"ތައުލީމަށް 4 ބިލިއަން ރުފިޔާ ދައުލަތުން ހޭދަކުރާއިރު، ތައުލީމީ ފެންވަރު ދަނީ ދުވަހެއް ދުވަހަކަށް ދަށަށް"

ތައުލީމީ ދާއިރާ ކުރިއެރުވުމަށް ދައުލަތުން ހަތަރު ބިލިއަނެއްހާ ރުފިޔާ ހޭދަކުރާއިރު ވެސް ހާސިލުކުރަން ބޭނުންވާ ނަތީޖާ ހާސިލު ނުވެ، ދަރިވަރުންގެ ތައުލީމީ ފެންވަރު ދަށަށް ދާކަމަށް ވިދާޅުވެ، އެޑިއުކޭޝަން މިނިސްޓަރު ޑރ. އިސްމާއިލް ޝަފީއު ކަންބޮޑުވުން ފާޅުކުރައްވައިފިއެވެ.

އެމަނިކުފާނު މިހެން ވިދާޅުވީ ހޮނިހިރު ދުވަހު ބޭއްވި މަތީ އަރުތަވެރިންގެ އިނާމު ދިނުމުގެ ރަސްމިއްޔާތުގަ އެވެ.

Advertisement

މަތީ އަރުތަވެރިންގެ އިނާމު ދިނުމުގެ ރަސްމިއްޔާތުގައި ވާހަކަދައްކަވަމުން މިނިސްޓަރު ޝަފީއު ވިދާޅުވީ 2013 ވަނަ އަހަރާއި 2014 ވަނަ އަހަރުގެ މަތީ ސާނަވީ އިމްތިހާނުގެ ނަތީޖާއަށް ބެލި ނަމަވެސް މުޅި އިމްތިހާނުގައި ބައިވެރިވި ދަރިވަރުންގެ 50 އިންސައްތަ ވެސް ފަސް މާއްދާއިން ފާސްވެފައި ނުވާ ކަމަށެވެ.

އެޑިއުކޭޝަން މިނިސްޓްރީން ކަނޑައަޅާފައިވާ ފަސް މާއްދާއިން 'ސީ' ފާސް ހޯދުމަކީ ދަރިވަރުން ފާސްވާންޖެހޭ އެންމެ ދަށް މިންވަރު ކަމަށް ޝަފީއު ވިދާޅުވިއެވެ.

ހަމައެއާއެކު 2023 އަދި 2024ގެ ނަތީޖާއަށް ބަލާއިރު ވެސް ފެންނަނީ ހަމަ އެ މަންޒަރު ކަމަށާއި، 50 އިންސައްތަ ދަރިވަރުން ފަސް މާއްދާއިން ފާސްވެފައި ނެތް ކަމަށް ވިދާޅުވެ މިނިސްޓަރު ވަނީ ކަންބޮޑުވުން ފާޅުކުރައްވައިފައެވެ.

ގާތްގަނޑަކަށް ހަތަރު ބިލިއަނެއްހާ ރުފިޔާ ދައުލަތުން ތައުލީމަށް ހޭދަކުރަމުން ދާއިރު، އަދި އަޅުގަނޑުމެންގެ ހީވާގި މުދައްރިސުން އެތައް ގަޑިއިރެއް ކިޔަވައިދިނުމުގަ ހޭދަކުރަމުންދާއިރު، އަދި ބެލެނިވެރިން ކުރާ މަސައްކަތާ އެކުގަ، މި ހުރިހާ މަސައްކަތެއް ގުޅިގެން ވެސް އަޅުގަނޑުމެން އެންމެ ދާން ބޭނުންވާ މަންޒިލަށް އަދި ވާސިލެއް ނުވެވެއޭ،

އެޑިއުކޭޝަން މިނިސްޓަރު ޑރ. އިސްމާއިލް ޝަފީއު

އޯލެވެލް ނަތީޖާ ދަށްވުމުގެ މައިގަނޑު ސަބަބެއް ކަމަށް ވަޒީރު ފާހަގަކުރެއްވީ ޕްރައިމަރީ މަރުހަލާގެ ނަތީޖާ ދަށްވުމެވެ. ދައުލަތުން ތައުލީމީ ދާއިރާއަށް ބޮޑެތި ހަރަދުތަކެއް ކުރަމުންދާއިރު އެކަށީގެންވާ ނަތީޖާއެއް ނުފެންނަކަމަށް ވަޒީރު ވިދާޅުވި އެވެ.

އެގޮތުން ނޭޝަނަލް އެސެސްމަންޓް އޮފް ލާނިން އައުޓްކަމްގެ ޑޭޓާތަކަށް ބަލާއިރު، ކީ ސްޓޭޖް އެކެއް އަދި ދޭއްގެ ނަތީޖާ ވެސް އެކަށީގެންވާ ގޮތެއްގައި ކުރިއަރަމުން ނުދާ ކަމަށް މިނިސްޓަރު ވިދާޅުވިއެވެ.

ވީމާ، މި ހަގީގަތް ގަބޫލުކޮށްގެން ނޫނީ ދަރިވަރުންގެ ނަތީޖާ ކުރިއެރުވޭނެ ގޮތެއް ނުފެންނާނެކަމަށްވެސް އެމަނިކުފާނު ވިދާޅުވި އެވެ. މި ކަންކަން ހައްލުކުރުމަށް، މުދައްރިސުންގެ ފެންވަރު ރަނގަޅުކުރުމަށް މަސައްކަތްތައް ކުރެވެމުންދާ ކަމަށާއި، ރާއްޖޭގެ ހުރިހާ ސްކޫލެއްގެ ޕްރިންސިޕަލުންނަށް ލީޑަޝިޕް ޓްރެއިނިން ދިނުމުގެ އިތުރުން ކަރިކިއުލަމާއި ކޮންޓެންޓަށް ބަދަލުތައް ގެނެވޭނެކަމަށްވެސް ވަޒީރު ޝަފީއު ވިދާޅުވި އެވެ.

ތައުލީމީ ދާއިރާއަކީ މި ސަރުކާރުން ޚާއްސަ އަހައްމިއްޔަތުކަމެއް ދޭ ދާއިރާއަކަށް ވާއިރު، ތައުލީމީ ދާއިރާ ރަނގަޅު ކުރުމަށް 'ތައުލީމަށް އިންގިލާބީ ބަދަލު' ގެ ނަމުގައި 9.5 މިލިއަން ޑޮލަރުގެ ހިލޭ އެހީއާއެކު ކުރިއަށް ގެންދާ ބޮޑު މަޝްރޫއެއް މިދިޔަ އަހަރު ސަރުކާރުން ފެށިއެވެ.