ހުސްވެފައިވާ ކޮމިޝަނަރ އޮފް ޕޮލިސްގެ މަޤާމަށް ތިން ފަރާތަކުން ކުރިމަތިލައިފި އެވެ.

ކޮމިޝަނަރ އޮފް ޕޮލިސްގެ މަޤާމު ހުސްވީ އެންމެ ފަހުން އެ މަޤާމުގައި ހުރި އަލީ ޝުޖާއު އިސްތިއުފާ ދެއްވުމާ ގުޅިގެންނެވެ. ކޮމިޝަނަރުގެ މަޤާމުން ޝުޖާއު އިސްތިއުފާ ދެއްވާފައި ވަނީ މާލޭ ގެއެއްގެ ފުރާޅު މައްޗަށް ޒުވާން އަންހެން ކުއްޖަކު ވެއްޓިފައި އޮއްވައި ފެނުނު މައްސަލައިގެ ތަހުގީގާ ގުޅިގެން ގިނަ ފާޑު ކިޔުންތަކެއް އަމާޒުވެފައި ވަނިކޮށެވެ.

ކޮމިޝަނަރ އޮފް ޕޮލިސްގެ މަޤާމަށް ކުރިމަތިލުމަށް ފުރުސަތު ހުޅުވާލީ ހުސްވި މެއި މަހުގެ 27 ވަނަ ދުވަހު އެވެ. އެ އިއުލާންގެ މުއްދަތު ހަމަވާނީ ހޯމަ ދުވަހުގެ މެންދުރު 12:00 އަށެވެ.

އެ މުއްދަތު ހަމަވެފައިވާއިރު، ކޮމިޝަނަރ އޮފް ޕޮލިސްގެ މަޤާމަށް ކުރިމަތިލީ ތިން ފަރާތުގެ ތެރެއިން އެއް ފަރާތަަކީ މިހާރުގެ އެކްޓިނގ ކޮމިޝަނަރ އޮފްް ޕޮލިސް އަދި އެސިސްޓެންޓް ކޮމިޝަނަރ އޮފް ޕޮލިސް އިސްމާއީލް ނަވީން އެވެ. މީގެ އިތުރުން ކޮމިޝަނަރ އޮފް ޕޮލިސްގެ މަޤާމަށް ދެން ކުރިމަތިލީ ޑެޕިއުޓީ ކޮމިޝަނަރ އޮފް ޕޮޮލިސް ފަރުޙާދު ފިކުރީ އަދި އެސިސްޓެންޓް ކޮމިޝަނަރ އަޙުމަދު ޝަމީމް އެވެ.

ޕޮލިސް ކޮމިޝަނަރުގެ މަޤާމަށް ބޭފުޅަކު އައްޔަން ކުރާނީ ހޯމް މިނިސްޓަރުގެ ލަފަޔާ އެކު، ރައީސުލްޖުމްހޫރިއްޔާ އެވެ. އޭގެ ކުރިން ޕޮލިސް ބޯޑުން، ކޮމިޝަނަރ އޮފް ޕޮލިސްގެ މަގާމަށް ކުރިމަތިލީ ފަރާތްތަކުގެ މެދުގައި އިންޓަވިއު ކުރާނެ އެވެ.

މިވަގުތު ނަވީންގެ ބެއްލެވުމުގެ ދަށުން ފުލުހުންގެ މުއައްސަސާ ހިންގަމުން އައި ނަމަވެސް، ކުރީގެ ކޮމިޝަނަރ ޝުޖާއު އިސްތިއުފާ ދެއްވުމާ އެކު، އެންމެ ފުރަތަަމަ އެކްޓިންގ ކޮމިޝަނަރ އޮފް ޕޮލިސްގެ މަގާމަށް ހަމަޖެއްސީ ފަރުޙާދު އެވެ. އެކަން އިއުލާން ކުރެއްވީ ހޯމް މިނިސްޓަރު އަލީ އިޙުސާން އެވެ.

އެ ނިންމުން އިއުލާން ކުރިތާ ގިނައިރު ތަކެއް ނުވަނީސް، ހޯމް މިނިސްޓަރު އިޙުސާން ކުރެއްވި އެެހެން ޓުވީޓެއްގައި ވަނީ އެކްޓިންގ ކޮމިޝަނަރ އޮފް ޕޮލިސްގެ މަގާމަށް ނަވީން ހަމަޖައްސަވާ ފައިވާކަން އިއުލާން ކުރެއްވި އެވެ.