ޒަކިއްޔާ މަރުގެ މައްސަލާގައި އިންސާފު ހޯދުމަށް ގޮވާލާ ރައްޔިތުން ކުރި މުޒާހަރާއަށް ފުލުހުން ހުރަސްއަޅައި، ބާރުގެ ބޭނުންކޮށްފި
26 އެޕްރީލު 2025 | ހޮނިހިރު 05:27ކައުންސިލް އަދި ފުލުހުންގެ އިދާރާ ހިމެނޭ ގޮތަށް ޓޭޕް ދަމައި އެސަރަހައްދަަށް ނުވަދެވޭ ގޮތަށް ވަނީ ބަންދުކޮށްފައި
ޒަކިއްޔާ މޫސާއަށް އިންސާފު ހޯދައިދިނުމަށް ގޮވާލާ ހުކުރު ދުވަހު ކުރިއަށް ގެންދިޔަ މުޒާހަރާގެ ތެރެއިން
ނ. ހޮޅުދޫގައި ޒަކިއްޔާ މޫސާގެ މަރުގެ މައްސަލާގައި އިންސާފު ހޯދުމަށް ގޮވާލާ އާއްމު ރައްޔިތުން ކުރި މުޒާހަރާއަށް ފުލުހުން ހުރަސްއަޅައި، ބާރުގެ ބޭނުންކޮށްފިއެވެ.
ހުކުރު ދުވަހުގެ ހަވީރު ހޮޅުދޫ ގިނަ އަދަދެއްގެ އާއްމު ރައްޔިތުން ވަނީ ޒަކިއްޔާގެ މަރަށް އިންސާފު ހޯދައިދިނުމަށް ގޮވާލައި، އަޑު އުފުލާފައެވެ.
މުޒާހަރާގެ ބައިވެރިން މައުލޫމާތުދޭ ގޮތުގައި، މި މުޒަހަރާ ފެށުމުގެ ކުރިން ވެސް އެރަށުގައި ހަރަކާތްތެރިވާ ގިނަ އަދަދެއްގެ ފުލުހުން ވަނީ މަގުމައްޗަށް ނުކުމެ، ކައުންސިލް އިދާރާ އަދި ފުލުހުންގެ އިދާރާ ހިމެނޭ ގޮތަށް ޓޭޕް ދަމައި އެސަރަހައްދަަށް ނުވަދެވޭ ގޮތަށް ބަންދު ކޮށްފައެވެ.
މުޒާހަރާގެ ބައިވެރިން ވަނީ ޒަކިއްޔާ މަރުގެ މައްސަލަ އޮޅުވާލާފައިވާ ކަމަށާއި، ވަކި ބައެއްގެ މަސްލަހަތު ހިމާޔަތް ކުރުމަށް މަސައްކަތް ކުރާ ކަމަށް ތުހުމަތު ކޮށްފައެވެ. މިމައްސަލާގައި ފުލުހުން ދޮގު ހަދަމުންދާ ކަމަށާއި، ރައީސް ޑރ.މުހައްމަދު މުއިއްޒުގެ އިތުރުން، ޕޮލިސް ކޮމިޝަނަރު އަލީ ޝުޖާއު އަދި ހޯމް މިނިސްޓަރު އަލީ އިހުސާން އިސްތިއުފާއަށް ގޮވާލާފައެވެ. އަދި ޒަކިއްޔާ މަރުގެ މައްސަލައިގައި ފުލުހުން ކުރިއަށް ގެންދާ ތަހުގީގުގައި އިހުމާލުތަކެއް އޮތް ކަމަށް ގަބޫލު ކުރައްވާ ކަމަށް ވެސް ހޯމް މިނިސްޓަރު އަލީ އިހުސާން ވެސް ވިދާޅުވެފައިވާތީ އެކަން ފާހަގަކޮށް، މި ސަރުކާރުގައި އިންސާފު ލިބޭނެ ކަމުގެ އެއްވެސް އުންމީދެއް މިހާރު ނެތް ކަމަށް ވެސް މުޒާހަރާގެ ބައިވެރިން ބުނެފައިވެއެވެ.
