އަމިއްލައަށް މަންފާ ލިބޭ ގޮތަށް މި ސަރުކާރުގެ ގިނަ ބޭފުޅުން ގިނަ މަސައްކަތްތައް ކުރައްވާ: އާދިލް
25 މެއި 2025 | އާދީއްތަ 05:42ބޮޑު ސޯބު އެނބުރޭ ގޮތަށް ކުޑަ ސޯބުތައް އެނބުރޭނެ
ފަލަސުރުހީ ޕްރޮގްރާމްގައި ހެލްތު މިނިސްޓްރީގެ ކުރީގެ ސްޓޭޓް މިނިސްޓަރު އަހުމަދު އާދިލް ވާހަކަދައްކަވަނީ
ގައުމު ހިންގައި، ރައްޔިތުންނަށް ޚިދުމަތް ދިނުމުގެ ބަދަލުގައި، އަމިއްލައަށް މަންފާ ލިބޭ ގޮތަށް މި ސަރުކާރުގެ ގިނަ ބޭފުޅުން ގިނަ މަސައްކަތްތައް ކުރައްވާ ކަމަށް ހެލްތު މިނިސްޓްރީގެ ކުރީގެ ސްޓޭޓް މިނިސްޓަރު އަދި އެމްޑީޕީގެ ހެލްތް ކޮމެޓީގެ ޗެއަރ އަހުމަދު އާދިލް ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި އާދިލް ވިދާޅުވީ ގައުމުގެ ވަލިއްޔުލްއަމުރު މުތުލަގަށް ދޮގު ހައްދަވަން ފެށުމުގެ ނަތީޖާ ވަރަށް ހިތި ކަމަށާއި، މިހާރު މިސަރުކާރުގެ ހުރިހާ ވަޒީރު ބޭފުޅުން ވެސް ހައްދަވަމުންދަނީ ދޮގު ކަމަށެވެ.
ރާއްޖެ ތަރައްގީ ކުރުމުގެ ހާލަތަށް އިޝާރާތް ކުރައްވައި އާދިލް ވިދާޅުވީ ކަންކަން ކުރިއަށް ގެންދާ ގޮތް ވަޒީރު ބޭފުޅުންނަށް ވެސް އެނގިލައްވާ ކަމަށާއި، ރައްޔިތުންނާއި ގައުމުގެ މަސްލަހަތަށް ވުރެ އެބޭފުޅުންގެ އަމިއްލަ މަސްލަހަތު އިސްކުރައްވައި އެބޭފުޅުންނަށް ފައިދާވާ ގޮތަށް ހުރިހާ ކަމެއް ކުރައްވާ ކަމަށެވެ. އަދި އިތުރަށް ފައިސާކޮޅެއް ލިބޭނެ ގޮތެއް ބައްލަވާ ކަަމަށް އޭނާ ވިދާޅުވިއެވެ.
އާދިލް ވިދާޅުވީ ބޮޑު ސޯބު އެނބުރޭ ގޮތަށް ކުޑަ ސޯބުތައް އެނބުރޭނެ ކަމަށާއި، ކުންފުނިތަކުގައި ހުންނަ ދަގަނޑުތައް ވިއްކުމުގައި ވެސް ސުޕަވައިޒަރުގެ ލެވަލްގެ ބޭފުޅުން ވެސް، އެބޭފުޅުންގެ ބެލުމުގެ ދަށުން ދަގަނޑުތައް ވިއްކުމަށް މަސައްކަތް ކުރާ ކަމަށެވެ.
ސަރުކާރުގެ ތެރޭގައި ތިއްބެވި ބޭފުޅުން ބަލަނީ ކިހިނެތްތޯ އެބޭފުޅުންނަށް އިތުރު ލާރިއެއް ލިބޭނެ ކޮޅަކީ. އެވަރިހަމަ އެޗްޑީސީގައި ހުރި ދަގަނޑުކޮޅެއް ވިޔަސް، އެޗްޑީސީ ހުންނަ ސުޕްވައިޒަރު ވެސް ބަލައި އޭނަގެ ބެލުމުގެ ދަށުން ދަގަނޑުކޮޅު ވެސް ވިއްކާލެވޭތޯ. އެހެންތާ ވާނީ. ބޮޑު ސޯބު އެނބުރޭ ގޮތަަކަށް ކުޑަ ސޯބުތައް އެނބުރޭ ބުނާބީދައިން އެމީހުންނަށް އެބަ އިނގޭ މިކަން މިކުރަމުން ދަނީ މިހެންކަން. ބައިވަރު ކަންތައް މިދަނީ ހިންގަމުން. މިގައުމު ފާލަމުން ނެއްޓިފައި މިއޮތީ. ފާލަން އެޅުވެން އަންނަނީ ރައީސް މުއިއްޒު ނޫން ބޭފުޅަކު ވެރިކަމަށް ވަޑައިގަންނަވާގެން. މިއަދު ފެންނަން ހުރީ މިއަދުގެ ނައިބު ރައީސް.ހެލްތު މިނިސްޓްރީގެ ކުރީގެ ސްޓޭޓް މިނިސްޓަރު އަދި އެމްޑީޕީގެ ހެލްތް ކޮމެޓީގެ ޗެއަރ އަހުމަދު އާދިލް
އާދިލް ވިދާޅުވީ މިސަރުކާރާ މެދު މި ސަރުކާރުގެ ވަޒީރު ބޭފުޅުން ވެސް ހިތްހަމަ ނުޖެހޭ ކަމަށާއި، ރައީސް މުއިއްޒާ ދެކޮޅަށް އެބޭފުޅުން ވާހަކަ ދައްކަވާ ކަމަށެވެ. އަދި ރައްޔިތުންނަށް ޚިދުމަތް ކުރަން ބޭނުންވި ނަމަވެސް ހުރިހާ ކަމެއްގައި ރައީސް މުއިއްޒު ގޮތް ނިންމަވާތީ، ކަންކަން ރަނގަޅަށް ނުދާ ކަމަށް ވަޒީރުން ވިދާޅުވާ ކަމަށެވެ.
ރައީސް މުއިއްޒާއެކު، ރައްޔިތުންނަށް ރަނގަޅު ޚިދުމަތެއް ދެވި، ރައްޔިތުން އެދޭ ތަރައްގީ ގައުމަށް ނުގެނެވޭނެ އާދިލް ވިދާޅުވިއެވެ.
