ނަތަންޔާހޫ ހައްޔަރު ކުރަން އަމުރު ނެރުނު އައިސީސީގެ ހަތަރު ފަނޑިޔާރުން އެމެރިކާ އަށް އެރުން މަނާ ކޮށްފި

ޣައްޒާ ގައި ހަނގުރާމައިގެ ޖަރީމާ ތައް ހިންގުމުގެ ތުހުމަތުގައި އިސްރާއީލުގެ ބޮޑު ވަޒީރު ބެންޖަމިން ނަތަންޔާހޫ ހައްޔަރު ކުރުމަށް ބައިނަލްއަޤްވާމީ ޖިނާއީ ކޯޓު (އައިސީސީ) އިން އަމުރު ނެރުމާ ގުޅިގެން އެ ކޯޓުގެ ހަތަރު ފަނޑިޔާރުންގެ މައްޗަށް އެމެރިކާއިން ފިޔަވަޅު އަޅައިފިއެވެ.

މި ފިޔަވަޅު ތަކާ ގުޅިގެން އައިސީސީ އިން ބުނެފައި ވަނީ އެމެރިކާގެ އެ އަމަލު ކުށްވެރިކުރާ ކަމަށާއި އެއީ ކޯޓުގެ މިނިވަންކަން ނަގާލުމަށް ކުރެވޭ "ސާފު މަސައްކަތެއް" ކަމަށް ދެކޭ ކަމަށެވެ.

އެމެރިކާ އިން އައިސީސީ ގެ ހަތަރު އަންހެން ފަނޑިޔާރުންގެ މައްޗަށް ފިޔަވަޅު އަޅާފައި ވަނީ ބުރާސްފަތި ދުވަހުއެވެ.

މި ފިޔަވަޅުތަކުގެ ދަށުން، އެ ހަތަރު ފަނޑިޔާރުންނަށް އެމެރިކާ އަށް ވަނުން މަނާކުރެވި، އެމެރިކާގެ ބާރުގެ ދަށުގައިވާ އެ ފަރާތްތަކުގެ މުދަލާއި މަސްލަހަތުތައް ހިފެހެއްޓޭނެއެވެ. މިފަދަ ފިޔަވަޅުތައް އާންމުކޮށް އަޅަނީ އެމެރިކާ އާ ދެކޮޅުވެރި ސިޔާސަތު ކަނޑައަޅާ ފަރާތްތަކުގެ މައްޗަށް ކަމުގައިވާއިރު، ޝަރުޢީ އޮފިޝަލުންގެ މައްޗައް މިފަދަ ފިޔަވަޅުތައް އެޅުމުން އެތައް ފަރާތަކުން އަންނަނީ ކަންބޮޑުވުން ފާޅު ކުރަމުންނެވެ.

މި ފިޔަވަޅުތައް ބަލައިނުގަނެ، އައިސީސީން ވަނީ އެ ކޯޓުގެ މަސައްކަތް ހުއްޓުމެއްނެތި ކުރިއަށް ގެންދާނެކަމަށް ބުނެފައެވެ.

"މި ފިޔަވަޅުތަކަކީ ދުނިޔޭގެ ހުރިހާ ކަންކޮޅުތަކުން 125 ޤައުމެއްގެ މެންޑޭޓުގެ ދަށުން މަސައްކަތްކުރާ ބައިނަލްއަޤްވާމީ ޝަރުޢީ މުއައްސަސާއެއްގެ މިނިވަންކަން ނަގާލުމަށް ކުރެވޭ ސާފު މަސައްކަތެކެވެ،" ހޭގުން ނެރުނު ބަޔާނެއްގައި ކޯޓުން ބުނެފައިވެއެވެ.

ޖަވާބުދާރީ ކުރުވުމަށް މަސައްކަތްކުރާ ފަރާތްތަކުގެ މައްޗަށް ފިޔަވަޅު އެޅުމުން، އެއީ އަދަބުން ސަލާމަތްވެވޭނެ ކަމެއް ކަމަށް ޤަބޫލުކުރާ މީހުންނަށް އެފަދަ ފިޔަވަޅުތަކުގެ ސަބަބުން ހިތްވަރު ލިބޭ ކަމެއް ކަމުގައި ކޯޓުން ބުނެފައިވެއެވެ.

ނޮވެމްބަރު 2024 ގައި، އައިސީސީން ނެތަންޔާހޫ އާއި އޭނާގެ ކުރީގެ ދިފާޢީ ވަޒީރު ޔޯވް ގަލަންޓްގެ މައްޗަށް ހައްޔަރު އަމުރު ނެރެފައިވަނީ، ޣައްޒާގައި ފަލަސްތީނުގެ ރައްޔިތުންގެ މައްޗަށް އިސްރާއީލުން ހިންގަމުންދާ ނަސްލު ނައްތާލުމުގެ ޢަމަލުތަކާ ގުޅިގެން އިންސާނިއްޔަތާ ދެކޮޅު ކުށްތަކާއި ހަނގުރާމައިގެ ކުށްތަކުގެ ދަޢުވާ ކުރުމަށެވެ.

މި އަމުރުގެ ދަށުން، އައިސީސީ އުފެއްދުމަށް ރޯމް ޤާނޫނުގައި ސޮއިކޮށްފައިވާ 125 ޤައުމުން އެ ދެ މީހުން ހައްޔަރުކޮށް ހޭގުގައި ހުންނަ ކޯޓަށް ޙަވާލުކުރަން ޖެހެއެވެ.

އެމެރިކާ އާއި އިސްރާއީލަކީ އައިސީސީ ގައި ބައިވެރިވާ ދެ ގައުމެއް ނޫނެވެ.

އައިސީސީ އަކީ ދުނިޔޭގެ އެންމެ ނުރައްކާތެރި ޖަރީމާތައް ހިންގާ ކަމަށް ތުހުމަތުކުރެވޭ ފަރުދުންގެ މައްސަލަތައް ތަޙްޤީޤުކުރާ ކޯޓެވެ.