ސަގާފީ ގިނަ ހަރަކާތްތަކާއި އެކު ކަމަދޫ ދަނީ ތަފާތު ދައްކަމުން!
ކަމަދޫ އަށް އެ ރަށުން ބޭރުން އެތައް ބަޔަކު ވަނީ ގޮސްފަ
1446 ވަނަ އަހަރު ކަމަދޫގައި ކުރިއަށްދާ އީދު ފޯރި
އީދުގެ ފޯރި އެންމެ ގަދަ ރަށްތަކުގެ ލިސްޓުގެ ކުރީގައި މިފަހަރު ހަމަ ޔަގީނުންވެސް ބ އަތޮޅުގެ ކަމަދޫ ހިމެނޭނެއެވެ. އެގޮތުން މުޅި ރަށުގެ ރައްޔިތުން ނުކުމެ ދައްކުވައިދެމުން ގެންދަނީ އެކުވެރިކަމާއި، އެއްބައިވަންތަކަމުގެ ނަމޫނާއެކެވެ.
އީދުގެ ހަރަކާތްތަކަށް ބަލާއިރުވެސް، ޒަމާންވީ ދިވެހިވަންތަ ސަޤާފަތްތަކާއި ރަހަތަކުގެ ކުލަވަރު ކަމަދޫއިން ދަނީ ދައްކުވައިދެމުންނެވެ.
އެންމެ ހާއްސަ ކަމަކީ އީދުގެ އެކިއެކި ހަރަކާތްތަކަށް ހާއްސަކޮށް ތައްޔާރުކޮށްފައި އެ ހުންނަ ލަވަތަކެވެ. އެގޮތުން ކޮންމެ ލަވައެއްގައިވެސް ކަަމަދޫގެ ވާހަކަތައް ހިމަނާލާފައިވާއިރު، އެރަށުން އީދަށް ވެފައިވާ ތައްޔާރީތަކާއި ރަށުގެ ހުނަރުވެރިކަން ލަވަތަކުން އެކަނިވެސް ފެނިގެން ދެއެވެ.
ބުރާސްފަތި ދުވަހުގެ ރޭ ކަމަދޫގެ ޢީދު ހަރަކާތްތައް ފެށުނީ ސަޤާފީ ހަރަކާތްތަކާއި އެކު އެ ރަށުގައި ޢީދު ހަރަކާތްތައް ބާއްވަން ތައްޔާރުކޮށްފައިވާ ޢީދު ސްޓޭޖް ހުޅުވުމުގެ ރަސްމިއްޔާތާއި އެކުގައެވެ.
ރަށުގެ ކުދި ބޮޑު އެންމެންހެން އެކުވެގެން ކުރިއަށް ދިޔަ އެ ހަރަކާތަކީ ފާއިތުވި 10 ވަރަކަށް އަހަރު މި ރަށުގެ ސަޤާފީ ރަމްޒެއްގެ ގޮތުން ކުރަމުން އަންނަ ކަމެކެވެ.
އެ ހަރަކާތުގެ އެންމެ މުހިއްމު ކަމަކަށް ވެގެން ދިޔައީ "ޚިދުމަތުގެ ރަމްޒު" އެވޯޑް ދިނުމެވެ. އެ ރަށު ކައުންސިލުން މި ފަހަރު އެ އެވޯޑް ދީފައި ވަނީ ބ. ކަމަދޫ، ސީނާ ވިލާ އަލީ ޝަރީފު އާދަމް އަށެއެވެ. އެ ރަށުގެ ކުރިއެރުމާއި ތަރައްޤީ އަށް ގިނަ ޚިދުމަތްތަކެއް ކޮށްދެއްވާފައިވާ އަލީ ޝަރީފު އާއި ގުޅުން ހުރި ޚާއްސަ ރިޕޯޓެއް އެ ހަރަކާތުގެ ތެރެއިން ވަނީ ގެނެސްދީފައެވެ. އެގޮތުން ސަރުކާރަށް 31 އަރަހަށް ވުރެ ގިނަ ދުވަހު ވަނީ ޙިދުމަތް ކުރައްވާފައެވެ.
