ލާމަރުކަޒީ ޤާނޫނަށް ސަރުކާރުން ބޮޑެތި ބަދަލުތަކެއް ގެނައުމަކީ ރައްޔިތުންނަށް "ދޯކާ" ދިނުން - ނާޒިލް
ރައީސް ޑރ.މުހައްމަދު މުއިއްޒުގެ ވިސްނުންފުޅަކީ ރައްޔިތުންގެ ކައިރީގައި ދޮގު ހަދާ ރައްޔިތުންނަށް ދޯކާ ދީގެން ކަންކަން ކުރުން ކަމަށް ވެސް ނާޒިލް ވަނީ ވިދާޅުވެފަ
މި ސަރުކާރު ޖަވާބުދާރީ ކުރުމަށް ރައްޔިތުން ނުކުމެ، ރައްޔިތުންގެ ބާރު ބޭނުންކުރަން ޖެހޭ: މެންބަރު ނާޒިލް
ލާމަރުކަޒީ ޤާނޫނަށް ސަރުކާރުން ބޮޑެތި ބަދަލުތަކެއް ގެނައުމަކީ ރައްޔިތުންނަށް "ދޯކާ" ދީ އޮޅުވާލުން ކަމަށް ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ މެމްބަރު އިބްރާހިމް ނާޒިލް ވިދާޅުވެއްޖެއެވެ.
އޭނާ އެފަދައިން ވިދާޅުވީ އެމްޑީޕީގެ ހަރުގެ ޖަލްސާގައި ވާހަކަދައްކަވަމުންނެވެ.
ކައުންސިލްތަކުގެ ބާރު މާލޭގެ އިދާރާ އަކަށް ބަދަލުވަމުންދާ މަންޒަރު ވަރަށް ސާފުކޮށް ފެނިގެންދާ ކަމަށް ނާޒިލް ވަނީ ވިދާޅުވެފައެވެ. އަންނަ އަހަރު އޮންނަ ކައުންސިލް އިންތިހާބުގެ ކުރިން އިތުރު ބައި-އިލެކްޝަނެއް ދެން މިއޮތް މުއްދަތުގައި ނުބާއްވާ ގޮތަށް ލާމަރުކަޒީ ގާނޫނަށް ސަރުކާރުގެ ފަރާތުން ހުށަހެޅި އިސްލާހު ފާސްކުރީ ދަންވަރު ކޮމިޓީ ބާއްވައިގެންކަން ފާހަގަކުރައްވާ ނާޒިލް ވަނީ އެކަމަށް ވަރަށް ބޮޑަށް ފާޑު ވިދާޅުވެފައެވެ. އަދި އެ ބިލު މަޖިލީހުން ފާސްކުރީ ގޮނޑި ހުސްވާއިރު ދޮޅު އަހަރު އޮތް ނަމަ ބައި އިލެކްޝަން ނުބާއްވާ ގޮތަށް ހަމަޖެއްސުމަށް ކަމަށާއި އެއީ ވަރަށް ބޮޑަށް ކަންބޮޑުވާ ކަމެއް ކަމަށް ނާޒިލް ވިދާޅުވިއެވެ.
ރައްޔިތުންގެ ބަހެއް ނާހާ. އެންމެ ބޮޑަށް ރައްޔިތުންގެ ރިޕްރެޒެންޓޭޝަން ކަނޑުވާލާ ގޮތަށް މި އަމަލުކުރަނީ. ރައްޔިތުންގެ ބަހެއް ނާހާ. އުޅުއްވަނީ އޮޅުވާލައިގެން ކަންކަން ކުރަން. ރައްޔިތުންނަށް މިކަން ސާފުވާން ޖެހޭ.މަޖިލީހުގެ ހިތަދޫ ދެކުނު ދާއިރާގެ މެމްބަރު އިބްރާހިމް ނާޒިލް
ރައީސް ޑރ.މުހައްމަދު މުއިއްޒުގެ ވިސްނުންފުޅަކީ ރައްޔިތުންގެ ކައިރީގައި ދޮގު ހަދާ ރައްޔިތުންނަށް ދޯކާ ދީގެން ކަންކަން ކުރުން ކަމަށް ވެސް ނާޒިލް ވަނީ ވިދާޅުވެފައެވެ. އަދި ކުރިއަށް އޮތް ކައުންސިލް އިންތިޚާބާއި ދިމާކޮށް ސަރުކާރުގެ ވިސްނުމަކީ ރައްޔިތުން އޮޅުވާލުމެއްގެ ތެރޭގައި ބޭއްވުން ކަމަށް ނާޒިލް ވިދާޅުވިއެވެ. ނާޒިލް ވަނީ ކައުންސިލްތަކުގެ ބައި އިލެކްޝަން ބާއްވާ ގޮތަށް ބަދަލު ގެނައީ ކައުންސިލްތަކުގެ ބަހެއް ހޯދުމަކާއި ނުލާ ކަމަށް އޭނާ ވިދާޅުވިއެވެ.
ކައުންސިލަރުންގެ ދައުރުގެ ބާކީ ދޮޅު އަހަރަށް ވުރެ ކުރު މުއްދަތެއް އޮތް ނަމަ، ހުސްވާ މަގާމުތަކަށް ބައި-އިލެކްޝަން ބާއްވަން ނުޖެހޭ ގޮތަށް ލާމަރުކަޒީ ގާނޫނަށް އިސްލާހު ސަރުކާރުގެ ފަރާތުން ހުށަހެޅުއްވީ ހޯރަފުށި ދާއިރާގެ ޕީއެންސީ މެންބަރު އަލީ މޫސާ އެވެ. އެ ޤާނޫނު ފާސްކުރީ މެމްބަރުންގެ ކަންބޮޑުވުންތަކަށް ބެލުމެއް ނެތިއެވެ.
