ގަލްފް އެއާލައިންތަކުގެ ދަތުރުތައް ޕާކިސްތާނަށް ކެންސަލްކޮށްފި

އިންޑިއާ އިން ޕާކިސްތާނަށް އަމާޒުކޮށް ދިން ހަމަލާތަކާ ގުޅިގެން، ޕާކިސްތާންގެ އެއާ ސްޕޭސް ބަންދު ކުރުމުގެ ސަބަބުން، ގަލްފް އެއާލައިންތަކުގެ ދަތުރުތައް ކެންސަލް ކޮށްފި އެވެ.

އިއްތިހާދު، އެމިރޭޓްސް އަދި ޤަތަރު އެއާވޭސް އިން ވަނީ ދުބާއީ، އަބޫ ދާބީ އަދި ދޯހާގެ އެއާޕޯޓުތަކުން އިންޑިއާ އަދި ޕާކިސްތާންގެ އެއާޕޯޓުތަކަށް ކުރަމުން އަންނަ ދަތުރުތައް ހުއްޓާލަން ނިންމައި، ބައެއް ދަތުރުތައް ލަސްކޮށްފަ އެވެ.

އިއްތިހާދުން ބުނީ މެއި މަހުގެ ހަ ވަނަ ދުވަހު ޕާކިސްތާނަށް ދަތުރު ކުރަމުން ދިޔަ ފްލައިޓެއް އަނބުރާ ގެނެސްފައިވާ ކަމަށެވެ. އަދި އެ އެއާލައިނުން ވަނީ މެއި މަހުގެ ހަތް ވަނަ ދުވަހު ކަރާޗީ (އީވައި 297)، ލާހޯރް (އީވައި 285) އަދި އިސްލާމާބާދު (އީވައި 303) ގެ ދަތުރުތައް ކެންސަލް ކޮށްފަ އެވެ. 

މީގެ އިތުރުން އިއްތިހާދުން ބުނީ އެހެން ބައެއް ދަތުރުތަކުގެ މަގު ބަދަލު ކުރަން ޖެހިދާނެ ކަމަށާއި، އެކަމުގެ ސަބަބުން ދަތުރުތައް ދިގު ވެދާނެ ކަމަށެވެ. 

އެމިރޭޓްސް އިން ވެސް ވަނީ ދުބާއީ، ސިޔާލްކޯޓް، ލާހޯރް، އިސްލާމާބާދު އަދި ޕެޝަވާރު ފަދަ ޕާކިސްތާންގެ ވަކި ވަކި ރަށްތަކަށް ދެމެދު ކުރާ ދަތުުރުތައް ވަގުތީ ގޮތުން ހުއްޓާލާފައި އެވެ.  

ޤަތަރު އެއާވޭސް އިން ބުނީ ޕާކިސްތާންގެ އެއާ ސްޕޭސް ބަންދު ކުރުމާ ގުޅިގެން އެ ޤައުމަށް ކުރާ ދަތުރުތައް ވަގުތީ ގޮތުން ހުއްޓާލާފައިވާ ކަމަށެވެ. 

އަދި އެއާލައިންތަކުން ދަނީ މިހާރުގެ ޙާލަތު ވެސް ގާތުން ބަލައި، މޮނިޓާ ކުރަމުން ކަމަށް ވަނީ ބުނެފަ އެވެ. އަދި ފަސިންޖަރުންނާއި، އެއާލައިންތަކުގެ މުވައްޒަފުންގެ ސަލާމަތާއި، ރައްކާތެރި ކަމަށް އިސްކަން ދޭނެ ކަމަށް ވަނީ ބުނެފަ އެވެ.

އިންޑިއާ އާއި ޕާކިސްތާނާ ދެމެދު ގުޅުން ގޯސްވެ، ހަމަލާތައް ބަދަލު ކުރަން ފަށާފައިވާއިރު، އިންޑިއާގެ އެއާލައިންތަކުުން ވެސް ވަނީ އުތުރު އިންޑިއާގެ އެއާޕޯޓުތަކާ ގުޅޭ ދަތުރުފަތުރުގެ އިންޒާރު ދީ، ފަސިންޖަރުންނަށް ދަތުރު ތަކުގެ ޙާލަތު ބަލަމުން ދިޔުމަށް އިރުޝާދު ދީފަ އެވެ.