ކުންފުނިތަކަށް ދޫކުރަންޖެހޭ 8 ބިލިއަން ރުފިޔާ ދޫނުކޮށް ހިފަހައްޓާފައިވާއިރު، މީރާ ހިންގުމަށް ދަނީ ދަތިކުރަމުން: މޭޔަރު އާޒިމް
23 މެއި 2025 | ހުކުރު 07:16މި ސަރުކާރަކީ ރައްޔިތުންނަށް ފައިދާވާނެ ގޮތަށް މާދަމާއަށް ވިސްނައިގެން މަސައްކަތް ކުރާ ސަރުކާރެއް ނޫން
މޯލްޑިވްސް އިންލަންޑް ރެވެނިއު އޮތޯރިޓީ (މީރާ)
ދިވެހި ސަރުކާރުން ރައްޔިތުންގެ އެކިއެކި ކުންފުނިތަކަށް ދޫކުރަންޖެހޭ 8 ބިލިއަން ރުފިޔާ ދޫނުކޮށް ހިފަހައްޓާފައިވާ ކަމަށާއި، މޯލްޑިވްސް އިންލަންޑް ރެވެނިއު އޮތޯރިޓީ (މީރާ) ހިންގުމަށް ދަތިކުރާ ކަމަށް މާލެސިޓީގެ މޭޔަރު އާދަމް އާޒިމް ވިދާޅުވެއްޖެއެވެ.
ރާއްޖެޓީވީގެ ޓީވީޓޯކް ޕްރޮގްރާމްގައި މޭޔަރު އާޒިމް ވިދާޅުވީ ރައީސް ޑރ. މުހައްމަދު މުއިއްޒު ސަރުކާރުގެ ވިސްނުމަކީ ލިބޭ ހާ އެއްޗެއް އިސްރާފަށް ދުއްވާލުން ކަމަށާއި، އެއްވެސް ގޮތަކަށް ލިބޭ އެއްޗަކަށް ހަރަދުކުރާ ސަރުކާރެއް ނޫން ކަމަށެވެ. އަދި ލިބޭ އެއްޗަކަށް ވެސް ނުބަލާ ކަމަށާއި، ބެލުމެއް ނެތި ލޯނު ވެސް ނަގަމުންދާ ކަމަށް މޭޔަރު އާޒިމް ވިދާޅުވިއެވެ.
އެމްޑީޕީ ސަރުކާރުގައި ދިވެހި ހުރިހާ ރައްޔިތުންނަށް ދާއިމީ ގޮތެއްގައި ފައިދާވާނެ ގޮތަށް ގިނަ ޚިދުމަތްތައް ތައާރަފްކޮށް، މަޝްރޫއުތައް ހިންގާފައިވާކަން ފާހަގަކުރައްވައި މޭޔަރު އާޒިމް ވިދާޅުވީ މިސަރުކާރުގައި މަސައްކަތް ކުރަނީ އެއުސޫލާ އިދިކޮޅަށް ކަމަށެވެ. މި ސަރުކާރަކީ ރައްޔިތުންނަށް ފައިދާވާނެ ގޮތަށް މާދަމާއަށް ވިސްނައިގެން މަސައްކަތް ކުރާ ސަރުކާރެއް ނޫން ކަމަށާއި، އެކަން ގައުމުން ފެންނަމުންދާ ކަމަށެވެ.
މީގެ އިތުރުން މޭޔަރު އާޒިމް ވިދާޅުވީ ރައްޔިތުންގެ އެކިއެކި ކުންފުނިތަކަށް ސަރުުކާރުން ދޫކުރަން ޖެހޭ 8 ބިލިއަން ރުފިޔާ އަދިވެސް ދޫކޮށްފައިނުވާ ކަމަށާއި، އެފައިސާ ހިފަހައްޓާފައިވާ ކަމަށެވެ. އަދި ކުންފުނިތައް ނުހިންގޭ ހިސާބަށް ގޮސްފައިވާ ކަމަށް އޭނާ ވިދާޅުވިއެވެ.
