ މިއަދު މި އޮތް ސަރުކާރުން ފަސް ބިލިއަން ރުފިޔާގެ ލޯނު ދައްކާފައިވާ ކަމަށް މީގެ އެއްދުވަސް ކުރިން އިއުލާނު ކޮށްފައިވާ ކަމަށާއި އަދި 1.3 ބިލިއަން ރުފިޔާ ސާޕްލަސްގެ ގޮތުގައި އަދި ވެސް ޖީބުގައި އެބަހުރި ކަމަށް ބުނަމުން ގެންދާ ކަމަށެވެ.
އެހެން ނަމަވެސް އަމިއްލަ ކުންފުނިތަކަށް ސަރުކާރުން ދައްކަން ޖެހޭ ލާރިތައް އަދިވެސް ދައްކާފައި ނުވާ ކަމަށާއި އެ ފައިސާތައް ނުދައްކާހާ ހިނދަކު އެ ބުނާ 1.3 ބިލިއަން ރުފިޔާ ސާޕްލަސްގެ ގޮތުގައި ޖީބުގައި ހުންނާނޭ ކަމަށް ގަބޫލު ނުކުރައްވާ ކަމަށެވެ.
އަދި ސަރުކާރުން ރައްޔިތުންނަށް ދަރާފައި އޮތް ފައިސާތަކާއި އާއި އަމިއްލަ ކުންފުނިތަކަށް ދައްކަން ޖެހިފައި ހުރި ފައިސާތައް ނުދައްކާ ކަމުގައިވާ ނަމަ މި ސަރުކާރު ވެގެންދާނީ ސީދާ ސްކޭމް ސަރުކާރަކަށް ކަމަށް ވެސް އަބްދުﷲ ޝާހިދު ވިދާޅުވިއެވެ.
