އުމުރުން 21 އަހަރުގެ ހައްވާ ޔުމްނު ރަޝީދަށް އިންސާފު ހޯދައިދިނުމަށް އެދި ޒުވާނުންތަކެއް އިސްވެ ކުރަމުންދާ މުޒާހަރާއާއި ގުޅިގެން ރައީސް ޑރ. މުހައްމަދު މުއިއްޒު މެލޭޝިޔާއަށް ކުރައްވާ ރަސްމީ ދަތުރުފުޅަށް ހިޔަނިއެޅިއްޖެއެވެ.

މެލޭޝިއާއަށް ކުރައްވާ ރަސްމީ ދަތުރުފުޅެއްގައި ރައީސް މެލޭޝިއާއަށް ފުރާވަޑައިގެންނެވީ މި މަހުގެ 17 ވަނަ ދުވަހުއެވެ. ރައީސް ފުރާ ވަޑައިގެންނެވި އިރު ޔުމްނު ވެއްޓުނު ހާދިސާއާއި ގުޅިގެން ރާއްޖޭގެ މަސްރަހު އޮތީ ހަލަބޮލިވެފައެވެ. 18 ވަނަ ދުވަހު ހިނގި މި ހާދިސާއައި ގުޅިގެން ދެކޮޅު ނުޖެހޭ އެތައް ކަމެއް ސަރުކާރުން ވަނީ ކޮށްފައެވެ. ޔުމްނު އަށް އިތުރު ފަރުވާއަށް އާއިލާއިން ގޮސްތިބީ ވެސް މެލޭޝިއާގައެވެ.

އޭޕްރީލް މަހުގެ 24 ވަނަ ދުވަހު ބޭއްވި ނޫސްވެރިންގެ ބައްދަލުވުމެއްގައި މޯލްޑިވްސް ޕޮލިސް ސާވިސް އިން ވަނީ ޔުމްނު ވެއްޓުމުގެ ކުރިން އޭނާއާއެކު އެރޭ އުޅުނު ރައުދު އަހުމަދު ޒިލާލާއެކު ހ. ފެންޓޮނޯއީގޭގައި އުޅޭ މަންޒަރު ފެންނަ ވީޑިއޯ ފުޓޭޖްތައް އާންމުކޮށްފައެވެ. އެންމެ ފުރަތަމަ ފުލުހުން ނިންމީ ޔުމްނު އަމިއްލައަށް ފުއްމާލީ ކަމަށެވެ. ނަމަވެސް އާންމުންގެ ޕްރެޝަރާއި މީޑިއާތަކުގެ ޕްރެޝަރާއެކު މައްސަލަ އަލުން ބަލައި ފުލުހުންގެ ނިންމުން ވަނީ ބަދަލުވެފައެވެ. އާންމުން ބުނަމުންދިޔައީ ޔުމްނު އަށް ޖިންސީ އަނިޔާކޮށް އެއްލާލި ކަމަށެވެ.

ރިޕޯޓްތައް ބުނާ ގޮތުގައި އެ އަންހެންމީހާ އެންމެ ފަހުން ފެނިފައި ވަނީ އޭޕްރީލް މަހުގެ 17 ވަނަ ދުވަހު، އޭނާ ވެއްޓުމުގެ ކުރިން ބޭއްވި ޕާޓީއަކުން ކަމަށާއި، ސަރުކާރުގެ "ނުފޫޒުގަދަ ފަރާތްތަކާ" ގުޅުން ހުރި ކަމަށް ބެލެވޭ އިތުރު ހަތް ޒުވާނަކާ އެކު އެވެ. އޭގެ ތެރޭގައި ޓްރާންސްޕޯޓް މިނިސްޓަރ މުހައްމަދު އަމީންއަށް ބޮޑުބޭބޭ ވިދާޅުވާ ދެމީހަކު ހިމެނެއެވެ.

