ސިޓީ ފްރެންޑްސް އަތުން މޮޅުވެ ވެމްކޯ ދެ ވަނަ އަށް، ލީގު ޗެމްޕިއަން ކަށަވަރު ވާާނީ ފަހު މެޗުން

މިހާރު ކުރިއަށްދާ ޤައުމީ ވޮލީ ބޯޅަ ލީގުގައި ސިޓީ ފްރެންޑްސް ކުލަބާ ދެކޮޅަށް ކުޅުނު މެޗުން މޮޅުވެ، ކުލަބު ވެމްކޯ އިން ލީގު ތާވަލްގެ ދެ ވަނަ އަށް ޖެހިލައިފި އެވެ.

ލީގުގައި މިހާތަނަށް ވެމްކޯ ބަލިވެފައި ވަނީ ފްލެކްސާ ސްޕޯޓްސް ކުލަބާ ދެކޮޅަށް ކުޅުނު މެޗުންނެވެ. ހުރާ ކޮމިއުނިޓީ ކުލަބާއި، ގުޑް ގޭމްސް ސްޕޯޓްސް އެކަޑަމީއާ ދެކޮޅަށް ކުޅުނު މެޗުން ވަނީ މޮޅުވެފަ އެވެ.

ހަތަރު ވަނަ މެޗުގައި ހޮނިހިރު ދުވަހުގެ ރޭ ޒުވާނުންގެ މަރުކަޒުގެ އެތެރޭ ކޯޓުގައި ސިޓީ ފްރެންޑްސްއާ ދެކޮޅަށް ކުޅުނު މެޗު ވެމްކޯ އިން ކާމިޔާބު ކުރީ ސީދާ ތިން ސެޓުންނެވެ.

މެޗުގެ ސެޓުތައް ވެމްކޯ އިން ކާމިޔާބު ކުރީ 25-09، 25-11 އަދި 25-11 އިންނެވެ. މެޗުގެ މޮޅު ކުޅުންތެރިޔަކަށް ހޮވުނީ ވެމްކޯގެ ސެޓަރު ފާތިމަތު ޖޫޒާން ޒަރީރު އެވެ.

މޮޅާއެކު ވެމްކޯ ދެ ވަނައިގައި އޮތީ މިހާތަނަށް ލީގުގައި ކުޅެފައިވާ ހަތަރު މެޗުން ނުވަ ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން އެއް ވަނައިގައި ޕޮލިސް ކުލަބަށް ލިބެނީ 12 ޕޮއިންޓެވެ.

އެހެންކަމުން މިއަހަރުގެ ޤައުމީ ވޮލީ ލީގުގެ ޗެމްޕިއަން ކަށަވަރު ވާނީ ވެމްކޯ އާއި ޕޮޮލިސް ކުލަބު ބައްދަލު ކުރާ ފަހު މެޗުންނެވެ. ލީގު ޗެމްޕިއަންކަން ހޯދުމަށް ވެމްކޯ އަށް ޖެހޭނީ ފަސް ސެޓަށް ނުގޮސް މެޗުން މޮޅުވުމަށެވެ.