"ދާއިރާތަކުގެ ރެޕްރެޒެންޓޭޝަން ކައުންސިލްތަކުން އެއްކޮށް ގެއްލޭ ގޮތަށް އިސްލާހުތައް ގެނައުން ބަލަ އެއް ނުގެނެވޭ"
ސަރުކާރުން މިހާރު މަސައްކަތް ކުރަނީ ކައުންސިލް ގޮނޑި ހުސްވުމުން ދޮޅު އަހަރު ވަންދެން އެ ގޮނޑިއަށް މީހަކު ނުނެގޭ ގޮތަށް މުޅި ނިޒާމު ގާނޫނުގެ ތެރެއިން ބަދަލުކުރަން ކަމަށް ނާޒިލް ވިދާޅުވި
މަރަދޫ ދާއިރާގެ މެމްބަރު އަހުމަދު ދީދީ
ދާއިރާތަކުގެ ރެޕްރެޒެންޓޭޝަން ކައުންސިލްތަކުން އެއްކޮށް ގެއްލޭ ގޮތަށް އިސްލާހުތައް ގެނައުން ބަލައި ނުގަނެވޭ ކަމަށް މަރަދޫ ދާއިރާގެ މެމްބަރު އަހުމަދު ދީދީ ވިދާޅުވެއްޖެއެވެ.
ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް އިސްލާހު ގެނައުމަށް ސަރުކާރުގެ ފަރާތުން ހުށަހެޅުއްވީ ހޯރަފުށި ދާއިރާގެ ޕީއެންސީގެ މެންބަރު އަލީ މޫސާއެވެ. މި ބިލުގައި ވަނީ، ކައުންސިލަރުންނާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީ (ޑަބްލިއުޑީސީ)ގެ މެންބަރުންގެ ދައުރުގައި ބާކީ 548 ދުވަސް އޮންނަ ހާލަތުގައި ބައި-އިލެކްޝަން ބާއްވަން ނުޖެހޭ ގޮތަށް ވަނީ އިސްލާހެއް ހުށަހަޅާފައެވެ.
ދީދީ ވިދާޅުވީ ކައުންސިލްތަކުގައި ދާއިރާތައް ތަމްސީލް ނުކުރެވޭ ގޮތަށް ކަންކަން ވުމަކީ ބަލައިގަނެވޭ ކަމެއް ނޫން ކަމަށެވެ. އައްޑޫ ސިޓީ ކައުންސިލުގައި މަރަދޫ ތަމްސީލްކުރައްވަނީ އެންމެ ކައުންސިލަރެއް ކަމަށާއި އެ ކައުންސިލަރުގެ ގޮނޑި އެއްވެސް ހާލަތެއް މެދުވެރިވެގެން ހުސްވެއްޖެ ނަމަ ރިޕްރެޒެންޓޭޝަން ގެއްލޭ ކަމަށް އޭނާ ވިދާޅުވިއެވެ. އެއީ ސަރުކާރުން ކަން ކޮށްގެން ވާނެ ގޮތެއް ނޫން ކަމަށް ދީދީ ވިދާޅުވިއެވެ.
ދީދީގެ އިތުރުން ހިތަދޫ ދެކުނު ދާއިރާޣެ އިބްރާހިމް ނާޒިލް ވެސް ވަނީ މި އިސްލާހާއި ދެކޮޅަށް ވާހަކަދައްކަވާފައެވެ. އޭނާ ވިދާޅުވީ މިއީ ޚަރަދު ކުޑަކުރަން ކުރާ ކަމެއް ކަމަށް ސަރުކާރުން ބުނާ އިރު މި ސަރުކާރު ވުޖޫދުވީއްސުރެ އޮތީ ލާމަރުކަޒީ ޤާނޫނުގެ ދަށު ވެފައި ކަމަށެވެ. ހަރަދު ކުޑަކުރުމުގެ ގޮތުން ގާނޫނުތަކަށް އިސްލާހު ގެނައުން ރައްޔިތުން ބަލައި ނުގަންނަނީ މަޝްރޫޢުތައް ނުހިނގާތީ ކަމަށް ވެސް ނާޒިލް ވަނީ ވިދާޅުވެފައެވެ.
ސަރުކާރުން މިހާރު މަސައްކަތް ކުރަނީ ކައުންސިލް ގޮނޑި ހުސްވުމުން ދޮޅު އަހަރު ވަންދެން އެ ގޮނޑިއަށް މީހަކު ނުނެގޭ ގޮތަށް މުޅި ނިޒާމު ގާނޫނުގެ ތެރެއިން ބަދަލުކުރަން ކަމަށް ނާޒިލް ވިދާޅުވިއެވެ. އެއީ ރައްޔިތުން ނިކަމެތިކުރުން ކަމަށް ނާޒިލް ސިފަކުރެއްވިއެވެ.