އަދި ޔުމްނުއާއެކު ފެންޓޮނޯއީގޭގައި އުޅުނު ރައުދު އަހުމަދު ޒިލާލް ވަނީ އާންމުންގެ ޕްރެޝަރާއެކު ތުހުމަތުތަކެއްގައި ހައްޔަރުކޮށްފައެވެ. ފުލުހުންގެ ބަޔާނާއި ފޫޓޭޖާ އެއްގޮތް ނުވެ، މައްސަލައިގައި ހިމެނޭ ތުހުމަތުވާ ފަރާތްތައް ފިޔަވައި ޔުމްނުގެ މައުލޫމާތު އާންމު ކުރުމުން ފުލުހުންނަށް ފާޑުކިއުން އަމާޒުވިއެވެ. އަދި ފަހުން ވަނީ އެންމެންގެ ވަނަވަރު އާންމުކޮށްފައެވެ.

ޔުމްނުއަށް އައިޖީއެމްއެޗްފައި ފަރުވާ ދިނުމަށްފަހު އިތުރު ފަރުވާއަށް މެލޭޝީއާއަށް ފުރުވާލީ ރައީސްގެ ދަތުރުފުޅު ފެއްޓެވުމުގެ އެއްދުވަސް ކުރިން 26 އެޕްރީލްގައެވެ.

ކުއަލަލަމްޕޫރުގެ އަމިއްލަ ހޮސްޕިޓަލަކުން ފޮނުވި ސިޓީއެއް މެލޭޝީއާގެ ނޫހެއްކަމަށްވާ "މެލޭޝިއާކިނީ" އަށް ލިބިފައިވާއިރު، އެ ސިޓީގައި ޔުމްނު އެޑްމިޓް ކުރިކަން ކަށަވަރުވެފައިވެއެވެ.

އެ ހޮސްޕިޓަލުގެ މެޑިކަލް ސާވިސަސް އަދި ލިއޭޝަން ހެޑް ސޮއިކޮށްފައިވާ ސިޓީގައި ހައްވާގެ ކްލިނިކަލް ޑައިގްނޯސިސްގައި ގިނަ އަަދެއްގެ ފްރެކްޗަރ ތަކާއި ހަށިގަނޑު ތެރެއަށް ލޭއެޅިފައިވާ ކަމަށް ބުނެފައިވެއެވެ. ޑައިގްނޯސިސް ގައި ބުނެފައިވަނީ ސިކުނޑިއާއި ވަށައިގެންވާ ފަށަލައާ ދެމެދުގައިވާ ޖާގައިން އެތެރެއިން ލޭއައުމުގެ އިތުރުން ކަރާއި މޭކަށިތަކާއި އުނަގަނޑާއި ދަށްބަނޑާއި، ފަލަމަސްގަނޑުގެ ކަށިގަނޑު ގައި ވަނީ ރެނދުލާފައެވެ.

ސަރުކާރުން ޔުމްނުގެ ފަރުވާގެ ހަރަދުދޭނެ ކަމަށް ބުނި ނަމަވެސް އާއިލާއިން ބުނީ ސަރުކާރުން ހަމަޖެއްސި 25،000 ޑޮލަރުން ނުވާނެ ކަމަށެވެ.

މީގެ އިތުރުން ޓްރާންސްޕޭރެންސީ މޯލްޑިވްސް އިން އިތުރު ނުވަ ޖަމިއްޔާއަކާ ގުޅިގެން އޭޕްރީލް 26 ވަނަ ދުވަހު ނެރުނު ޖޮއިންޓް ބަޔާނެއްގައި ފުލުހުންގެ ތަހުގީގާ މެދު ބޮޑެތި ކަންބޮޑުވުންތަކެއް ފާޅުކޮށްފައިވެ އެވެ.

