އެމެރިކާ އާއި ޔުކްރެއިން އިން މައުދަނީ އެއްބަސްވުމުގައި ސޮއި ކޮށްފި
ޔުކްރެއިންގައި ހުންނަ މި މައުދަންތައް ބޭނުން ކުރެވެނީ އިލެކްޓްރޯނިކް ސާމާނު، އިލެކްޓްރިކް އުޅަނދު ފަހަރު އަދި މިލިޓަރީ ބޭނުން ތަކަށެވެ.
ކޮންކްރީޓް ފާރުގައި ކުލައިން ކުރަހާފައިވާ އެމެރިކާ އަދި ޔޫކްރޭންގެ ދިދަތައް
އެމެރިކާ އާއި ޔުކްރެއިންއާ ދެމެދު، މައުދަނީ އެއްބަސްވުމެއްގައި ސޮއި ކޮށްފި އެވެ.
ބުދަ ދުވަހު ސޮއި ކުރެވުނު މި އެއްބަސްވުމުގެ ދަށުން، ޔުކްރެއިންގެ އައު މައުދަނީ މުއާމަލާތްތަކުގައި އެމެރިކާ އަށް އިސްކަން ލިބިގެން ދާނެ އެވެ. އަދި ހަނގުރާމައިގެ ސަބަބުން ވީރާނާވެފައިވާ ޔުކްރެއިން އަލުން އާރާސްތުކޮށް، ބިނާ ކުރުމަށް އިންވެސްޓްމަންޓް ފަންޑެއް ވެސް ޤާއިމު ކުރެވިގެން ދާނެ އެވެ.
އެމެރިކާގެ ވޮޝިންޓަންގައި ސޮއި ކުރެވުނު މި އެއްބަސްވުމަށް ވާސިލުވުމަށް ގިނަ ދުވަސްތަކެއް ވަންދެން ދެ ޤައުމުން ވަނީ މަޝްވަރާ ކޮށްފަ އެވެ.
މި އެެއްބަސްވުމުގައި އެމެރިކާގެ ފަރާތުން ސޮއި ކުރެއްވީ އެ ޤައުމުގެ ޓްރެޒަރީ ސެކްރެޓަރީ ސްކޮޓް ބެސެންޓް އެވެ. އަދި ޔުކްރެއިންގެ ފަރާތުން މި އެއްބަސްވުމުގައި ސޮއި ކުރެއްވީ، އެ ޤައުމުގެ ފަސްޓް ޑެޕިއުޓީ ޕްރައިމް މިނިސްޓަރު ޔޫލިއާ ސްވިރިޑެންކޯ އެވެ.
މި އެއްބަސްވުމުގެ ދަށުން، ޔުކްރެއިންގެ މައުދަނީ ވަސީލަތްތަކާ ގުޅޭ ނިންމުންތައް ނިންމުމުގެ ބާރު އޮންނާނީ ޔުކްރެއިންގެ އަތް މަތީގަ އެވެ. ޔުކްރެއިންގައި ހުންނަ މި މައުދަންތައް ބޭނުން ކުރެވެނީ އިލެކްޓްރޯނިކް ސާމާނު، އިލެކްޓްރިކް އުޅަނދު ފަހަރު އަދި މިލިޓަރީ ބޭނުން ތަކަށެވެ.
ޔުކްރެއިންގެ އިސްވެރިން ވިދާޅުވެފައި މި އެއްބަސްވުމަކީ ޔުކްރެއިންގެ ޤާނޫނު އަސާސީ އާއި ޔޫރަޕިއަން ޔޫނިއަންއާ ގުޅުމުގެ މަސައްކަތާ އެއްގޮތަށް ހެދިފައިވާ އެއްބަސްވުމެއް ކަމަށެވެ.
މި އެއްބަސްވުމަކީ ޔުކްރެއިންގެ މުސްތަޤްބަލަށް މުހިންމު އެއްބަސްވުމެއްގެ ގޮތުގައި ފާހަގަ ކުރެވެ އެވެ. އަދި މިއީ ދުނިޔޭގެ އެހެން ޤައުމުތަކަށް ވެސް ޔުކްރެއިން އާއެކު ދިގު މުއްދަތުގެ ގުޅުން ބޭއްވުމަށް ދެވޭ ރަނގަޅު މެސެޖެއް ކަމަށް ވެސް ބެލެވެ އެވެ.
