އަބަދު ވެސް އިސްކަން ދޭން ޖެހޭނީ ރާއްޖޭގެ ރައްޔިތުންގެ ހެވާއި ލާބަޔަަށް ކަމަށް ވިދާޅުވެ، ޕޮލިސް ކޮމިޝަނަރު ކަމުން އިސްތިއުފާ ދެއްވި އަލީ ޝުޖާއު އަށް، ކުރީގެ ރައީސް މުޙައްމަދު ނަޝީދު ތައުރީފު ކުރައްވައިފި އެވެ.

ސީޕީ ކަމުން ޝުޖާއު އިސްތިއުފާ ދެއްވާފައި ވަނީ ހޮނިހިރު ދުވަހުގެ ރޭގެ ވަގުތެއްގަ އެވެ. ޝުޖާއުގެ އިސްތިއުފާ ރައީސް ޑޮކްޓަރު މުޙައްމަދު މުޢިއްޒު އަށް ހުށަހެޅުއްވުމުން، އެމަނިކުފާނު ވަނީ އެކަން ޤަބޫލުފުޅު ކުރައްވައިފަ އެވެ.

އެކަމާ ގުޅިގެން އެކްސްގައި ކުރެއްވި ޕޯސްޓެއްގައި ކުރީގެ ރައީސް ނަޝީދު ވިދާޅުވީ، ކަންކަމާ ޒިންމާ ނެގުން ނުވަތަ، އިތުރަށް މައްސަލަ ހޫނުވިޔަ ނުދިނުމަށް އިސްތިއުފާ ދިނުމަކީ އެންމެ ރިވެތި ޑިމޮކްރަޓިކް އުސޫލު ކަމަށެވެ.

އަދި މަގާމުން އިސްތިއުފާ ދެއްވުމުން ޝުޖާއު އަށް މަރުޙަބާ ވިދާޅުވާ ކަމަށް ވެސް ނަޝީދު ވިދާޅުވި އެވެ.

ސީޕީގެ މަގާމުން ޝުޖާއު އިސްތިއުފާ ދެއްވިއިރު، މާލޭގައި ގެއެއްްގެ ފުރާޅު މައްޗަށް ޒުވާން އަންހެން ކުއްޖަކު ވެއްޓުނު މައްސަލައިގައި ފުލުހުން އަދި ޝުޖާއު އަށް ވެސް ވަނީ ފާޑު ކިޔުން އަމާޒުވެފަ އެވެ.

އަދި އެކަމާ ދެކޮޅަށް މިހާރު މާލޭގައި ކުރަމުން އަންނަ ސިލްސިލާ މުޒާހަރާތަކުގައި ވެސް ވަނީ ޝުޖާއުގެ އިސްތިއުފާ އަށް ގޮވައިފަ އެވެ.

މުޒާހަރާގެ ބައިވެރިންގެ ފަރާތުން ކުރަމުން އައި ޑިމާންޑުތަކުގެ ތެރޭގައި ވެސް ޝުޖާއު އިސްތިއުފާ ދިނުމަށް ވަނީ އެދިފަ އެވެ. މީގެ އިތުރުން ހޯމް މިނިސްޓަރު އަލީ އިޙުސާން އަދި ޓްރާންސްޕޯޓު މިނިސްޓަރު މުޙައްމަދު އަމީން ވެސް އިސްތިފާ ދެއްވުމަށް ޑިމާންޑު ކޮށްފައިވެ އެވެ.

އެ މައްސަލައިގައި ފުލުހުންގެ ފަރާތުން ބޭއްވި ނޫސްވެރިންގެ ބައްދަލުވުމުގައި ޝުޖާއު ދެއްކެވި ވާަހަކަ ތަކަަށް ވެސް އާންމުން ވަނީ ވަރަށް ބޮޑަށް ފާޑު ކިޔައިފަ އެވެ.