ޤާނޫނަށް ގެނެވުނު އިސްލާހުގެ ސަބަބުން، އެސޯސިއޭޝަންތައް ހަރުދަނާ ކުރެވޭނެ: ވަޒީރު ރާފިޢު

ކުޅިވަރުގެ ޤާނޫނަށް އެއް ވަނަ އިސްލާހު ގެނައުމުގެ ބިލު ތަސްދީޤު ކުރެވިގެން ދިޔުމާއެކު، ކުޅިވަރު އެސޯސިއޭޝަންތައް އިތުރަށް ޚަރުދަނާ ވެގެން ދާނެ ކަމަށް، ކުޅިވަރާއި ހަށިހެޔޮަކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެ އެވެ.

ވަޒީރު ވިދާޅުވީ މިހާރު ކުރިމަތިވެފައި އޮތް އެންމެ ބޮޑު ގޮންޖެހުމަކީ، ރާއްޖޭގެ ކުޅިވަރު އެސޯސިއޭޝަންތަކަށް ދޭތެރެއިން އަންނަ ހިތްހަމަ ނުޖެހޭ ޙާލަތު ކަމަށެވެ.

ވަޒީރު ވިދާޅުވީ ކުޅިވަރު އެސޯސިއޭޝަނެއް ނޯމަލައިޒް ކުރަން ޖެހުނު ނަމަވެސް، ނުވަތަ ސަސްޕެންޝަކާ ހަމައަށް ދާން ޖެހުނު ނަމަވެސް، އެއީ އެސޯސިއޭޝަނަކަށް ދިމާވާނެ އެންމެ ހިތްދަތި ކަންތައް ކަމަށެވެ. އަދި ކުޅިވަރަށް ވެސް ދިމާވާނެ އެންމެ ހިތްދަތިކަން ކަމުގައި ވަޒީރު ވިދާޅުވި އެވެ.

އިތުރަށް ވަޒީރު ވިދާޅުވީ އެކަންކަން ރަނގަޅު ކުރުމަށްޓަކައި، އިސްލާހު ގެނެވުނު ކުޅިވަރު ޤާނޫނުގެ ދަށުން ފުށޫ ނާރާނެހެން، ޤާނޫނުތައް އަދި ޤަވާއިދުތައް ވެސް ހެދިގެން ދާނެ ކަމަށެވެ. އަދި އެ ޤަވާއިދުތަކާ އެއް ގޮތަށް އެސޯސިއޭޝަންތައް ހިންގުން ޚަރުދަނާ ކުރެވިގެން ދާނެ ކަމަށް ވެސް ވަޒީރު ވަނީ ވިދާޅުވެފަ އެވެ.

ރާއްޖޭގެ ކުޅިވަރު އެސޯސިއޭޝަންތައް ވަރަށް މަސައްކަތުން، އަދި ވަރަށް ބުރަ ހިތްވަރުން ކުރިއަށް ގެންގޮސްފައި އޮއްވައި، ހިންގުން ދަށްވުމުގެ ސަބަބުން އެސޯސިއޭޝަންގެ ހިންގުން އެއް ދުވަހުން އަނެއް ދުވަހަށް ދަށްވަމުން އަންނަކަން ވަޒީރު ފާހަގަ ކުރެއްވި އެވެ.

އެހެންކަމުން ކުޅިވަރު ޤާނޫނުގެ ދަށުން ހެދިގެންދާ ޤަވާއިދުތަކުގެ ސަބަބުން އެކަން އެހެން ނުވާނެ ގޮތަކަށް ކަންކަން ރޭވިގެން ދާނެ ކަމަށާއި، އެކަން ތަންފީޒު ކުރަން ފެށުމާ އެކު އެހެން ދިމާ ނުވާނެ ކަމަށް އުންމީދު ކުރައްވާ ކަމަށް ވެސް ވަޒީރު ވިދާޅުވެފައި އެވެ.

ރާއްޖޭގޭ ބައެއް ކުޅިވަރު އެސޯސިއޭޝަންތަކުގައި ގިނަ މައްސަލަތަކެއް ފެންމަތިވެފައިވާއިރު، އެސޯސިއޭޝަންތަކުގެ އިސްވެރިންނަށް ކޮރަޕްޝަންގެ ތުހުމަތުތައް ވެސް ވަނީ ކުރެވިފަ އެވެ.

މިވަގުތު ވެސް ރާއްޖޭގެ އެންމެ ބޮޑު ކުޅިވަރު އެސޯސިއޭޝަން ކަމަށްވާ، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އޮތީ ނޯމަލައިޒް ކޮށްފަ އެވެ.

އަދި ވޯލްޑް ބެޑްމިންޓަން ފެޑެރޭޝަން (ބީޑަބްލިއުއެއެފް) އިން ވަނީ މިދިޔަ ހުކުރު ދުވަހު، ބެޑްމިންޓަން އެސޯސިއޭޝަން އޮފް މޯލްޑިވްސް ސަސްޕެންޑު ވެސް ކޮށްފަ އެވެ.