"ބޯހިޔާވަހިކަމުގެ ބިލު" އަށް ޢާންމުންގެ ޚިޔާލު ހޯދުމަށް ހުޅުވާލައިފި
އެއްވެސް ފަރާތެއްގެ ޚިޔާލެއް ނުވަތަ ކޮމެންޓެއް އޮތް ނަމަ، 18 މޭ 2025 ވާ އާދިއްތަ ދުވަހުގެ 12:00 ގެ ކުރިން މެއިލް ކުރުމަށް އެދިފައިވޭ
ފުލުހުންގެ ޕޮލްކޯ ފްލެޓްތައް
"ބޯހިޔާވަހިކަމުގެ ބިލު" އަށް ޢާންމުންގެ ޚިޔާލު ހޯދުމަށް ހުޅުވާލައިފި އެވެ.
ރައްޔިތުންގެ މަޖިލީހުގެ އިދާރާއިން ކުރި އިއުލާނެއްގައި ބުނެފައިވަނީ މަޖިލީހުގެ ގެދޮރުވެރިކަމުގެ ކޮމިޓީން ދިރާސާކުރައްވަމުން ގެންދަވާ 'ބޯހިޔާވަހިކަމުގެ ބިލު' އަށް އާންމުންގެ ޚިޔާލު ހޯދުމަށް ބުދަ ދުވަހުން ފެށިގެން ހުޅުވާލާފައިވާ ކަމަށެވެ.
އެބިލަށް އެއްވެސް ފަރާތެއްގެ ޚިޔާލެއް ނުވަތަ ކޮމެންޓެއް އޮތް ނަމަ، 18 މޭ 2025 ވާ އާދިއްތަ ދުވަހުގެ 12:00 ގެ ކުރިން ރައްޔިތުންގެ މަޖިލީހުގެ ގެދޮރުވެރިކަމުގެ ކޮމިޓީ ގެ އީމެއިލް އެޑްރެސް housing.committee@majilis.gov.mv އަށް ފޮނުވުމަށް މަޖިލީހުން ވަނީ އެދިފައެވެ.
މިބިލް މަޖިލީހަށް ސަރުކާރުގެ ފަރާތުން ހުށަހަޅާފައިވަނީ މާފަންނު މެދު ދާއިރާގެ މެމްބަރު އަސްމާ ރަޝީދުއެވެ.
ސަރުކާރުން މިބިލް ހުށަހެޅުމުގެ ބޭނުމަކީ، ދިވެހުރާއްޖޭގައި ދިރިއުޅޭ އެންމެހައި ރައްޔިތުންނަށް، ރައްކާތެރި، އަދި ދިރިއުޅުމުގެ ބޭނުންތަކަށް ފުދޭ، އެކަށީގެންވާ ބޯހިޔާވަހި ކަމަށް ވާސިލްވުމަށް ހުރި ފުރުޞަތުތަކުގެ ބޭނުން ފަސޭހަ ކަމާއި އެކު ހިފޭނެ ބޯހިޔާވަހި ކަމުގެ ނިޒާމެއް ގާއިމްކޮށް، އެނިޒާމުގެ ދަށުން، ބޯހިޔާވަހި ކަމަށް އެންމެ ބޭނުންޖެހިފައިވާ ފަރާތްތަކަށް ދިރިއުޅޭނެ ތަންތަން ހޯދައިދިނުމަށް މަގުފަހި ކޮށްދިނުމަށްޓަކައި ކަމަށެވެ.
އަދި އެފަދަ ފަރާތްތަކަށް ހާއްސަކޮށް ބޯހިޔާވަހި ކަމުގެ ޕްރޮގްރާމްތައް ހިންގުމުގެ އުސޫލުތައް ކަނޑައެޅުމާއި، ބޯހިޔާވަހިކަމުހެ މަޝްރޫއުތައް ހިންގާ ފަރާތްތައް އެފަދަ މަޝްރޫއުތައް ހިންގަނީ ޒިންމާދާރުކަމާއި އެކު އަދި ދެފުށް ފެންނަ އުސޫލުތަކާއި އެފަދަ މަޝްރޫއުތައް ހިންގުމުގެ އުސޫލުތައް ކަނޑައެޅުމާއި، ބޯހިޔާވަހިކަމުގެ މަޝްރޫއުތަކުގެ ދަށުން ތަރައްޤީކުރެވޭ ތަންތަނުގައި ހުންނަންޖެހޭ މިންގަނޑުތަކާއި ވަސީލަތްތައް ކަނޑައެޅުމާއި އެނޫންވެސް ކަމާއި ގުޅޭ އުސޫލުތައް ބަޔާންކުރުން ކަމަށް ވަނީ ބުނެފައެވެ.
ބޯހިޔާވަހިކަމުގެ މަައްސަލައަކީ ރާއްޖޭގައި އެންމެ ބޮޑަށް ދިމާވެފައިވާ އެއް މަައްސަލައެވެ. މިކަމަށް އެއްވެސް ސަރުކާރަކުން މިކަމަށް އެކަށީގެންވާ ހައްލެއް ލިބިފައެއް ނުވެއެވެ.
