ދިވެހިރާއްޖޭގެ ކުޅިވަރުގެ ޤާނޫނަށް ގެނެވުނު އެއް ވަނަ އިސްލާހުގެ ދަށުން ވުޖޫދުވެގެން އަންނަ ކުޅިވަރު ފަންޑާ އެކު، ދިވެހި އެތުލީޓުންނަށް އިތުރު ތަމްރީނުތައް ލިބިގެން ދާނެ ކަމަށް ކުޅިވަރާއި، ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެ އެވެ.

ވަޒީރު ވިދާޅުވީ ލާމަރުކަޒީކޮށް ކުޅިވަރު ކުރިއެރުވުމަށް މަސައްކަތް ކުރާއިރު، ރަށް ރަށުގައި ތިބި ހުނަރުވެރި ކުޅުންތެރިން ދެނެގަނެ، އެ ކުދިންނަށް އިންވެސްޓު ކުރުމަކީ އެންމެ މުހިންމު އެއް ކަންތައް ކަމަށެވެ.

އެގޮތުން އެލީޓު އެތުލީޓުން ބިނާކޮށްގެން، އެ ކުދިންނަށް އިންވެސްޓު ކުރާނެ ގޮތެއް ހޯދައި ދިނުމަކީ އެންމެ މުހިންމު ކަންތައް ކަމުގައި ވަޒީރު ވިދާޅުވެފައިވެ އެވެ.

މި ހުރިހާ ކަމަކީ ދައުލަތުގެ ބަޖެޓުން ކުޅިވަރު ވުޒާރާ އަށް ހަމަޖައްސާފައި އޮންނަ ބަޖެޓުން އެކަނި ކުރެވޭނެ ކަމެއް ނޫންކަން ފާހަގަ ކުރައްވައި ވަޒީރު ވިދާޅުވީ، ކުޅިވަރު ފަންޑެއް ހެދުމުގެ އެންމެ ބޮޑު ބޭނުމަކީ، އެ ފައިނޭންސް ފޯކަސް ގޮތެއްގައި ޚަރަދު ކުރުން ކަމަށެވެ.

އޭގެ ތެރޭގައި މޮޅެތި ކޯޗުން ތަމްރީނު ކުރުމާއި، އަދި ބޭރުން ކޯޗުން ގެނައުން ވެސް ހިމެނެ އެވެ. އަދި މޮޅެތި އެތުލީޓުންނަށް އިންވެސްޓުކޮށް، އެ ކުދިން ރާއްޖެ އިން ބޭރަށް ފޮނުވައިގެން ތަމްރީނު ދިނުމާއި، މޮޅެތި ކޯޗުން ގެނެެސްގެން ރާއްޖޭގައި ތަމްރީނުތައް ދިނުން ވެސް ހިމެނެ އެވެ.

ހަމަ އެހެންމެ، އެ އެތުލީޓުންގެ ތަމްރީނުތަކަށް ބޭނުންވާ ޚާއްސަ ވަސީލަތްތައް ޤާއިމު ކުރުން ވެސް ހިމެނޭނެ އެވެ. އެހެންކަމުން ކުޅިވަރު ފަންޑުގެ ތެރެއިން ކުރެވޭ އެންމެ މުހިންމު ކަންތައްތަކުގެ ތެރޭގައި މި ކަންކަން ހިމެނިގެން ދާނެ ކަމުގައި ވަޒީރު ރާފިޢު ވަނީ ވިދާޅުވެފަ އެވެ.

މީގެ އިތުރުން ވަޒީރު ވިދާޅުވީ އެކަހަލަ ފަންޑެއް ހޯދުމަކީ އޭގެ ފައިދާ ވަރަށް ފުޅާ ދާއިރާއެއްގައި ކުރާނެ ކަމެއް ކަމަށެވެ. ޚާއްސަކޮށް ދިވެހި އެތުލީޓުންނަށް ބޭނުންވާ އިތުރު ތަމްރީނުތައް ދީ، އެތުލީޓުން ކުރި އެރުވުމަށް ގިނަ މަސައްކަތްތަކެއް ކުރެވޭނެ ކަމަށް ވަޒީރު ޤަބޫލު ކުރައްވަ އެވެ.