އިސްރާއީލް އިން ޣައްޒާ އަށް ދެމުން އަންނަ ހަމަލާތަކުގައި 16 މީހަކު ޝަހީދު ކޮށްލާފައިވާ ކަމަށް، ސިވިލް ޑިފެންސް އިން ހާމަކޮށްފި އެވެ.

ސިވިލް ޑިފެންސް އިން ބުނެފައިވާ ގޮތުގައި އާދީއްތަ ދުވަހު އިސްރާއީލްގެ ހަމަލާތަކުގައި 16 މީހަކު ވަނީ ޝަހީދު ކޮށްލައިފަ އެވެ. އޭގެ ތެރޭގައި މަދުވެެން ތިން ކުޑަ ކުދިން ހިމެނޭ ކަމަށް ވެސް ވަނީ ބުނެފަ އެވެ.

ސިވިލް ޑިފެންސްގެ ތަރުޖަމާނު މަހުމޫދު ބައްސަލް ވިދާޅުވެފައިވާ ގޮތުގައި، ޚާން ޔުނިސްގައި ރޭގަނޑުގެ ވަގުތުގައި ދެވުނު ހަމަލާގަައި ހަ މީހަކު ވަނީ ޝަހީދުވެފަ އެވެ. އަދި އަލް މަވާސީގައި ހުރި އެޕާޓްމަންޓަކަށް އަމާޒުކޮށް ދެވުނު ހަމަލާގައި ފަސް އަހަރުގެ ދެ ފިރިހެން ކުދިންނާއި، ދެ އަހަރުގެ ކުއްޖަކު ވެސް ވަނީ ޝަހީދު ކޮށްލައިފަ އެވެ.

އިސްރާއީލްގެ އަސްކަރިއްޔާގެ ބަޔާނެއްގައި ބުނެފައި ވަނީ ފާއިތުވި ދެ ދުވަހުގެ ތެރޭގައި ޣައްޒާގެ އެކި ސަރަހައްދުތަކުގައި ހުރި، 100 އަށް ވުރެ ގިނަ "ޓެރަސިސްޓު އަމާޒުތަކަށް" ހަމަލާ ދީފައިވާ ކަމަށެވެ. 

އަދި ޣައްޒާގެ ދެކުނުގައި ހަތިޔާރު ރައްކާކޮށްފައިވާ ތަންތަން ހޯދައި، އެތައް ޓެރަރިސްޓުންނެއް މަރާލެވިފައިވާ ކަމަށް ވެސް އިސްރާއީލްގެ އަސްކަރިއްޔާ އިން ވަނީ ބުނެފަ އެވެ.

މީގެ ތިން އަހަރު ކުރިން، 2023 ވަނަ އަހަރުގެ އޮކްޓޫބަރު މަހުގެ ހަތް ވަނަ ދުވަހު ހަމާސް އިން އިސްރާއީލަށް ދިން ހަމަލާއާ ގުޅިގެން ފެށުނު މި ހަނގުރާމައިގައި، މިއަހަރުގެ ޖަނަވަރީ މަހު ވަނީ ހަނގުރާމަ ހުއްޓާލަން އެއްބަސްވެފަ އެވެ.

ނަމަވެސް، އެ އެއްބަސްވުމާ ޚިލާފަށް އިސްރާއީލުން ވަނީ މާޗު މަހުގެ ތެރޭގައި ޣައްޒާ އަށް އަލުން ހަމަލާތައް ދޭން ފަށައިފަ އެވެ. ޣައްޒާގެ ޞިއްޙީ ވުޒާރާ އިން ހާމަކޮށްފައިވާ ގޮތުގައި، އަލުން ހަމަލާތައް ދޭން ފެށި ފަހުން، މިހާތަނަށް ވަނީ 2،436 މީހަކު ޝަހީދު ކޮށްލައިފަ އެވެ. 

އިސްރާއީލްގެ އަނިޔާވެރިކަން އިންތިހާ އަށް ފެނިގެންދާ މި ހަނގުރާމައިގައި މިހާތަނަށް ވަނީ 52،535 މީހަކު ޝަހީދު ކޮށްލައިފަ އެވެ. މީގެ އިތުރުން އެތައް ބަޔަކަށް ޒަޚަމްވެފައިވާއިރު، މުޅި ޣައްޒާ ވަނީ ފުނޑު ފުނޑު ކޮށްލައިފަ އެވެ.

ހަމަލާތައް ދިނުމުގެ އިތުރުން، އިސްރާއީލުން ވަނީ ޣައްޒާ އަށް ބޭނުންވާ އެހޯ ވެއްދުމަށް ވެސް ހުރަސް އަަޅައިފަ އެވެ. އިސްރާއީލް އިން ބުނެފައިވާ ގޮތުގައި ދެ ދަތިކުރުންތައް ކުރިމަތި ކޮށްފައި ވަނީ، ހަމާސްގެ ބެލުމުގެ ދަށުގައި ތިބި އިސްރާއީލްގެ ރަހީނުން ދޫކޮށްލުމަށް ބާރު އެޅުމުގެ ގޮތުންނެވެ. 

އިސްރާއީލްގެ މި ދަތިކުރުމުގެ ސަބަބުން، ޣައްޒާގައި އިންސާނީ ބޮޑު ކާރިސާއެއް ކުރިމަތިވެފައިވާ ކަމަށް ބުނެ އދ އިން ވަނީ، އެ ދަތިކުރުންތައް ނައްތާލުމަށް ގޮވާލައިފަ އެވެ. އަދޮ ޣައްޒާ އަށް ބޭނުންވާ އެހީ ވެއްދުމުގެ ފުރުސަތު ދިނުމަށް ވެސް ވަނީ ގޮވާލައިފަ އެވެ.