އިންޑިއާ އިން އެގައުމުގެ ހަތުރުވެރި އަކަށް ނުވަތަ ވާދަވެރިއަކަށް ވެސް ދެކެނީ ޗައިނާ ކަމަށާއި، ޕާކިސްތާނާ މެދު ދެކެނީ ހައްލު ކުރަން ވެފައި އޮތް ސަލާމަތީ މައްސަލައެއްގެ ގޮތުގައި ކަމަށް އެމެރިކާ އިން ބުނެފި އެވެ.

މި މަހު މެދުތެރޭ އެމެރިކާގެ ދިފާޢީ ވުޒާރާގެ ޖާސޫސީ އިދާރާ ޑިފެންސް އިންޓެލިޖެންސް އެޖެންސީ (ޑީ.އައި.އޭ) އިން ނެރުނު ވޯލްޑް ވައިޑް ތްރެޓް އެސެސްމަންޓް ރިޕޯޓް ގައި ބުނީ އިންޑިއާގެ ވިސްނުން ހުރީ ޗައިނާ އާއި ވާދަކުރުމަށް އަޅަން ޖެހޭ ފިޔަވަޅުތައް އެޅުމަށް ކަމަށެވެ.

އެމެރިކާގެ ޤާނޫނު ހަދާ މަޖިލީހުގެ ހައުސް އޮފް ރެޕްރެޒެންޓޭޓިވްސްގެ ސަލާމަތީ ޚިދުމަތްތަކާ ބެހޭ ކޮމިޓީގެ އިންޓެލިޖެންސްއާ ބެހޭ ސަބް ކޮމިޓީ ގައި މި ރިޕޯޓާ ގުޅޭ ގޮތުން ޑީއައިއޭގެ ވެރިޔާ ލެފްޓިނަންޓް ޖެނެރަލް ޖެފްރީ ކްރޫޒް ވިދާޅުވީ، އިންޑިއާ އާއި ޗައިނާގެ ސަރަހައްދީ ރޮނގު ގައި ކޮންމެ ވަގުތަކު ވެސް ކުރިމަތިލުމެއް ހިނގައިފާނެ ކަމުގެ ނުރައްކާ އެބަ އޮތް ކަމަށެވެ.

ޕާކިސްތާނަކީ އިންޑިއާ އަށް އޮތް ނުރައްކަލަކަށް ވުރެ ބޮޑަށް، ސަލާމަތީ ތުރާލެއް ކަމަށް އިންޑިއާ އިން ދެކުނަސް، މި ރިޕޯޓު ބުނާ ގޮތުން ޕާކިސްތާނުން އިންޑިއާއާ މެދު ދެކެނީ އެގައުމު ދެމި އޮތުމަށް އޮތް ބިރެއް ކަމަށެވެ. އަދި ޕާކިސްތާނުން މަސައްކަތް ކުރަނީ އަދިވެސް އެގައުމުގެ ނިއުކްލިއަރ ހަތިޔާރުގެ ކޮށާރު އިތުރަށް ތަރައްޤީކޮށް މުއްސަނދި ކުރުމަށެވެ.

ޑީއައިއޭ އިން ދެކޭ ގޮތުގައި ޕާކިސްތާނުގެ އަސްކަރިއްޔާ ތަރައްޤީ ކުރުމަށް އެންމެ ބޮޑު އެހީތެރިކަމެއް ފޯރުކޮށްދެނީ ޗައިނާ އިންނެވެ. އަދި ޕާކިސްތާނުން އެމަސައްކަތަށް ބޭނުންވާ ސާމާނުގެ ބޮޑު ބައެއްވެސް ހޯދަނީ ޗައިނާ އިންނެވެ.

ޑީއައިއޭ ރިޕޯޓް ބުނާ ގޮތުން އިންޑިއާގެ ސަރުކާރުގެ ދިފާޢީ ސިޔާސަތުގެ މައިގަނޑު އަމާޒަކަށް ވާނީ ލީޑަރޝިޕް ދެއްކުމާއި، ޗައިނާއާ ވާދަކުރުމާއި، އިންޑިއާގެ އަމިއްލަ އަސްކަރީ ޤާބިލްކަން އިތުރު ކުރުމެވެ.

އިންޑިއާ އިން ސަރަހައްދީ ގައުމުތަކާއެކު އޮންނަ ގުޅުން ވަރުގަދަކޮށް، ޚާއްސަކޮށް އިންޑިއާ ކަނޑުގެ ޤައުމުތަކާއެކު އޮންނަ ގުޅުން ބަދަހި ކުރަމުންދަނީ މި ލީޑަރޝިޕް ދެއްކުމުގެ ސިޔާސަތުގެ ތެރެއިން ކަމަށް ޑީއައިއޭ ގެ ރިޕޯޓްގައިވެ އެވެ.