މީގެ އިތުރުން މުޒާހަރާގެ ބައިވެރިން ވަނީ ފުލުހުން ވެސް އިންސާފަށް ތެދުވެ، ހައްގު ބަސް ބުނުމަށް ގޮވާލާފައެވެ.
މުޒާހަރާގެ ބައިވެރިން ހޮޅުދޫ ޕޮލިސް ސްޓޭޝަން ކައިރިއަށް އެއްވުމުން ފަހަތަށް ޖެއްސުމަށް ފުލުހުން މަސައްކަތް ކުރިއެވެ. އެ މަސައްކަތުގެ ތެރެއިން، މި މުޒާހަރާ އިތުރަށް ހޫނުވެ، ފުލުހުންނާއި، އާއްމު ރައްޔިތުންނާ ކުރިމަތިލާ މަންޒަރު ފެނިގެންދިޔައެވެ.
ފުލުހެއް އުމުރުން ދުވަސްވީ މީހެއް ކޮށްޕާލާ، އަތް ގުދުކުރަން އުޅޭ މަންޒަރުން ފެންނައިރު، އެ ސަރަހައްދުގައި ހަރަކާތްތެރިވަމުންދިޔަ އެހެން ޒުވާނުންތަކެއް އެބޭބެ ވަށާލައި، ފުލުހުންގެ މީހާއާ އޭނާ ދުރުކުރެއެވެ. އަދި މި މުޒާހަރާގައި ފުލުހެއް މީހެއްގެ ގައިގައި ޖަހާ މަންޒަރު ފެންނަ ވީޑިއޯއެއް ވެސް ވަނީ ސޯޝަލް މީޑިއާގައި އާއްމުވެފައެވެ. އޭގެ ކުޑަ އިރުކޮޅެއް ނުވެ ފުލުސް މީހާ ބިންމައްޗަށް ވެއްޓޭ މަންޒަރު ވެސް ފެނެއެވެ.
ގިނަ އަދަދެއްގެ އާއްމު ރައްޔިތުން ހޮޅުދޫ ޕޮލިސް ސްޓޭޝަން ކައިރިން ދުރަށް ޖެއްސުމަށް ނުހައްގުން ބާރު ބޭނުންކޮށްފައިވާ ކަމަށް ވެސް މުޒަހާރާގެ ބައިވެރިން ބުނެއެވެ.
ޒަކިއްޔާ މަރުގެ މައްސަލާގައި ފުލުހުން ދޮގު ހަދަމުންދާ ކަމަށް ބުނެ، މީގެ ކުރިން ވެސް ސިލްސިލާ މުޒާހަރާތަކެއް އެރަށުގެ ރައްޔިތުން ކޮށްފައިވެއެވެ.
ޒަކިއްޔާ މަރުވެފައި އޮއްވައި ފެނުނީ މިދިޔަ އަހަރުގެ ސެޕްޓެމްބަރު މަހުގެ 10 ވަނަ ދުވަހުގެ ހެނދުނުގެ ވަގުތެއްގައެވެ. ފުލުހުންގެ ތަހުގީގަށް ޒަކިއްޔާގެ ހަށިގަނޑު މާލެ ގެނައުމަށްފަހު، އޭނާގެ ހަށިގަނޑު ވަޅުލާފައިވަނީ 12 ސެޕްޓެންބަރު 2024 ގައެވެ.
ޒަކިއްޔާ މަރުވާން ދިމާވި ސަބަބެއްގެ ގޮތުގައި ޑޮކްޓަރުން ފާހަގަކޮށްފައި ވަނީ ކަރަށް ލިބިފައިވާ ޒަޚަމްތަކެއްގެ ސަބަބުން ކަމުގައި މި ތަހުގީގާ ގުޅިގެން 3 ޑިސެމްބަރު 2024 ގައި ބޭއްވި ނޫސްވެރިންގެ ބައްދަލުވުމެއްގައި ފުލުހުން ބުނެފައިވެއެވެ.
