އެފްއޭއެމް ލީގު ކަޕް ބުރާސްފަތި ދުވަހު ފަށަނީ

ފުޓުބޯޅަ އެސޯސިއޭޝާން އޮފް މޯލްޑިވްސް (އެފްއޭއެމް) އިން ބާއްވާ، "އެފްއޭއެމް ލީގު ކަޕް" ބުރާސްފަތި ދުވަހު ފަށަން ނިންމައިފި އެވެ.

މިއީ އޭޕްރީލް މަހުގެ ތެރޭގައި ފަށަން ނިންމާފައި އޮތް ފުޓުބޯޅަ ސީޒަން ފަސް ކުރަން ޖެހުމުގެ ސަބަބުން، އޭގެ ބަދަލުގައި އެފްއޭއެމް އިން ބާއްވާ މުބާރާތެކެވެ.

މުބާރާތުގައި ޖުމުލަ ވާދަކުރަނީ ހަ ޓީމެކެވެ. އެއީ ފުރަތަމަ ޑިވިޝަންގެ ތިން ޓީމަކާއި، އަދި ދެ ވަނަ ޑިވިޝަންގެ ތިން ޓީމެވެ.

ފުރަތަމަ ޑިވިޝަން އިން މުބާރާތުގައި ވާދަކުރާ ތިން ޓީމަކީ، މާޒިޔާ ސްޕޯޓްސް އެންޑް ރެކްރިއޭޝަން، އޮޑި ސްޕޯޓްސް ކުލަބު އަދި ޓީސީ ސްޕޯޓްސް ކުލަބެވެ.

އަދި ދެ ވަނަ ޑިވިޝަން އިން މި މުބާރާތުގައި ވާދަކުރާ ތިން ޓީމަކީ، ނިއު ރޭޑިއަންޓް ސްޕޯޓްސް ކުލަބު، މަހިބަދޫ ސްޕޯޓްސް ކުލަބު އަދި ޖޭޖެ ސްޕޯޓްސް ކުލަބެވެ.

އެފްއޭއެމް އިން މީގެ ކުރިން ތާވަލު ކޮށްފައި އޮތީ މި މަހުގެ ތެރޭގައި ފުޓުބޯޅަ ސީޒަން ފެށުމަށެވެ. އެއާއެކު ގިނަ ކުލަބުތަކުން ވަނީ ސީޒަނަށް ތައްޔާރުވުމުގެ ގޮތުން ފަރިތަކުރުންތައް ފަށައި، ކުޅުންތެރިން ހޯދުމުގެ މަސައްކަތް ވެސް ކޮށްފަ އެވެ.

ނަމަވެސް، ފުޓުބޯޅަ ސީޒަން ފެށުން ފަސް ކުރަން ނިންމަން ޖެހުނީ ދުނިޔޭގެ ފުޓުބޯޅައިގެ މައި އިދާރާ (ފީފާ) އިން އަންގައިގެންނެވެ. މުބާރާތް ހިންގުމަށް ފީފާ އިން ވަނީ އެފްއޭއެމް އަށް މާލީ އެހީތެރިކަން ވެސް ފޯރުކޮށްދީފަ އެވެ.