މުޅި ކަމަދޫ އިން ވެސް ފެނުނީ އެއްބައިވަންތަކަމާއި އެއްބައެއްކަން ދައްކުވާދިނުމުގެ ރޫހެވެ. ކަމަދޫގެ ސްޓޭޖް ހުޅުވުމުގެ ރަސްމިއްޔާތުގައި އެ ރަށު ކަނބަލުންގެ ނެށުމުގެ ފަރި ހަރަކާތްތަކެއް ވަނީ ދައްކާލާފައެވެ. ކަމަދޫގެ ޢީދު ހަރަކާތްތަކުން ފާހަގަވި އެންމެ މުހިންމު އެއްކަމަކީ އެންމެންގެ ހިތްގައިމު ހިނިތުންވުމެވެ. އަދި ކަމަދޫގެ ރައްޔިތުންގެ ސަޤާފީ ހުނަރުވެރިކަމެވެ. ދަފި ނެގުމާއި، ބަނޑިޔާ ޖެހުން ފަދަ ޗާލު ނެށުންތައް ކަމަދޫގެ ޢީދު ހަރަކާތްތަކުން ފެނިގެން ދިޔަ އިރު، އެ ހަރަކާތްތަކުގެ އެއްވަރުކަމާއި، ފުރިހަމަ ކަމުން މި ޢީދަށް ކަމަދޫ ތައްޔާރުވެފައިވާ މިންވަރު އެނގިގެންދެއެވެ.
ކަމަދޫގެ ޢީދު ފޯރި އިތުރުކޮށްދިން އަނެއްކަމަކީ ރަށަށް އައި މެހެމާނުންނާއި މެދު ބަހައްޓާ ގާތްކަމެވެ. އެހެން ރަށްރަށެކޭ އެއްފަދައިން ކަމަދޫގަ ވެސް ޢީދުގެ ފުރަތަމަ ދުވަސް ފެށީ ޢީދު ނަމާދާއި އެކުގައެވެ. ބޮޑު ޖަމާއަތުގައި ކުރިއަށް ދިޔަ ޢީދު ނަމާދަށް ފަހު ޢީދު ސައި ވަނީ ބާއްވާފައެވެ. ރާއްޖެ އެމްވީ އަށް މައުލޫމާތުދެމުން އެ ރަށު ކައުންސިލްގެ ރައީސް ހަސަން ޒަރީރު ވިދާޅުވީ އީދު ސައިގެ ހަރަކާތަށް ވެސް ވަރަށް ރަނގަޅު ތަރުޚީބެއް ލިބިގެން ދިޔަކަމަށެވެ. އަދި އެފަދަ ހަރަކާތެއްގެ ބޭނުމަކީ މުޖުތަމައުގައި ދޭދޭ ފަރުދުންގެ މެދުގައި އޮންނަ ގާތް އެކުވެރި ގުޅުން ބަދަހިކުރުން ކަމަށް އޭނާ ވަނީ ވިދާޅުވެފައެވެ.
ޢީދު ސަޔަށް ފަހު ދެން ހެނދުނާއި މެންދުރުގެ ވަގުތުތަކުގައި ޚާއްސަ ސަޤާފީ ހުށަހެޅުންތަކެއް ވަނީ ހުށަހަޅާދީފައެވެ. ރަށުގެ ޒުވާނުންގެ ހުނަރުވެރިކަން ފެނިގެން ދިޔަ އެ ހަރަކާތްތައް ރަށުގެ އެކި ސަރަހައްދުތަކުގައި ވަނީ ކުރިއަށް ގެންގޮސްފައެވެ.
ކޯޑި ކެނޑުމާއި، ބޮޑުމަސް ބޭނުމާއި، ސްޓޭޖް ޝޯވ ގެ އިތުރުން، ދަފި ނެގުމާއި، މާފަތީގެ ހަރަކާތްތަކާއި، ކުޅިވަރު ހަރަކާތްތަކާއެކު ކަމަދޫގެ ކުދިބޮޑު ރައްޔިތުން އީދު ފާހަގަކުރަމުންދަނީ ރަށަށް އީދަށް ޒިޔާރަތްކުރި މެހެމާނުންވެސް ހައިރާން ކޮށްލާފައެވެ. އެހާވެސް އިންތިޒާމުތައް ފުރިހަމައެވެ.
އީދަކީ އުފާ ފާޅުކޮށް ގުޅުން ބަދަހި ކުރުމަށް ލިބޭ ފުރުސަތަކަށްވާއިރު، ކަމަދޫ ފަދަ ރަށްތަކުން ގެންދަނީ އެ ނަމޫނާ ދައްކަމުންނެވެ.
