ފުލުހެއްގެ ފޮޓޯ އާންމުކުރުމަކީ ގާނޫނާއި ހިލާފުކަމެއް ކަމަށް ފުލުހުން ބުނެފިއެވެ.

ފުލުހުން މިފަދައިން ބުނެފައިވަނީ ސޯޝަލް މީޑިއާ ޕްލެޓްފޯމެއްކަމަށްވާ "އެކްސް" އަށް ފޮނުވި ލިޔުމެއްގައެވެ. އެކްސްއަށް ފުލުހުން ލިޔުމެއް ފޮނުވީ ސަރުކާރުގެ ކޮރަޕްޝަނާއި ވައްކަން ފަޅާ އަރުވަމުންދާ 'ހަސަން ކުރުސީ" އެކައުންޓުން ފުލުހެއްގެ ފޮޓޯއެއް އާންމުކުރުމާއި ގުޅިގެންނެވެ.

ކުރުސީގެ އެކައުންޓުން ފުލުހެއްގެ ފޮޓޯއެއް އާންމުކުރީ، މިދިޔަ މަހުގެ 18 ވަނަ ދުވަހު ހ. ފެންޓޮނޯއީ ގެއިން ވެއްޓުނު ކަމަށް ބުނާ ހައްވާ ޔުމްނު މަރަށް ދޫކޮށްލާފައި އޮއްވާ ފެނުނު މައްސަލައިގައި އިންސާފު ހޯދުމަށް ގޮވާލާ ޒުވާނުން ބޭއްވި މުޒާހަރާގެ ތެރެއަށް ފުލުހުން ވަދެގަނެ ބާރުގެ ބޭނުންކޮށް، ޒުވާނަކު ހައްޔަރުކުރި މައްސަލައިގައެވެ. ކުރުސީ އެކައުންޓުން ފޮޓޯ އާންމުކުރި އަންހެން ފުލުހަކީ 1 މެއިގައި ބޭއްވި މުޒާހަރާގައި އަނިޔާވެރިކޮށް އެ މުޒާހަރާއިން އައިޝަތު ޝިމަން އަހުމަދު (ދޮންކެޔޮ) ހައްޔަރު ކުރި ފުލުސް އޮފިސަރެވެ.

އަންހެން ފުލުސް މީހާގެ ފޮޓޯއާއެކު ކުރުސީ ކުރި އެކްސް ޕޯސްޓުގައި ބުނެފައި އޮތީ ޝިމަން ހައްޔަރުކުރި ފުލުސް އޮފިސަރަކީ އޭނާ ކަމަށެވެ.

މި ޕޯސްޓާއި ގުޅިގެން ދިވެހި ފުލުހުންގެ ހިދުމަތުން ވަނީ އެ ޕޯސްޓް ނެގުމަށް އެކްސްއަށް ލިޔެފައެވެ. އެގޮތުން އެކްސްއިން ކުރުސީއަށް ފޮނުވި ލިޔުމުގައި ބުނެފައިވަނީ ދިވެހި ފުލުހުންގެ ހިދުމަތުން ކުރުސީގެ އެކައުންޓާއި ގުޅިގެން ރިކުއެސްޓެއް ލިބިފައިވާ ކަމަށާއި، އަދި އަންހެން ފުލުސް އޮފިސަރުގެ ފޮޓޯ ޖެހި ޕޯސްޓަކީ ރާއްޖޭގެ ގާނޫނާއި ހިލާފު ޕޯސްޓެއް ކަމަށެވެ.