ސްޕްރީމް ކޯޓުގެ ދެ ފަނޑިޔާރުން ވަކިކުރި ދުވަހު އަދުލަށް ވޯޓު ދެއްވި ފަނޑިޔާރު ނިޔާޒް އާއި ގާޒީ ފަރުހާދުގެ ދިފާއުގައި އެމްޑީޕީން ތެދުވަން ޖެހޭ: ޝަމްހީދު
ސްޕްރީމް ކޯޓުގެ ދެ ފަނޑިޔާރުން ވަކިކުރި ދުވަހު އެ ދެ ފަނޑިޔާރުންގެ ދިފާއުގައި އަދުލު އިންސާފަށް ވޯޓު ދެއްވި ދެ ބޭފުޅުން، ފަނޑިޔާރު މުހައްމަދު ނިޔާޒާއި، ސިވިލް ކޯޓު ގާޒީ ފަރުހާދު ރަޝީދުގެ ހައްޤުގައި އެމްޑީޕީން ތެދުވަން ޖެހޭ
އެމްޑީޕީ ހަރުގެ ޖަލްސާގައި ޝަމްހީދު ވާހަދައްކަވަނީ
ސްޕްރީމް ކޯޓުގެ ދެ ފަނޑިޔާރުން ކަމުގައިވާ ޑރ. އަޒްމިރާލްދާ ޒާހިރާއި މަހާޒް އަލީ ޒާހިރު ފަނޑިޔާރުކަމުގެ މަޤާމުން ވަކިކުރި ދުވަހު އެ ދެ ފަނޑިޔާރުންގެ ދިފާއުގައި އަދުލު އިންސާފަށް ވޯޓު ދެއްވި ދެ ބޭފުޅުންކަމުގައިވާ ހައިކޯޓު ފަނޑިޔާރު މުހައްމަދު ނިޔާޒާއި، ސިވިލް ކޯޓު ގާޒީ ފަރުހާދު ރަޝީދުގެ ހައްޤުގައި އިދިކޮޅު މައި ޕާޓީ އެމްޑީޕީން ތެދުވަން ޖެހޭ ކަމަށް ހުޅުމާލޭ ދެކުނު ދާއިރާގެ މެމްބަރު ޑރ.އަހްމަދު ޝަމްހީދު ވިދާޅުވެއްޖެއެވެ.
ބުރާސްފަތި ދުވަހުގެ ރޭ އެމްޑީޕީގެ ހަރުގެ ޖަލްސާގައިވާހަކަ ދައްކަވަމުން ޝަމްހީދު ވިދާޅުވީ އެމްޑީޕީ އުފެދުމުގެ އަސްލަކީވެސް ރާއްޖޭގައި އަދުލުއިންސާފު ޤާއިމް ކުރުން ކަމަށެވެ.
އޭނާ ވިދާޅުވީ މި މަހުގެ 14 އަދި 15 ވަނަ ދުވަހު މަޖިލީހުގައި ދެ ވޯޓެއް ނެގިގެން ދިއަ ކަމަށާއި އެ ދެ ވޯޓާއިވެސް ގުޅިފައިވަނީ ފޯންކޯލަކާއި ކަމަށެވެ.
14 ވަނަ ދުވަހު ދެ ފަނޑިޔާރުން ވަކިކުރަން ޖޭއެސްސީން، މަޖިލީހުގެ ކޮމިޓީން ފާސްވެގެން އައީވެސް ހަމަ ފޯނު ކޯލެއްގެ މައްސަލާގައި ކަމަށާއި އެ ފޯން ކޯލުގެ މައްސަލާގައި ސްޕްރީމް ކޯޓުގެ ދެ ފަނޑިޔާރުން ވަކިކުރީކަމަށް ޝަމްހީދު ވިދާޅުވިއެވެ.
އަދި ޖެހިގެން އައި 15 ވަނަ ދުވަހު މަޖިލީހުގައި ވަޒީރަކު ކޮމިޝަނަރ އޮފް ޕޮލިސްއަށް ގުޅުއްވި ކަމަށް އެއްބަސްވެފައިވާ ކަމަށާއި ނަމަވެސް އެއީ ނުފޫޒަކަށް ނުވި ކަމަށެވެ. ނަމަވެސް ފަނޑިޔާރަކު ކަމާއި ނުބެހޭ އެހެން މީހަކަށް ގުޅި ކޯލް އެއީ ނުފޫޒުފޯރުވިކަމަށް ބަލައި ދެ ފަނޑިޔާރުން ފަނޑިޔާރުކަމުން ވަކިކޮށްފައި ވާކަމަށް އޭނާ ވިދާޅުވިއެވެ.
