"ގެދޮރުވެރިޔާގެ ފައިނަލް ލިސްޓްކަމަށް ބަލާނީ 15 ނޮވެމްބަރު 2023 ގެ ލިސްޓަށް"
ދެން އަމަލު ކުރާނީ 15 ނޮވެމްބަރު 2023 ގެ ލިސްޓަށް
މިނިސްޓަރ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ ޑޮކްޓަރ ޢަބްދުﷲ މުއްޠަލިބް
ކުރީ ސަރުކާރުން ބޯހިޔާވަހިކަމަށް އެދި ހުށަހަޅާފައިވާ ފަރާތްތަކުގެ ތެރެއިން ގެދޮރުވެރިޔާގެ ފައިނަލް ލިސްޓްކަމަށް ބަލާނީ 15 ނޮވެމްބަރު 2023 ގެ ލިސްޓަށް ކަމަށް މިނިސްޓަރ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ ޑޮކްޓަރ ޢަބްދުﷲ މުއްޠަލިބް ވިދާޅުވެއްޖެއެވެ.
ގެދޮރުވެރިޔާ ސްކީމާއި ގުޅިގެން މައުލޫމާތި ހިއްސާ ކުރުމަށް ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މިނިސްޓަރ ވިދާޅުވީ އޮޅުވާލައިގެން ފްލެޓް ހޯދުމަށް އެދި ލިޔެކިޔުންތައް ހުށަހަޅާފައިވާ ކަމަށާއި އެހެންކަމުން މިހާރު މަސައްކަތް ކުރަމުންދަނީ ސެޕްޓެމްބަރު މަހުގެ ނިޔަލަށް ހުރިހާ ފަރާތްތަކަށް ބޯހިޔާވަހިކަން ފޯރުކޮށްދިނުމަށް މަސައްކަތްކުރަމުންދާ ކަމަށެވެ.
ކުރީ ސަރުކާރުން ގިނަ ފަރާތްތަކާއި އެކު އެގްރީމެންޓްތަކެއް ހަދާފައިވާ ކަމަށާއި ނަމަވެސް އެމަސައްކަތް ހުއްޓާލަން އޭސީސީން އޭރު އަންގާފައިވާއިރު، އެއް ސަފުހާއެއްގެ އެ އެގްރީމެންޓަކީ އެއްވެސް ޒަމާނެއްގައި ކޮށްފައިވާ ކަމެއް ނޫން ކަމަށާއި، ޒިންމާދާރު ކަމެއް ނެތި އެކަންކޮށްފައިވާކަން ފާހަގަކުރަމުން، މިނިސްޓަރ ވިދާޅުވީ މިހާރު މިސަރުކާރުން މަސައްކަތް ކުރަމުންދަނީ ރައީސް މުއިއްޒުގެ ވައުދާއި އެއްގޮތަށް ޝަރުތު ހަމަވާ ހުރިހާ ފަރާތްތަށް ފްލެޓް ލިބޭނެ މަސައްކަތް ކުރަމުންދާ ކަމަށެވެ.
މިހާރު މަސައްކަތް ކުރަމުންދަނީ ޝަރުތު ހަމަނުވާ ފަރާތްތަށް ބަލައި އެފަރާތްތައް އުނިކުރުމަށް ކަމަށާއި، ފައިނަލް ލިސްޓް ކަމަށް ބަލާނީ ފައިނަލް ލިސްޓް ކަމަށް ބެލުން ކަމަށާއި ދެން އަމަލު ކުރަނީ އެލިސްޓަށް ކަމަށްވެސް މިނިސްޓަރ މުއްތަލިބް ވިދާޅުވި އެވެ.
މިހާރު މަސައްކަތް ކުރަމުންދަނީ ނިމިފައިހުރި އެއްހާސް ފްލެޓަށް ފެނާއި ނަރުދަމާގެ އެޅުމުގެ މަސައްކަތް ކަމަށާއި އެމަސައްކަތް ޖުލައި މަހާއި ހަމައަށް ނިންމާލެވޭނެ ކަމަށް މިނިސްޓަރ ވިދާޅުވި އެވެ.
