ޓްރާންސްޕޯޓް މިނިސްޓަރ މުހައްމަދު އަމީންގެ ގޭގައި ބޭއްވި ޕާޓީއަކާއި، އޭނާގެ ދެ ކޮއްކޮ ހިމެނޭ އަދި މި ޕާޓީގައި ހިމެނޭ މީހަކާއެކު ދިޔަ އަންހެން ކުއްޖަކު ގެއެއްގެ ފުރާޅުމައްޗަށް ވެއްޓުނު ހާދިސާގެ މައުލޫމާތު ހާމަކުރުމަށް ބޭއްވި ނޫސްވެރިންގެ ބައްދަލުުވުން ކުރިއަށް ދަނިކޮށް، މިނިސްޓަރ އަމީން ކޮމިޝަނަރ އޮފް ޕޮލިސް އަލީ ޝުޖާއު އަށް ގުޅުއްވިކަން ފަޅާއަރައިފިއެވެ.

ތަހުގީގަށް ނުފޫޒު ނުފޯރުވާނެކަމަށް އަމީން ވިދާޅުވެފައިވާއިރު، މި ތަހުގީގަށް މިނިސްޓަރ އަމީންގެ ނުފޫޒު އޮތްކަމާއި، ހަފްތާއެއްވި އިރު ފުލުހުން މިކަމާއި ގުޅޭ މައުލޫމާތު ހާމަނުކުރުމުން ސިޔާސީ ނުފޫޒު އޮތްކަމަށް އާންމުން އަންނަނީ ބުނަމުންނެވެ.

ބުރާސްފަތި ދުވަހު ކުރިއަށްގެންދިޔަ ނޫސްވެރިންގެ ބައްދަލުވުމުގައި ބައިވެރިވީ ކޮމިޝަނަރ އޮފް ޕޮލިސް އަލީ ޝުޖާއު އާއި ޑެޕިއުޓީ ކޮމިޝަނަރު އިސްމާއިލް ނަވީންއެވެ. މި ބައްދަލުވުމުގައި ފުލުހުން އެޑިޓްކޮށްފައިވާ ވީޑިއޯ ފުޓޭޖް ދައްކަމުން ދަނިކޮށް، ސީޕީ ޝުޖާއުގެ ފޯނަށް ކޯލެއް އައިސްގެން 31:13 ގައި ވައިބްރޭޓްވާ އަޑު އިވެއެވެ.

އަދި ފޯނު ނުނަންގަވާ، "މިނިސްޓަރ އަމީން އެބަ ގުޅާ ވަރަށް" ކަމަށް ވިދާޅުވާ އަޑު އިވެއެވެ. މިގޮތަށް އަޑު އިވެނީ ރާއްޖެޓީވީގެ ލައިވްގެ 31:20 ގައެވެ. އެއިރުވެސް ފޯނު ވައިބްރޭޓްވާ އަޑު އިވެއެވެ.

ބުރާސްފަތި ދުވަހު ކުރިއަށްގެންދިޔަ ނޫސްވެރިންގެ ބައްދަލުވުމުގައި ސީޕީ ޝުޖާއު ވަނީ މި ތަހުގީގާއި ގުޅިގެން މިނިސްޓަރ އަމީން ނުގުޅުއްވާ ކަމަށް ވިދާޅުވެފައެވެ.

18 އޭޕްރިލް ވީ, ހުކުރު ދުވަހުގެ ރޭ ފަތިހުގެ ވަގުތެއްގައި ޓްރާންސްޕޯޓް މިނިސްޓަރ މުހައްމަދު އަމީން ދިރިއުޅުއްވާ ޢިމާރާތުގައި ޕާރޓީއެއް ބޭއްވި ކަމަށާއި މި ޕާރޓީގައި އޭނާގެ ދެ ކޮއްކޮ ބައިވެރިވާ ކަމަށް އޭނާ ވަނީ އިއުތިރާފް ވެވަޑައިގެންފައެވެ.

ބުދަ ދުވަހުގެ ރޭ މިނިސްޓަރ އަމީން ކުރެއްވި ޓުވީޓެއްގައި ވިދާޅުވެފައިވަނީ އެ ދުވަހުގެ ހާދިސާތަކާ ގުޅިގެން އެ ދެ ކުދިންނާއި ސުވާލުކުރުމަށް ގެންދެވުނު ކަމަށާއި މި ކުދިން އެ ޕާރޓީ ބޭއްވި އިމާރާތަކީ އަމިއްލައަށް މިލްކުކޮށްފައިވާ ޢިމާރާތެއް ނޫން ކަމަށެވެ. އަދި މިއީ އޭނާގެ އެއްބަނޑު އެއްބަފާ 3 މީހުންނާ އެކު ހިއްސާވާ ޢިމާރާތަކަށްވާއިރު، މި ޕާރޓީ ބޭއްވުނީ އޭނާގެ ގެ ނުވަތަ އެޕާޓްމަންޓުގެ ތެރޭގައެއް ނޫން ކަމަށް އަމީން ވިދާޅުވެފައިވެއެވެ. އަދި މި ޕާރޓީ އާއި ބެހޭ އެއްވެސް މަޢުލޫމާތެއް އޭނާއަށް ލިބިފައިނުވާ ކަމަށާއި އޭނާ ގެ ނުވަތަ އެޕާޓްމަންޓުން ބޭރުގައި ހިނގާ ކަންކަން ކޮންޓްރޯލް ނުކުރެވޭނެ ކަމަށް އަމީން ވިދާޅުވެފައިވެއެވެ.

މި ކަންކަމާއި ބެހޭ މަޢުލޫމާތު އޭނާއަށް ލިބިފައިވަނީ ހުކުރު ދުވަހުގެ (18 އޭޕްރިލް) ހަވީރުގެ ވަގުތުގައި ކަމަށާއި ޤާނޫނު ތަންފީޒުކުރުމާއި ތަޙުޤީޤު ކުރުމާ ގުޅޭ އެއްވެސް މެންޑޭޓެއް ސަރުކާރުގައި އޭނާގެ ނެތް ކަމަށް ވަނީ ވިދާޅުވެފައެވެ.

އަދި މި ދުވަހާ ހަމައަށްވެސް، މިމައްސަލައާ ގުޅޭގޮތުން ތަޙުޤީޤާ ބެހޭ އަޕްޑޭޓްތައް ހޯދުމަށް، ނުވަތަ އެއްވެސް ތަޙުޤީޤަކަށް ނުފޫޒު ފޯރުވުމަށް، ޤާނޫނު ތަންފީޒުކުރާ އިދާރާތަކުގެ ނުވަތަ ސަރުކާރުގެ، އެހެން އެއްވެސް ފަރާތެއްގެ އެއްވެސް މީހަކަށް ފޯނުކޮށް ނުވަތަ ގުޅާފައެއް ނުވާނެ ކަމަށް އަމީން ވަނީ ވިދާޅުވެފައެވެ. މިއީ ނުފޫޒު ފޯރުވުމުގެ ތުހުމަތުން ދުރުހެލިވުމަށްޓަކައި ކުރެއްވި ކަމެއް ކަމަށާއި މިކަމާ ޚިލާފަށް ސޯޝަލް މީޑިއާގައި ކުރެވޭ ޕޯސްޓުތަކަކީ އެއްވެސް އަސާސެއް ނެތް، މުޅިން ދޮގު ވާހަކަތަކެއް ކަމަށް އަމީން ވިދާޅުވެފައި ވެއެވެ.