އިޔާޒްގެ ސުވާލެއް ރައީސަށް، ވެރިކަމަށް ވަޑައިގަތުމަށް ކިތައް އިތުރުފުޅު ހެއްދެވިންތޯ؟
އެހާ ވަރަށް ދޮގުތައް ހައްދަވައި، މިހާވަރު ވެގެން ދިޔައީމަ، ދިވެހި ރައްޔިތުންނަށް އިތުރަށް އަނިޔާވެރި ނުވެ އަމިއްލަފުޅަށް އިސްތިއުފާ ދެއްވަން ނުވޭތޯ ވެސް ރައީސް މުޢިއްޒުގެ އަރިހުން އިޔާޒް ވަނީ އައްސަވާފައެވެ.
މަޝްހޫރު ދީނީ ޢިލްމުވެރިޔާ ޑޮކްޓަރު މުޙައްމަދު ޢިޔާޒް ޢަބްދުއްލަޠީފް
ވެރިކަމަށް ވަޑައިގަތުމަށްޓަކައި، ވެރިކަމުގެ ދަހިވެތި ކަމުގައި ދިވެހި ރައްޔިތުންނަށް ކިތައް ކަންތައް އޮޅުވާލައްވައި، އިތުރުފުޅު ހައްދަވާފައި ވާނެތޯ އައްސަވައި، މަޝްހޫރު ދީނީ ޢިލްމުވެރިޔާ ޑޮކްޓަރު މުޙައްމަދު ޢިޔާޒް ޢަބްދުއްލަޠީފްގެ ސުވާލެއް ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު އަށް އަމާޒު ކުރައްވައިފި އެވެ.
އިޔާޒް މިހެން ވިދާޅުވީ، ކުރީގެ ރައީސް އިބްރާހީމް މުޙައްމަދު ޞާލިޙުގެ ސަރުކާރުން ހަދާފައިވާ އަސްކަރީ އެއްބަސްވުންތަކުގައި ކަންބޮޑުވާން ޖެހޭ ވަރުގެ ކަމެއް ނެތް ކަމަށް، ހޮނިހިރު ދުވަހު ރައީސް މުޢިއްޒު ވިދާޅުވުމާ ގުޅިގެންނެވެ.
އިޔާޒްގެ އެކްސް އެކައުންޓުގައި ކުރެއްވި ޕޯސްޓެއްގައި އޭނާ ވިދާޅުވީ، ވެރިކަމުގެ ދަހިވެތި ކަމުގައި ރައްޔިތުންނަށް ކިތައް އިތުރުުފުޅު ހައްދަވާފައި ވާނެތޯ އެވެ. އަދި އެހާ ވަރަށް ދޮގުތައް ހައްދަވައި، މިހާވަރު ވެގެން ދިޔައީމަ، ދިވެހި ރައްޔިތުންނަށް އިތުރަށް އަނިޔާވެރި ނުވެ އަމިއްލަފުޅަށް އިސްތިއުފާ ދެއްވަން ނުވޭތޯ ވެސް ރައީސް މުޢިއްޒުގެ އަރިހުން އިޔާޒް ވަނީ އައްސަވައިފަ އެވެ.
އިޔާޒް މިހެން ވިދާޅުވެފައިވާއިރު، ކުރީ ސަރުކާރުން ހަދާފައިވާ އެއްބަސްވުންތަކުގައި ބޮޑެތި ކަންބޮޑުވުންތަކެއް ހުރި ކަމަށް ރައީސް މުޢިއްޒު މީގެ ކުރިން ވަނީ ވިދާޅުވެފަ އެވެ. ޚާއްސަކޮށް، ރިޔާސީ ކެމްޕެއިންގެ ތެރޭގައި އެމަނިކުފާނު ވަނީ ވަރަށް ބޮޑަށް އެ ވާހަކަތައް ދައްކަވައިފަ އެވެ.
އެގޮތުން އިންޑިއާ އާއެކު ސޮއި ކޮށްފައިވާ އެއްބަސްވުންތަކުގެ ސަބަބުން، ރާއްޖޭގެ މިނިވަންކަމާއި، ސިޔާދަތަށް ބުރޫ އަރާ ކަމަށް ވަނީ ވިދާޅުވެފަ އެވެ. އަދި ކުރީގެ ސަރުކާރުން މަސައްކަތް ކުރީ އިންޑިއާގެ އަޅުވެތި ކަމުގެ ދަށަށް ރާއްޖެ ދޫކޮށްލަން ކަމަށާއި، ރާއްޖެ އަކީ އިންޑިއާގެ ބައެއްގެ ގޮތުގައި ހެދުމަށް ކަމަށް ވެސް ބުނެފައިވެ އެވެ.
ރައީސް މުޢިއްޒު ވެރިކަމަށް ވަޑައިގެންނެވި ފަހުން، ރައީސުލްޖުމްހޫރިއްޔާގެ އޮފީހުގެ އަންޑަރ ސެކްރެޓަރީ އަލްއުސްތާޛު މުޙައްމަދު ފިރުޒުލް ޢަބްދުﷲ ޚަލީލް ވިދާޅެފައި ވަނީ ކުރީ ސަރުކާރުން އިންޑިއާ އާއެކު 100 އަށް ވުރެ ގިނަ އެއްބަސްވުންތަކުގައި ސޮއި ކޮށްފައިވާ ކަމަށެވެ.
އަދި އެ އެއްބަސްވުންތަކުގައި ހިމެނޭ ކަންތައްތައް ބެއްލެވުމަށްފަހު، ދިވެހި ރައްޔިތުންނަށް އެ އެއްބަސްވުންތައް ހާމަ ކުރައްވާނެ ކަމަށް ވެސް ވިދާޅުވެފައި އެވެ. ނަމަވެސް، މިއަދާ ހަމައަށް އައިއިރު، އޭގެއިން އެއްވެސް އެއްބަސްވުމެއްގައި ހުރި މައުލޫމާތު ސަރުކާރުން ރައްޔިތުންނަށް ހާމަކޮށްފައި ނުވެ އެވެ.
