ހާލުގައި ޖެހިފައިވާ ޣައްޒާގެ ރައްޔިތުންނަށް އެހީ ހިފައިގެން ދަތުރު ކުރާ ބޯޓަށް ހުރަސް އަޅާނެ ކަމަށް އިސްރާއީލުން ބުނެފިއެވެ.

އިސްރާއީލުގެ ސިފައިން "މެޑްލީން" ނަމަކަށް ކިޔާ މި ބޯޓަށް "ސީދާ މެސެޖެއް" ފޮނުވާނެ ކަމަށް އިސްރާއީލުގެ ނޫހެއް ކަމަށް ވާ ޖެރޫސަލަމް ޕޯސްޓުން ބުރާސްފަތި ދުވަހު ރިޕޯޓުކޮށްފައިވެއެވެ.

އިސްރާއީލުން ދޭ މެސެޖަކީ ޣައްޒާ އަށް ބޯޓު ނުވަނުން ކަމަށް ވެސް އިސްރާއީލުގެ އަސްކަރީ އޮފިޝަލަކާ ހަވާލާދީ މި ޚަބަރުގައި ބުނެފައިވެއެވެ.

އެކްޓިވިސްޓް ގްރޫޕެއް ކަމަށްވާ ފްރީޑަމް ފްލޮޓިލާ ކޯލިޝަނުން އިންތިޒާމު ކޮށްގެން ކުރާ މި ދަތުރު ގައި ބޯޓު، އިޓަލީގެ ދެކުނުގައިވާ ސިސިލީގެ ބަނދަރެއް ކަމަށްވާ ކެޓާނިއާ އިން އާދީއްތަ ދުވަހު ފުރީ ޣައްޒާގެ މައްޗަށް އިސްރާއީލުން އަޅާފައިވާ ބްލޮކޭޑް ނިމުމަކަށް ގެނައުމުގެ މިޝަނެއްގައެވެ.

އިސްރާއީލުގެ ސިފައިން މި ބޯޓަށް ކުރިމަތި ލުމަށް ތައްޔާރުވަމުން ދާކަމަށާއި، ބޯޓު އަންނަ ސަރަޙައްދަށް ސިފައިން ފޮނުވުމަށް ތައްޔާރު ވަމުންދާކަމަށް ރިޕޯޓު ކޮށްފައި ވެއެވެ.

ބޯޓުގައި ތިބި މީހުން "އަމުރުތަކާ ޚިލާފުވެއްޖެ ނަމަ ނުވަތަ ގަދަ ދައްކައިފި ނަމަ" އެމީހުން ހައްޔަރުކޮށް، ޑިޕޯޓް ކުރުމަށްޓަކައި އަޝްދޯދް ބަނދަރަށް ގެންދިއުމަށް ހަމަޖެހިފައިވާ ކަމަށް ރިޕޯޓުތަކުގައި ވެއެވެ.

މި ސިނާރިއޯ އަށް އިސްރާއީލުގެ އެލީޓް ކޮމާންޑޯ ޔުނިޓް އާއި މިސައިލް ބޯޓު ފްލީޓެއް ތައްޔާރު ވަމުންދާ ކަމަށް ޖެރޫސަލަމް ޕޯސްޓުން ސިފައިންގެ މަސްދަރުތަކަކަށް ހަވާލާދީ ރިޕޯޓުކޮށްފައިވެއެވެ.

މި އުޅަނދު ޣައްޒާ އަށް ފޯރާނެ ކަމަށް ލަފާކުރެވެނީ ކުރިއަށް އޮތް ދެތިން ދުވަހުގެ ތެރޭގައެވެ. މި ބޯޓުގައި އިންސާނީ އެހީގެ ގޮތުގައި ކާބޯތަކެއްޗާއި ބޭސްފަރުވާގެ ތަކެތި ހުރިކަމަށް ރިޕޯޓުތައް ބުނެއެވެ.

މޫސުމަށް އަންނަ ބަދަލުތަކާ ގުޅޭ ގޮތުން ކެމްޕޭން ކުރާ ގްރެޓާ ތުންބަރގް އަދި އިތުރު 11 އެކްޓިވިސްޓުން އުޅަނދުގައި އަންނަނީ ދަތުރު ކުރަމުންނެވެ.

ބޯޓުގައި ތިބި އެހެން އެކްޓިވިސްޓުންގެ ތެރޭގައި "ގޭމް އޮފް ތްރޯންސް" ސީރީޒް ގައި ތަމްސީލުކުރި ލިއަމް ކަނިންގްހަމް އަދި ފަލަސްތީނު އަސްލަކުން އައިސްފައިވާ ފަރަންސޭސި ޔޫރަޕިއަން ޕާލިމަންޓުގެ މެންބަރު ރީމާ ހަސަން ހިމެނެއެވެ.

މެއި މަހުގެ މެދުތެރޭގައި، އިސްރާއީލުން ގާތްގަނޑަކަށް ތިން މަސް ދުވަހުގެ މުއްދަތަކަށްފަހު ޣައްޒާގެ މައްޗަށް އަޅާފައިވާ ބްލޮކޭޑް އަށް ކުޑަކޮށް ލުއިކޮށްދީފައިވެއެވެ. މިގޮތުން، ވަރަށް މަދު މިންވަރެއްގެ އިންސާނީ އެހީ އެ ސަރަޙައްދަށް ވެއްދުމުގެ ހުއްދަ ދީފައިވެއެވެ.

އިތުރު އެހީ ނުގެނެވިއްޖެ ނަމަ ޣައްޒާގައި ބަނޑުހައިހޫނުކަމުގެ ނުރައްކާ ކުރިމަތިވެދާނެ ކަމަށް ތަޖުރިބާކާރުން އިންޒާރުދީފައިވެއެވެ.

އދ. ގެ އޭޖެންސީތަކާއި އެހީދޭ ޖަމާޢަތްތަކުން ބުނެފައިވާ ގޮތުގައި އިސްރާއީލުގެ ފިއްތުންތަކުގެ ސަބަބުން، ޣައްޒާގައި ދިރިއުޅޭ ގާތްގަނޑަކަށް 2 މިލިއަން ފަލަސްޠީނު ރައްޔިތުންނަށް އެހީ ފޯރުކޮށް ދިނުމަކީ ވަރަށް ބޮޑަށް ދަތިވެފައިވާ ކަމެކެވެ.