ޖާހު އިންވެސްޓްމެންޓުން ހުޅުމާލޭގައި އަޅަމުން އައި "ދަ ގާޑެންސް" ގެ މަސައްކަތް ނުނިންމާ ދިގުލާފައިވާތީ، އެ ކުންފުންޏާއެކު ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން ވެފައި އޮތް އެއްބަސްވުން ބާތިލުކުރުމަށް ފަހު ތަން ހުސްކުރަން އެންގުމުން އެ މައްސަލަ ކޯޓަށް ހުށަހަޅައިފިއެވެ.

އެޗްޑީސީގެ އޮފިޝަލަކު ރާއްޖެ އެމްވީ އަށް މައުލޫމާތުދެމުން ބުނެފައި ވަނީ އެ އެއްބަސްވުން ބާތިލް ކުރީ މަސައްކަތް ނުނިމި އެތައް ދުވަހެއް ވެފައިވާތީ ކަމަށެވެ. އަދި އެ އެޕާޓްމެންޓް ގަނެފައިވާ މީހުންގެ ހައްގުތައް ކަށަވަރު ނުވެ އެތައް ދުވަހެއް ވޭތުވެފައިވާތީ ކަމަށެވެ. އެ އެއްބަސްވުން ބާތިލް ޖުރީ ނިމިދިޔަ ޖެނުއަރީ މަހުގެ 27ގައެވެ.

ހުޅުމާލޭގައި ޖާހު އިންވެސްޓްމަންޓުން ތަރައްގީކުރަމުންދިޔަ "ދަ ގާޑަންސް" އެޕްޓާމަންޓުތަކުގެ ބާކީ ހުރި މަސައްކަތްތައް އާބަންކޯގެ ބެލުމުގެ ދަށުން އަލުން ފެށީ އޮކްޓޯބަރ 2023ގައެވެ.

ޖާހު އިންވެސްޓްމަންޓް ޕްރައިވެޓް ލިމިޓެޑާ މި މަޝްރޫއު ހިންގުމަށް ހަވާލު ކުރީ 2017 ވަނަ އަހަރުއެވެ. އެ ކުންފުންޏާ މި މަޝްރޫއު ހަވާލު ކުރީ ދެ އަހަރު ދުވަހުގެ ތެރޭގައި ނިންމާ ގޮތަށެވެ. ނަމަވެސް އަދިވެސް މި މަޝްރޫއުގެ މަސައްކަތް ނުނިމޭތީ އެތަނުން އެޕާރޓްމަންޓް ގަނެފައިވާ ފަރާތްތަކުން ދަނީ ކަންބޮޑުވުން ފާޅުކުރަމުންނެވެ.

މި މައްސަލަ އާއި ގުޅިގެން އެޗްޑީސީން މީގެ ކުރިން ބުނެފައި ވަނީ އެ އެއްބަސްވުން ބާތިލު ކުރުމަށްފަހު އެ ތަނުގެ މަސައްކަތްތައް ނިންމުމުގެ ކަންކަން ކުރިއަށް ދާނެ ގޮތް އެޕާޓްމެންޓް ގަތް މީހުންނާއި ހިއްސާކުރާނެ ކަމަށެވެ.