މި ސަރުކާރުގެ އަނިޔާވެރިކަން ފެންނަމުންދާ ގޮތުން 2028ގެ ރިޔާސީ އިންތިޚާބު ބާއްވާނެ ކަމާއި މެދު ސުވާލު އުފެދޭ ކަމަށް އެމްޑީޕީގެ ކުރީގެ ރައީސް އިބްރާހިމް ދީދީ ވިދާޅުވެއްޖެއެވެ.

އޭނާ އެފަދައިން ވިދާޅުވީ ހުކުރު ދުވަހުގެ ރޭ ކުރިއަށް ދިޔަ އެމްޑީޕީގެ މަގުމަތީ ހަރަކާތުގައި ވާހަކަދައްކަވަމުންނެވެ. މޯލްޑިވްސް ޑިމޮކްރެޓިކް ޕާޓީ (އެމްޑީޕީ)އިން ކުއްލި ހަރަކާތް ހުކުރު ދުވަހުގެ ރޭ ބޭއްވުމަށް ތައްޔާރުވަމުން ދަނިކޮށް ހަރުގެއިން ކަރަންޓް ކެނޑުނު މައްސަލަ އަކީ ވެސް ގަސްތުގައި ބަޔަކު ކުރިކަމެއް ކަމަށް އޭނާ ވަނީ ސިފަކުރައްވާފައެވެ. ހަރުގެއިން ކަރަންޓު ކެނޑިފައިވަނީ ހަރުގެއަށް ކަރަންޓު ދީފައިވާ ފޮށީގެ 2 ނަރު ބުރިކޮށްލާފައިވާތީއެވެ. އެއީ ރާވައިގެން ކުރި ކަމެއް ކަމަށާއި މަގުމަތިން ނޫން ގޮތަކަށް އާއްމުންނަށް ދެން ހައްގެއް ނުލިބޭނެ ކަމަށް ދީދީ ވަނީ ވިދާޅުވެފައެވެ.

މިއަދުގެ ސަރުކާރަކީ ކޮރަޕްޝަނާއި ވައްކަމަށް ފުރިހަމަ އަށް ތާއީދުކުރާ ސަރުކާރެއްކަން އަމަލުން ދަނީ ދައްކަމުން ކަަމަށް އޭނާ ވަނީ ވިދާޅުވެފައެވެ. އެގޮތުން މަޖިލީހުގެ ބާރުތައް ރައީސްގެ އަތްޕުޅަށް ނަންގަވާ މެމްބަރުން އަޅުވެތިކޮށްފައިވާ ކަމަށް އޭނާ ވިދާޅުވިއެވެ. ޖުޑީޝަރީ ޕެރަލައިޒްކޮށް ޝަރުއީ ދާއިރާ އަށް ވެސް އަނިޔާވެރިވަމުންދާ މަންޒަރު ފެންނަ ކަމަށް އޭނާ ވަނީ ވިދާޅުވެފައެވެ.

ކަންކަން ރަނގަޅަށް ކުރުމަށް މި ސަރުކާރަށް ވަރަށް ގިނަ ވަގުތު ދީފައިވާނެ ކަމަށާއި ރައްޔިތުންގެ ކަންބޮޑުވުންތަކަށް ހައްލު ހޯދާދޭން ސަރުކާރުން މަސައްކަތް ކުރާ މަންޒަރު ނުފެންނަ ކަމަށް އޭނާ ވަނީ ވިދާޅުވެފައެެވެ. އެގޮތުން ސަރުކާރަށް އެތައް ދުވަހެއް ވީ އިރު ވެސް ރައްޔިތުންގެ ބޯހިޔާވަހިކަން ކަށަވަރުކުރެވޭނެ މަގެއް ހޯދާ ނުދެވޭ ކަމަށް އޭނާ ވިދާޅުވިއެވެ. އަދިި މަސްވެރިންނާއި، ރާއްޖެއިން ބޭރުގައި ކިޔަވާ ދަރިވަރުން ވެސް ތިބީ ހާސްކަމެއްގައި ކަމަށް އޭނާ ވިދާޅުވިއެވެ.