ޖަމިއްޔާތަކުން ބުނީ ޒުވާނުން އިސްވެ ކުރިއަށް ގެންދާ މުޒާހަރާތަކުން ތަހުގީގު ލަސްވުމާއި ސިޔާސީ ބާރު އޮންނަ ފަރާތްތައް ނުވަތަ އާއިލާތައް ހިމާޔަތް ކުރުމަށް ކަންކަން ފޮރުވަމުންދާ ކަމަށް ތުހުމަތުކުރެވޭ ކަމަށެވެ.

ޔުމްނުގެ މައްސަލައިގައި ޒުވާނުން ސަރުކާރާއި ދެކޮޅަށް މުޒާހަރާކޮށް މަސްރަހު ހޫނުވެފައި އޮއްވާ މެލޭޝިއާއަށް ވަޑައިގެން އުޅުއްވާ ރައީސް މުއިއްޒުއަށް އެގައުމުގެ ބޮޑުވަޒީރު ވަނީ އޭނާގެ ރަސްމީ އޮފީހުގައި މަރުހަބާ ވިދާޅުވެފައެވެ. މީގެ އިތުރުން 3 އެއްބަސްވުމެއް ބަދަލުކޮށްފައިވާ އިރު ބައިލެޓަރަލް ގުޅުން ހަރަދުނާކުރުމަށް މަޝްވަރާކުރެވިފައިވެއެވެ.

މީގެ އިތުރުން ރައީސް މުއިއްޒުއަށް އޮނަރަރީ ޑޮކްޓަރޭޓް އެވޯޑް ދިނުމަށް އިންޓަރނޭޝަނަލް އިސްލާމިކް ޔުނިވަރސިޓީ މެލޭޝިއާއިން ނިންމާފައިވާ ނިންމުމާއި ދެކޮޅު ހަދައި ރާޖޭގައި ތިބި އެ ޔުނިވަރސިޓީގެ މުސްކުޅި ދަރިވަރުން ވަނީ ކަންބޮޑުވުން ފާޅުކޮށް އައިއައިޔޫއެމްއެއަަށް ސިޓީއެއްވެސް ފޮނުވާފައެވެ. މި ސިޓީގައި 225 ދަރިވަރުން ސޮއިކޮށްފައިވެއެވެ.

ރައީސް ޑޮކްޓަރު މުޙައްމަދު މުޢިއްޒު މިހާރު މެލޭޝިޔާ އަށް ކުރައްވަމުން ގެންދަވާ ދަތުރުފުޅުގެ ތެރެއިން، ދަރިވަރުންގެ ޖަމިއްޔާ އިފުތިތާހު ކުރުމަށް ބާއްވަން އުޅުން ޖަލްސާ ވެސް ވަނީ ކެންސަލްކޮށްފަ އެވެ. ދަތުރުފުޅުގެ ތެރެއިން އެ ޤައުމުގައި ތިބި ދިވެހި ދަރިވަރުންގެ ޖަމިއްޔާ އިފުތިތާހު ކުުރުމަށް އޮތީ ރާވައިފަ އެވެ. އެއީ، މޯލްޑިވިއަން ސްޓޫޑެންޓް އެސޯސިއޭޝަން އޮފް މެލޭޝިޔާ އެވެ.

އެ ޖަމިއްޔާ އިފުތިތާހު ކުރުމުގެ ޖަލްސާ ހޯމަ ދުވަހު ބާއްވަން ނިންމާފައި އޮތް ނަމަވެސް، ގިނަ ދަރިވަރުން ވަނީ އެ ޖަލްސާ ބޮއިކޮޓް ކުރިއެވެ. އެއީ މިހާރު މާލޭގައި ހިނގައިގެން އުޅޭ، ޒުވާން އަންހެން ކުއްޖަކު ފުރާޅަށް ވެއްޓުނު މައްސަލައިގައި ދިވެހި ފުލުހުންގެ ޚިދުމަތުން ކުރިއަށް ގެންދާ ތަހުގީގާއި، އެކަމުގައި ސަރުކާރުން އަމަލު ކުރަމުން އަންނަ ގޮތާ މެދު ހިތްހަމަ ނުޖެހިގެންނެވެ.