އިސްރާއީލް އިން ޣައްޒާ އަށް ދެމުން އަންނަ ހަަމަލާތަކުގައި، 20 މީހަކު ޝަހީދުވެފައިވާ ކަމަށް ސިވިލް ޑިފެންސް އިން ބުނެފި އެވެ.

ސިވިލް ޑިފެންސް އިން ބުނެފައިވާ ގޮތުގަައި އިސްރާއީލް އިން ހުކުރު ދުވަހު ޣައްޒާ އަށް ދިން ހަމަލާތަކުގައި، މަދުވެގެން 20 މީހަކު ވަނީ ޝަހީދުވެފަ އވެެ. މި ހަމަލާތައް ދީފައި ވަނީ ޣައްޒާ އަށް އިންސާނީ އެހީތެރިކަން ވެއްދުމަށް އިސްރާއީލް އިން ދަތި ކޮށްފައިވާ ދަނޑިވަޅުގަ އެވެ.

ހަނގުރާމަ ހުއްޓާލަން އެކުލަވާލި އެއްބަސްވުމާ ޚިލާފަށް، މިއަހަރުގެ މާޗު މަހުގެ 18 ވަނަ ދުވަހު އިސްރާއީލް އިން ވަނީ އަނެއްކާ ވެސް ޣައްޒާ އަށް ހަމަލާ ދޭން ފަށައިފަ އެވެ. 

ސިވިލް ޑިފެންސްގެ އޮފިޝަލު މުޙައްމަދު އަލް މުގައްޔިރު، އޭއެފްޕީއާ ވިދާޅުވީ ހުކުރު ދުވަހުގެ ފަތިހުން ފެށިގެން އިސްރާއީލް އިން ހަމަލާތައް ދޭން ފެށި ކަމަށެވެ. އަދި އެ ހަމަލާތަކުގައި 20 މީހަކު ޝަހީދުވެފައިވާ ކަމަށް ވެސް އޭނާ ވިދާޅުވި އެވެ.

އޭގެ ތެރޭގައި ބްރެއިޖް ކޭމްޕަށް އަމާޒުކޮށް ދިން ހަމަލާގައި ޝަހީދުވި ނުވަ މީހުން ވެސް ހިމެނޭ ކަމުގައި އޭނާ ވަނީ ވިދާޅުވެފަ އެވެ.

ޣައްޒާގެ ޞިއްޙީ ވުޒާރާ އިން ބުރާސްފަތި ދުވަހު ހާމަކޮށްފައިވާ ގޮތުގައި އިސްރާއީލް އިން އަލުން ހަމަލާ ދޭން ފެށި ފަހުން، މަދުވެގެން 2،326 މީހަކު ޝަހީދުވެފައިވާ ކަމަށެވެ. މިއާއެކު އެ ހަނގުރާމަައިގައި މިހާތަނަށް 52،418 އަށް ވުރެ ގިނަ މީހުން ޝަހީދުވެފައިވާ ކަމަށް ވެސް ވަނީ ފާހަގަ ކޮށްފަ އެވެ.

އިސްރާއީލް އިން ޣައްޒާ އަށް ހަމަލާތައް ދޭން ފަށާފައި ވަނީ، 2023 ވަނަ އަހަރުގެ އޮކްޓޫބަރު މަހުގެ ހަތް ވަނަ ދުވަހު ހަމާސް އިން ރަހީނުކޮށްފައިވާ އިސްރާއީލްގެ ރަހީނުން ދޫކޮށްލުމަށް ގޮވާލަ އެވެ. 

ހަނގުރާމަ ހުއްޓާލުމަށް އެއްބަސްވެފައި ވަނީ މިއަހަރުގެ ޖަނަވަރީ މަހުގެ ތެރޭގަ އެވެ. ނަމަވެސް، މާޗު މަހުގެ ދެ ވަނަ ދުވަހުން ފެށިގެން އިސްރާއީލް އިން ވަނީ ޣައްޒާ އަށް އެހީ ވެއްދުން ހުއްޓުވައިފަ އެވެ.