ދެ ފަނޑިޔާރުން ވަކިކުރުމުގެ ޕްރޮސެއްގެ ތެރޭގައި ޖޭއެސްސީގައި ބައިވެރިވި އެކަމާއި ދެކޮޅުހެދި ތިބީ ދެ ފަނޑިޔާރުން ކަމަށާއި އެއީ މުހައްމަދު ނިޔާޒާއި، ފަރުހާދު ރަޝީދުކަމަށެވެ. އަދި އެއީ އެ ދެ ބޭފުޅުން ވެލެއްވި ވަރުގަދަ ޖިހާދެއް ކަމަށާއި އެކަން ފާހަގަކޮށް، އެ ދެ ބޭފުޅުންގެ ދިފާއުގައި އެމްޑީޕީން ތެދުވަން ޖެހޭ ކަމަށް ޝަމްހީދު ވިދާޅުވިއެވެ.
އަޅުގަނޑަށް ޚަބަރުގަ އޮއްވާ މި ފެނުނީ ދެ ފަނޑިޔާރުން (އަޒްމިރާލްދާ އަދި މަހާޒް) ވަކިކުރުމުގެ ތެރޭގައި ޖޭއެސްސީގައި ނެގުނު ވޯޓުގައި ބައިވެރިވި ދެ ފަނޑިޔާރުން، އެކަމާ ދެކޮޅުހެދި ދެ ފަނޑިޔާރުން ތިބީ، އަޅުގަނޑުމެން ބަލައިގަންނަ އެބަޖެހޭ އެ ދެ ފަނޑިޔާރުން، އަޅުގަނޑު ހަނދާން ވަނީ ނިޔާޒު އާއި ފަރުހާދު ކިޔާ ދެބޭފުޅުން. މި ދެ ފަނޑިޔާރުން އެދުވަހު އަދުލަށް ވޯޓުދިނީ. 14 ވަނަ ދުވަހު ދެ ފަނޑިޔާރުން ވަކިކުރުމަށް ފަހު 19 ވަނަ ދުވަހު ފަށައިފި މި ދެ ފަނޑިޔާރުން ވަކިކުރުމުގެ ޕްރޮސެސް.ހުޅުމާލޭ ދެކުނު ދާއިރާގެ މެމްބަރު ޑރ.އަހްމަދު ޝަމްހީދު
ހައިކޯޓު ފަނޑިޔާރު ނިޔާޒާއި، ސިވިލް ކޯޓު ގާޒީ ފަރުހާދުގެ މައްސަލައެއް ތަހުގީގު ކުރަން ފަށާފައިވަނީ، ސުޕްރީމް ކޯޓުގެ ފަނޑިޔާރު އަޒްމިރަލްދާ ޒާހިރު އާއި މަހާޒް އަލީ ޒާހިރުގެ މައްސަލަ ޖޭއެސްސީން ތަހުގީގު ކުރިއިރު އެކޮމެޓީގައި، މިމައްސަލައާ ދެކޮޅަށް ދެބޭފުޅުން ވާހަކަދައްކަވައި، ވަކި ކުރެއްވުމާ ދެކޮޅަށް ވޯޓު ދެއްވުމާ ގުޅިގެން ކަމަށް މައުލޫމާތު ދީފައިވެއެވެ.
ޖޭއެސްސީގެ ޕޮލިސީ އޮންނަ ގޮތުން ތަހުގީގު ކުރަމުންދާ މައްސަލަތަކުގެ މައުލޫމާތު ހާމައެއް ނުކުރެއެވެ. އަދި ސުލޫކީ މައްސަލައެއް ސާބިތުވެއްޖެނަމަ އެކަން ހާމަކުރާނެ ކަމަށް އެކޮމިޝަނުން ބުނެއެވެ.
ޖޭއެސްސީގެ މެންބަރުކަމަށް ފަނޑިޔާރު ނިޔާޒް އައްޔަން ކުރައްވާފައިވަނީ 11 މެއި 2022 ގައެވެ. އަދި ސިވިލް ކޯޓު ގާޒީ ފަރުހާދު އެ ކޮމިޝަންގެ މެންބަރު ކަމަށް އައްޔަން ކުރައްވާފައިވަނީ 8 ސެޕްޓެންބަރު 2024 ގައެވެ.
