ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު އަހްމަދު މަހްލޫފު ފުލުސް އޮފީހަށް ހާޒިރުވުމަށް އަންގައި، ޗިޓް ހަވާލުކޮށްފި އެވެ.
މަހްލޫފަށް ޗިޓް ހަވާލުކުރީ ބުރާސްފަތި ދުވަހުގެ ރޭ އޭނާ ހައްޔަރުކޮށްގެން މުއްދަތު އިތުރުކުރަން ކޯޓަށް ހާޒިރުކުރުމުން ކޯޓުން އޭނާ ދޫކޮލި ފަހުންނެވެ.
ފުލުސް އޮފީހަށް ހާޒިރުވަށް އަންގާފައިވަނީ އަންނަ އާދިއްތަ ދުވަހުގެ ރޭ 20.00 އަށެވެ. އޭނާ ހާޒިރުކުރަނީ މިދިޔަ ބުރާސްފަތި ދުވަހުގެ ރޭ 12.15 ހާއިރު ކްރިމިނަލް ކޯޓު ސަރައްދަށް ސިޔާސީ ޕާޓީތަކަށް ނިސްބަތްވާ ބަޔަކު އެއްވެ ފުލުހުންގެ އަމުރަށް ނުކިޔަމަންތެރިބވެފައިވާ ކަމަށް ތުހްމަތު ކުރެވޭ މައްސަލާގައި ކަމަށް މަހްލޫފަށް ދިން ލިޔުމުގައިވެ އެވެ.
ބަންދުން ދޫކޮށްލުމުން އަތޮޅުވެހިން ނިކުމެވަޑައިގެން މަހްލޫފު ވަނީ ފުލުހުންގެ ތުހްމަތުތައް ދޮގު ކުރައްވާފަ އެވެ. އަދި ހައްޔަރުކޮށް ތަހްގީގު ކުރަނީ ކޮންމެހެން ކުށެއްގެ ކޮށްގެން ނޫން ކަމަށް ވިދާޅުވި އެވެ.
" މި ބޭނުން ވެގެން މި އުޅޭނީ އަޅުގަނޑުމެން ރައްޔިތުންގެ މަޖިލީހަށް ( އަބްދުﷲ މަސީހް ވަކި ކުރުމަށް) ހުށަހަޅާފައިވާ މައްސަލާގައި 45 މެމްބަރުން ސޮއި ކޮށްފައި އޮތީމަ ފުލުހުންނާ ހަވާލުކޮށްގެން މެޖޯރިޓީ ހޯދަން،" އޭނާ ވިދާޅުވި އެވެ.
އަދި ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ މައްޗަށް އިއްވާފައިވާ ޖަލު ހުކުމަކީވެސް ރައްޔިތުންގެ މަޖިލީހުގެ މެޖޯރިޓީ ސަރުކާރަށް ހޯދުމަށް ކުރަމުންދާ މަސައްކަތެއްގެ ގޮތުގައި އޭނާ ސިފަ ކުރެއްވި އެވެ. އަދި ސިޔާސީ މީހުންގެ މައްޗަށް ކުރާ ޖިނާއީ ދައުވާތަކުގެ ސަބަބުން ސިޔާސީ މަސައްކަތް ހުއްޓާނުލާނެ ކަމަށް ވެސް ތަކުރާރުކޮށް ވިދާޅުވި އެވެ. މަހްލޫފު ކްރިމިނަލް ކޯޓުން ދޫކޮށްލީ އޭނާ 15 ދުވަހަށް ބަންދުގައި ބަހައްޓަން އެދުމުންނެވެ.