އަޅުގަނޑުމެންނަށް އެނގިފައި އޮތީ 8 ބިލިއަން ރުފިޔާ އެބަހުރި ދިވެހި ރައްޔިތުންނަށް އެކިއެކި ކުންފުނިތަކަށް ދިވެހި ސަރުކާރުން ނުދީ 8 ބިލިއަން. އެހެންވީމަ މި ކުންފުނިތައް ބަގުރޫޓުވެ ހަލާކު ވެގެން މިއޮށްދަނީ. އެމީހުންނަށް މަސައްކަތް ނުކުރެވިގެން އެމީހުން ބޭންކުން އެތިކޮޅެއް ނަގަނީ. ބޭންކަށް ފައިސާ ނުދެއްކިގެން. މުޅި ގައުމު ބަގުރޫޓުވާ ހިސާބަށް މިއޮތް ދަނީ. ސަރ ޕްލަސް އެންމެ ލާރިއެއް އިނަސް އެމީހުންނަށް އެލާރި ބަހާލަން އެބަ ޖެހޭ. އަވަހަށް ދޭން އެބަ ޖެހޭ. އޭރުންތާ ކުންފުނިތައް އަނެއްކާ ވެސް ކޮޅަށް ޖެހޭނީ. ވަރަށް ހާލުގައި ހުރިހާ އެންމެން ވެސް ތިބީ.މާލެސިޓީގެ މޭޔަރު އާދަމް އާޒިމް
މޭޔަރު އާޒިމް ވިދާޅުވީ މި ސަރުކާރުގެ ބޭފުޅުންގެ ޑިވަލޮޕްމެންޓްގެ ވިސްނުމެއް ނެތް ކަމަށާއި، ރައްޔިތުންގެ ފައިސާ އިސްރާފު ކުރުން ނޫން ކަމެއް މިބޭފުޅުން ނުކުރައްވާ ކަމަށެވެ. އަދި ވިދާޅުވީ މީރާއަށް ވެސް ނުފޫޒު ފޯރުވައި، ހިންގުމަށް ދަތިކުރަމުންދާ ކަމަށެވެ.
އަޅުގަނޑުމެންނަށް ފާހަގަކުރެވޭ މީރާގެ ކަންތައްތަކަށް އަތް ބާނައިގެން މީރާ ވެސް ހިންގިޔަސް ނުދޭން އުޅެނީ. ހުރިހާ ގޮތަކުން ވެސް އެއްކަލަ ގައުމު ހަމަ ހަލާކަށްދާ ގޮތަށް އެމީހުންނަށް ކަންތައް ވަނީ. އިދާރީ ގޮތުން ކަން ކުރަން ނުވެސް އެނގެނީ ނޫނީ ހަމަ ގަސްތުގައި ގައުމު ފަނާ ކޮށްލަނީ. 18 ބިލިއަން ރުފިޔާ އެބަހުރި ކަމަށް ވަނީ މީރާއަށް ކަލެކްޓް ކުރަން ޖެހޭ އަޅުގަނޑުމެންނަށް މައުލޫމާތު ލިބޭ ގޮތުން ވެއްޖެއްޔާ. ޓެކްސްގެ ގޮތުގައި ވަކި އަދަދެއް. އެމީހުންނަށް ވެސް މިކަލެޓް ކުރެވޭނެ ގޮތެއް އެމީހުންގެ ވެސް ހަތަރެއްފައި ބަދެފައިހުރި ކަމަށް އަޅުގަނޑުމެންނަށް މައުލޫމާތު ލިބެނީ. މިއީ ގައުމެއް ހަލާކުކޮށްލުން ސީދީ. މިއީ ގައުމެއް ތަރައްގީ ކުރުމެއް ނޫން.މާލެސިޓީގެ މޭޔަރު އާދަމް އާޒިމް
މޭޔަރު އާޒިމް ވިދާޅުވީ މިސަރުކާރަށް ދިވެހި ރައްޔިތުން އިތުބާރު ނުކުރާ ކަމަށެވެ.
ރައީސް މުއިއްޒު ވިދާޅުވީ ރައީސް ޑރ.މުހައްމަދު މުއިއްޒު ދައްކަވާ ވާހަކަފުޅުތަކުން އެމަނިކުފާނު އައްޔަން ކުރައްވާފައި ތިއްބަވާ ބޭފުޅުން އެމަނިކުފާނުގެ އަމުރަށް ބޯނުލަބާކަން ހާމަވެފައިވާ ކަމަށެވެ. އެއީ ބައެއް މައުލޫމާތުތައް ދިނުމަށް އެދުމުން ވެސް އެބޭފުޅުން އެ މައުލޫމާތުތައް ހިއްސާނުކުރައްވާ ކަމަށް ރައީސް މުއިއްޒު އަމިއްލަފުޅަށް ނޫސްވެރިންގެ ބައްދަލުވުމުގައި ވިދާޅުވެފައިވާ ކަމަށް އޭނާ ވިދާޅުވިއެވެ.
