ދިވެހިރާއްޖޭގެ މިހާރުގެ ސަރުކާރުން ރާއްޖޭގެ ޤާނޫނު އަސާސީގެ ހުރިހާ މާއްދާއެއް މުގުރާލާފައިވާ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

ރައީސް ނަޝީދު މިހެން ވިދާޅުވެފައި ވަނީ އެމަނިކުފާނު އިންޑިއާއަށް މިހާރު ކުރައްވަމުން ގެންދަވާ ދަތުރުފުޅުގައި އިންޑިއާގެ ނޫހެއް ކަމަށްވާ ދަ ވަޔާއަށް ދެއްވި އިންޓަވިއުއެއްގައެވެ.

ރައީސް ނަޝީދު ވިދާޅުވެފައި ވަނީ ޤާނޫނު އަސާސީގެ ހުރިހާ މާއްދާއެއް ރާއްޖޭގެ މިހާރުގެ ސަރުކާރުން މުގުރާލާފައިވާ ކަމަށާއި ރާއްޖޭގެ ޤާނޫނު އަސާސީއާ ހިލާފް އެތަކެއް އަމަލުތަކެއް ރައީސުލްޖުމްހޫރިއްޔާ އަބްދުﷲ ޔާމީން ހިންގަވާފައިވާ ކަމަށެވެ. އެހެން ނަމަވެސް އިދިކޮޅު ފަރާތްތަކުން އަބަދުވެސް ކަންކަން ކުރިޔަށް ގެންދާނީ ޤާނޫނު އަސާސީގެ އިމުގެ ތެރެއިން ކަމަށް ރައީސް ނަޝީދު ވަނީ ވިދާޅުވެފައެވެ.

ރާއްޖޭގައި 2008 ވަނަ އަހަރު ޤާނޫނު އަސާސީ ތަސްދީޤު ކުރެވިގެން ދިޔައީ އެތައް ބައެއްގެ އުއްމީދުތަކާއި އެކުގައި ކަމަށާއި އެހެން ނަމަވެސް މި ސަރުކާރު އައުމަށް ފަހު ޤާނޫނުތަކާއި ގަވާއިދުތަކަށް ބަދަލު ގެނެސް، ފެހި ޤާނޫނު އަސާސީ އައުމުގެ ކުރިން ރާއްޖެ އޮތް ހާލަތަށް ވައްޓާލުމަށް މަސައްކަތް ކުރަމުން ދާ ކަމަށް ރައީސް ނަޝީދު ވަނީ ވިދާޅުވެފައެވެ.

ރައީސް ނަޝީދު އިންޑިއާއަށް ވަޑައިގަތުމަށް ދައުވަތު އެރުވުމަކީ އިންޑިއާއިން ރާއްޖޭގައި ހިގަމުންދާ ކަންކަން ވަރަށް ކައިރިން ބަލަމުންދާ ކަމުގެ ފުރިހަމަ ހެއްކެއް ކަމަށް ރައީސް ނަޝީދު ވިދާޅުވިއެވެ.

މި ސަރުކާރުން ޗައިނާ އާއި ސައުދީ އަރަބިއްޔާއާއި ގުޅުން ބަދަހި ކުރައްވަނީ އިންޑިއާ ކަނޑުގެ ސަލާމާތާއި ހަމަޖެހުން ގާއިމު ކުރުމަށް ކަމަށް ވިދާޅުވިޔަސް އިންޑިއާ ކަނޑުގެ ސަލާމަތާއި ހަމަޖެހުން ގާއިމް ކުރެވޭނީ އިންޑި އާއި ގުޅުން ބަދަހި ކޮށްގެން ކަމަށް ރައީސް ނަޝީދު ފާހަގަ ކުރެއްވިއެވެ. އަދި އިންޑިއާއާ ގުޅުން ބަދަހި ކުރުމުގެ ބަދަލުގައި ޗައިނާ އާއި ސައުދީއާ ގުޅުން ބަދަހިކުރަން ސަރުކާރުން މަސައްކަތް ކުރުމުން އެގިގެންދަނީ ސަރުކާރުގެ ފޮރިން ޕޮލިސީގެ ދޯދިޔާކަން ކަމަށް އެމަނިކުފާނު ވިދާޅުވިއެވެ.  

ރައީސް ނަޝީދު އިންޑިއާއަށް ވަޑައިގެންފައި ވަނީ އިންޑިއާގެ ފޮރިން މިނިސްޓްރީގެ ދައުވަތަކަށެވެ.