ސަރުކާރުގެ ބަޖެޓުން ދޫކުރާ އެއްބިލިއަން ރުފިޔާގެ ލޯން ސްކީމް މެއިމަސް ނިމުމުގެ ކުރިން ދޫކުރެވޭނެ: މުއްތަލިބު
12 މެއި 2025 | ހޯމަ 07:28މިސްކީމްގެ ދަށުން ދުކުރާ ލޯންތަކުން 5 އިންސައްތައަށް ލޯން ތިރިކޮށްދެއްވާނެ.
މިނިސްޓަރ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ ޑރ. އަބްދުﷲ މުއްތަލިބް
ސަރުކާރުގެ ބަޖެޓުން ދޫކުރާ އެއްބިލިއަން ރުފިޔާގެ ލޯން ސްކީމް، މެއިމަސް ނިމުމުގެ ކުރިން ވީހާވެސް ގިނަ ބަޔަކަށް ލޯން ލިބޭނެގޮތް ހަމަޖައްސަވައިދެއްވާނެ ކަމަށް އިންފްރާސްޓްރަކްޗާ މިނިސްޓަރު، އަބްދުالله މުއްތަލިބު ވިދާޅުވެއްޖެ އެވެ.
މިނިސްޓަރު މިގޮތަށް ވިދާޅުވީ މިއަދު މަޖިލީސް ޖަލްސާއަށް ހާޒިރު ކުރައްވާ މާވަށު ދާއިރާގެ މެންބަރު އަހްމަދު ޝާކިރު ކުރެއްވި ސުވާލަށް ޖަވާބުދެއްވަމުންނެވެ.
ވަޒީރު މުއްތަލިބު ވިދާޅުވީ އެސްކީމަކީ ރައްޔިތުން ވަރަށް އުންމީދުކުރާ ސްކީމެއް ކަމަށާއި އަދި ދައުލަތުގެ ބަޖެޓުގައި އެއްބިލިއަން ރުފިޔާ ހުރިކަމުގައި ވިޔަސް އެއަށްވުރެ ބޮޑުކޮށް އެސްކީމް ކުރިއަށް ގެންދަން މަސައްކަތް ކުރާކަމަށެވެ. އަދި ބޭންކުތަކާއި ގުޅިގެން އެމަސައްކަތް ކުރެއްވާނެ ކަމަށް ވަޒީރު ވިދާޅުވިއެވެ. އެގޮތުން ބޭންކް އޮފް މޯލްޑިވެސްއާއި ވަރަށް އަވަހަށް އެއްބަސްވުމެއްގައި ސޮއި ކުރެވޭނެކަމަށާއި އަދި އޭގެ އިތުރުން އެހެން ބޭންކު ތަކާއިއެކު ވެސް މަޝްވަރާކޮށް އެކަން ހަމަޖެހޭނެ ގޮތްތަކެއް ބަލަމުންދާކަމަށް ވަޒީރު ވިދާޅުވިއެވެ.
މީގެ އިތުރުން މިސްކީމްގެ ދަށުން ދުކުރާ ލޯންތަކުން 5 އިންސައްތައަށް ލޯން ތިރިކޮށްދެއްވާނެކަމަށް ވަޒީރު ފާހަގަކުރެއްވިއެވެ. އަދި މެއިމަސް ނިމުމުގެ ކުރިން އެޕްލިކޭޝާން ތަށް ކްލޯސްކޮށް އިވެލުއޭޓް ކުރުމަށްފަހު ވީހާވެސް ގިނަ ބަޔަކަށް ލޯން ދޫކުރާނެ ކަމަށް ވަޒީރު ވިދާޅުވިއެވެ.
