އިސްރާއީލްގެ ހަމަލާއެއްގައި ޣައްޒާ ސްކޫލެއްގައި 10 މީހަކު ޝަހީދު ވެއްޖެ
ޞިއްހީ އޮފިޝަލުންނާ ހަވާލާދީ ރިޕޯޓު ކޮށްފައިވާ ގޮތުގައި އިސްރާއީލުން ވަނީ ކުޑަ ކުދިންގެ ހޮސްޕިޓަލަކަށް އަމާޒުކޮށް ވެސް ހަމަލާ ދީފައި.
އިސްރާއީލް އިން ސްކޫލަށް އަމާޒުކޮށް ދިން ހަމަލާތަކުގައި ލިބިފައިވާ ގެއްލުންތައް ބަލަން މަޑުކޮށްލައިގެން ހުރި އަންހެނެއް
އިސްރާއީލް އިން ޣައްޒާ ގައި ކުރިއަށް ގެންދާ ހަނގުރާމައިގައި، ބުދަ ދުވަހު ދިން ވައިގެ ހަމަލާގައި ޣައްޒާ ސްކޫލެއްގައި ތިބި 10 މީހަކު ޝަހީދުވެއްޖެ އެވެ.
ޣައްޒާގެ އުުތުރުގައި ހުރި ސްކޫލަކަށް އަމާޒުކޮށް ދިން ހަމަލާގައި ޝަހީދުވެފައި ވަނީ ހިޖުރަ ކުރި އާއިލާތަކަށް ނިސްބަތްވާ މީހުން ކަމަށް ވަނީ ރިޕޯޓުކޮށްފަ އެވެ.
މީގެ އިތުރުން ޞިއްހީ އޮފިޝަލުންނާ ހަވާލާދީ ރިޕޯޓު ކޮށްފައިވާ ގޮތުގައި އިސްރާއީލުން ވަނީ ކުޑަ ކުދިންގެ ހޮސްޕިޓަލަކަށް އަމާޒުކޮށް ވެސް ހަމަލާ ދީފަ އެވެ.
ހަނގުރާމަ ހުއްޓާލުމަށް އެކުލަވާލި އެއްބަސްވުމާ ޚިލާފަށް އިސްރާއީލް އިން ވަނީ މިދިޔަ މާޗު މަހުގެ ތެރޭގައި އަލުން ހަމަލާ ދޭން ފަށައިފަ އެވެ. އޭގެ ފަހުން މިހާތަނަށް 1600 އަށް ވުރެ ރައްޔިތުން ޝަހީދުވެފައިވާ ކަމަށް ޞިއްޙީ އިދާރާތަކުން ވަނީ ހާމަކޮށްފަ އެވެ.
ޖަރުމަނު، ފްރާންސް އަދި އިނގިރޭސިވިލާތުގެ ޚާރިޖީ ވަޒީރުން ވަނީ، ބައިނަލްއަޤުވާމީ ޤާނޫނުތަކާއި ޤަވާއިދުތަކަށް ތަބާވުމަށް އިސްރާއީލަށް ގޮވާލައިފަ އެވެ. އަދި ޣައްޒާ އަށް ބޭނުންވާ އިންސާނީ އެހީތެރިކަން އެތެރެ ކުރުމަށް ހުރަސް ނޭޅުމަށް ވެސް ވަނީ ގޮވާލައިފަ އެވެ.
ޔަފާ ސްކޫލަށް ދިން ހަމަލާ ގައި ޓެންޓު ތަކާއި ކްލާސްރޫމް ތަކުގައު އަލިފާން ރޯވެފައިވާ ކަމަށް މެޑިކަލް އޮފިޝަލުން ބުނ ެއެވެ. އަދި ސްކޫލުގެ ގޯތި ތެރޭގައި މީހުން އެމީހުންގެ ތަކެތި ހޯދަން މަސައްކަތް ކުރަމުންދާ ކަމަށް ބުނެފައިވެ އެވެ.
ޑުރާ ކުޑަކުދިންގެ ހޮސްޕިޓަލުގެ މަތީ ފަންގި ފިލާ އަށް އިސްރާއީލް އިން ފޮނުވާލި މިސައިލެއް ޖެހި، އިންޓެންސިވް ކެއަރ ޔުނިޓަށް ގެއްލުންވެ، ސޯލާ ޕެނަލް ސިސްޓަމް ހަލާކުވެފައިވާ ކަމަށް ޣައްޒާގެ ޞިއްހީ ވުޒާރާ އިން ބުނެފައިވެ އެވެ.
ނަމަވެސް މި ހަމަލާގައި އެއްވެސް މީހަކު ޝަހީދުވެފައި ނުވާ ކަމަށް ވަނީ ބުނެފަ އެވެ. އިސްރާއީލް އިން ދެމުން އަންނަ ވަރުގަދަ ހަމަލާތަކުގެ ސަބަބުން، މުޅި ޣައްޒާގެ ޞިއްހީ ނިޒާމު ވަނީ ފުނޑު ފުނޑުވެފައި އެވެ.
