މަޖިލީހުގެ ދެ ވަނަ ދައުރު ހޯމަ ދުވަހު ފަށަނީ، ސުޕްރީމް ކޯޓު ފަނޑިޔާރުން އައްޔަން ކުރުން އެޖެންޑާގައި
ސުޕްރީމް ކޯޓަށް ދެ ފަނޑިޔާރުން އައްޔަން ކުރަނީ، އެންމެ ފަހުން އެ ކޯޓުގެ ދެ ފަނޑިޔާރު ކަމުގެ މަޤާމުން ވަކި ކުރެއްވި ޑޮކްޓަރު އަޒްމިރަލްދާ ޒާހިރު އަދި އަލްއުސްތާޛް މަހާޒް އަލީ ޒާހިރުގެ ބަދަލުގައި
ރައްޔިތުންގެ މަޖިލީހުގެ ޖަލްސާގައި މަޖިލީހުގެ ރައީސް ޢަބްދުއް ރަހީމް ޢަބްދުﷲ
ވިހި ވަނަ ރައްޔިތުންގެ މަޖިލީހުގެ 2025 ވަނަ އަހަރުގެ ދެ ވަނަ ދައުރުގެ ފުރަތަމަ ޖަލްސާ ހޯމަ ދުވަހު ބާއްވަން އެޖެންޑާ ކޮށްފި އެވެ.
މަޖިލީހުގެ މިއަހަރުގެ ފުރަތަމަ ދައުރު ނިންމައި މަޖިލިސް ޗުއްޓީ އަށް ދިޔައީ މެއި މަހުގެ 15 ވަނަ ދުވަހު އެވެ. މަޖިލީހުގެ ފުރަތަމަ ދައުރުގައި ވަނީ ޖުމުލަ 32 ޖަލްސާ ބާއްވައިފަ އެވެ. އަދި އެ ދައުރުގައި ވަނީ ނުވަ ބިލެއް ވެސް މަޖިލީހުން ފާސްކޮށްފަ އެވެ.
ހޯމަ ދުވަހުގެ ހެނދުނު 09:00 ގައި އޮންނަ މިއަހަރުގެ ދެ ވަނަ ދައުރުގެ ފުރަތަމަ ޖަލްސާގެ އެޖެންޑާ މިހާރު ވަނީ މެމްބަރުންނަށް ވެސް ފޮނުވައިފަ އެވެ.
އެ ޖަލްސާގައި ފާހަގަކޮށްލެވޭ އެންމެ މުހިންމު ކަަމަކަށް އޮތީ، ދިވެހި ރާއްޖޭގެ ސުޕްރީމް ކޯޓަށް ދެ ފަނޑިޔާރުން އައްޔަން ކުރުމުގެ މައްސަލަ އެވެ. އެގޮތުން ސުޕްރީމް ކޯޓުގެ ފަނޑިޔާރު ކަމުގެ މަގާމަށް އައްޔަން ކުރުމަށްޓަކައި ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު ފޮނުއްވާ ނަންތައް ދިރާސާކޮސް ގޮތެއް ނިންމުމަށް މައްސަލައާ ގުޅޭ ދާއިމީ ކޮމެޓީ އަށް ފޮނުވުމަށް ވަނީ އެޖެންޑާ ކޮށްފަ އެވެ.
ސުޕްރީމް ކޯޓަށް ދެ ފަނޑިޔާރުން އައްޔަން ކުރަނީ، އެންމެ ފަހުން އެ ކޯޓުގެ ދެ ފަނޑިޔާރު ކަމުގެ މަޤާމުން ވަކި ކުރެއްވި ޑޮކްޓަރު އަޒްމިރަލްދާ ޒާހިރު އަދި އަލްއުސްތާޛް މަހާޒް އަލީ ޒާހިރުގެ ބަދަލުގަ އެވެ.
މިއަހަރުގެ ފުރަތަމަ ދައުރު ނިންމައި މަޖިލިސް ޗުއްޓީ އަށް ދިޔުމުގެ ކުރިން ވަނީ ސުޕްރީމް ކޯޓުގެ ފަނޑިޔާރު ކަމުގެ މަގާމުން އަޒްމިރަލްދާ އާއި މަހާޒް ވަކި ކުރުމަށް ނިންމައިފަ އެވެ. މަޖިލީހުން އެ ދެ ބޭފުޅުން ފަނޑިޔާރުކަމުން ވަކި ކޮށްފައި ވަނީ ޤާނޫނު އަސާސީއާ ޚިލާފަށް ކަމަށް ބުނެ ގިނަ ބަޔަކު ވަނީ ނުރުހުން ވެސް ފާޅު ކޮށްފަ އެވެ.
ފަނޑިޔާރުކަމުން އަޒްމިރަލްދާ އާއި މަހާޒް ވަކި ކުރުމަށް 68 މެމްބަރަކު ވޯޓު ދިންއިރު، އެކަމާ ދެކޮޅަށް ވޯޓު ދިނީ 11 މެމްބަރުންނެވެ. އަދި މަޖިލީހުން އެ ދެ ބޭފުޅުން ވަކި ކޮށްފައި ވަނީ، ޖުޑީޝަލް ސާވިސް ކޮމިޝަން (ޖޭއެސްސީ) ގެ ނިންމުމަކީ ޞައްޙަ ނިންމުމެއް ނޫން ކަމަށް ރައްޔިތުންގެ މަޖިލީހުގެ ކައުންސެލް ޖެނަރަލް ފާތިމަތު ފިލްޒާ ވެސް ލަފާ ދެއްވާފައި ވަނިކޮށެވެ.
ފަނޑިޔާރުން އައްޔަން ކުރުމުގެ މައްސަލައިގެ އިތުރުން، ހޯމަ ދުވަހުގެ ޖަލްސާ އަށް ދެން އެެޖެންޑާ ކޮށްފައި ވަނީ ނޮން ރެސިޑެންޓް ސަފީރުން އައްޔަން ކުރުމުގެ މައްސަލަ އެވެ. އެގޮތުން ނޭޕާލް، އަޔަލެންޑް އަދި ޔުކްރެއިން އަށް ނޮން ރެސިޑެންޓް ސަފީރުން އައްޔަން ކުރުމުގެ މައްސަލަަ ވަނީ އެޖެންޑާ ކޮށްފަ އވެެ.
މީގެ އިތުރުން، ސަރުކާރުގެ ފަރާޓުން ދާންދޫ ދާއިރާގެ މެމްބަރު މުޙައްމަދު ފަޟީލް ހުށަހަަޅުއްވާފައިވާ، ޤާނޫނަށް އިސްލާޙު ގެނައުން ވެސް ވަނީ އެޖެންޑާ ކޮށްފަ އެވެ. އެއީ ޤާނޫނު ނަންބަރު 2012/2 (މޯލްޑިވްސް ސިވިލް އޭވިއޭޝަން އޮތޯރިޓީގެ ޤާނޫނު) އަށް އިސްލާޙު ގެނައުމުގެ ބިލުގެ އިބްތިދާއީ ބަހުސް އެވެ.
