"ސަރުކާރުން ދައުލަތް ލޫޓުވައިގެން ލިބޭ ކަޅު ފައިސާ އިން ދެން އިންތިޚާބުތައް ކާމިޔާބު ނުކުރެވޭނެ"
އޭނާ ވިދާޅުވީ މި ސަރުކާރާއި ދެކޮޅަށް ތެދުވަން މިހާރު ލަސްވެސް ވެފައިވާ ކަމަށް ޤަބޫލުކުރައްވާ ކަމަށް
ރައްޔިތުންގެ މަޖިލީހުގެ ކުރީގެ ފުވައްމުލަކު މެދު ދާއިރާގެ މެމްބަރު ހުސެއިން މުހައްމަދު ދީދީ އެމްޑީޕީގެ ޖަލްސާގައި ވާހަކަދައްކަވަނީ
ރައީސް ޑރ.މުހައްމަދު މުއިއްޒުގެ ސަރުކާރުން ދައުލަތް ލޫޓުވައިގެން ލިބޭ ކަޅު ފައިސާ ހޭދަކޮށްގެން ދެން އިންތިޚާބުތައް ކާމިޔާބު ނުކުރެވޭނެ ކަމަށް ރައްޔިތުންގެ މަޖިލީހުގެ ފުވައްމުލަކު މެދު ދާއިރާގެ ކުރީގެ މެމްބަރު ހުސެއިން މުހައްމަދު ދީދީ ވިދާޅުވެއްޖެއެވެ.
އޭނާ އެފަދައިން ވިދާޅުވީ ހުކުރު ދުވަހުގެ ރޭ އެމްޑީޕީން ފުވައްމުލަކުގައި ބޭއްވި ޖަލްސާގައި ވާހަކަދައްކަވަމުންނެވެ. އޭނާ ވިދާޅުވީ ފައިސާ ދީގެން އިންތިޚާބުތައް ކާމިޔާބު ކުރެވިދާނެ ކަަމަށް ސަރުކާރަށް ހީވި ނަމަވެސް އެއީ ކުށް ހީއެއް ކަމަށެވެ.
ހުރިހާ ރަށަކުން ވެސް ކައުންސިލް އިންތިޚާބުގައި މި ސަރުކާރާއި ދެކޮޅަށް ނުކުމެ ވޯޓު ދޭން ޖެހޭ ކަމަށް އޭނާ ވިދާޅުވިއެވެ. އެހެން ނޫނީ އާއްމުން ވަރަށް ބޮޑަށް ހިތާމަކުރަން ޖެހޭނެ ކަމަށާއި 24 ވަނަ އަހަރު މަޖިލިސް އިންތިޚާބުގައި ދެއްކި ވާހަކަ ތަކުރާރުކުރަން ޖެހޭނެ ކަމަށް އޭނާ ވިދާޅުވިއެވެ.
މި ސަަރުކާރުން ކޯޓުތައް ހިމެނޭހެން ހުރިހާ ތަނަކަށް އަތް ބާނަމުންދާ ކަމަށާއި ކަންކަން ކުރަމުން ދަނީ ވަރަށް ޚުދުމުހުތާރުކޮށް ކަަމަށް އޭނާ ވަނީ ވިދާޅުވެފައެވެ. ރައްޔިތުންގެ މަޖިލީހުގެ އަޢުލަބިއްޔަތު ސަރުކާރަށް ދެވުމުން މިހާރުވެސް އާޢްމުން އެކަމާއި ހިތާމަ ކުރާ ކަމަށް ހުސައިން ވަނީ ވިދާޅުވެފައެވެ. މި އަނިޔާވެރިކަން ސަލާމަތް ވުމަށް ކައުންސިލް އިންތިޚާބުގައި އެމްޑީޕީ އަށް ވޯޓު ދިނުމަށް އޭނާ އެދިލެއްވިއެވެ.
" މި އަނިޔާވެރި ވެރިމީހާގެ ކަންކަން 2027، 2028 ގައި އިތުރަށް ނުބައިވާނެ. މިކަހަލަ އަނިޔާވެރި ވެރިޔެއްގެ ކިބައިން ސަލާމަތްވުމަށް ރައްޔިތުންނަށް ލިބޭ ވޯޓު އަޅާ ކަރުދާސްގަނޑުގެ ފުރުސަތުގެ ބޭނުން ރަނގަޅަށް ހިފަން ޖެހޭ." އޭނާ ވިދާޅުވިއެވެ.
އޭނާ ވިދާޅުވީ މި ސަރުކާރާއި ދެކޮޅަށް ތެދުވަން މިހާރު ލަސްވެސް ވެފައިވާ ކަމަށް ޤަބޫލުކުރައްވާ ކަމަށެވެ.
