ހައްސާސް ބައެއް މައްސަލަތަކުގައި ހަގީގަތާ ހިލާފު މައުލޫމާތު އާއްމުކުރޭ، މިއީ ގާނޫނުގެ ތެރެއިން ހައްލު ގެންނަންޖެހޭ ކަމެއް: މިނިސްޓަރު އިހުސާން
23 އެޕްރީލު 2025 | ބުދަ 08:36ނޫސްވެރިކަމުގެ މިނިވަންކަން ކަށަވަރުކުރުމަކީ ޑިމޮކްރަސީ ސޮސައިޓީއެއްގެ ވަރަށް މުހިންމު އަސާސްއެއް
ނޫސްވެރިންގެ ބައްދަލުވުމެއްގައި ހޯމް މިނިސްޓަރު އަލީ އިޙުސާން ބައިވެރިވެ ވަޑައިގަންނަވަނީ
ފުލުހުން ތަހުގީގު ކުރަމުންދާ ބައެއް މައްސަލަތަކުގައި ސައްހަ ނޫން މައުލޫމާތުތައް އާއްމު ކުރަމުންދާ ކަމަށާއި، މިއީ ގާނޫނީ އޮނިގަނޑުގެ ތެރެއިން ކޮންމެވެސް ހައްލެއް ގެންނަންޖެހޭ ކަމެއް ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެއެވެ.
ބުދަ ދުވަހު ރައްޔިތުން މަޖިލީހުގައި މިނިސްޓަރު އިހުސާން ވިދާޅުވީ ނޫސްވެރިކަމުގެ މިނިވަންކަން ކަށަވަރުކުރުމަކީ ޑިމޮކްރަސީ ސޮސައިޓީއެއްގެ ވަރަށް މުހިންމު އަސާސްއެއް ކަމަށާއި، ނަމަވެސް ޒިންމާދާރު ކަމާއެކު ނޫސްވެރިކަން ކުރަން ޖެހޭ ކަމަށެވެ.
ދާޚިލީ ސަލާމަތާއި ފަންނިއްޔާތާ ބެހޭ ވުޒާރާގެ ބައެއް ކަންބޮޑުވުންތައް ހުރިކަން ފާހަގަކުރައްވައި މިނިސްޓަރު އިހުސާން ވިދާޅުވީ ފުލުހުން ކުރިއަށް ގެންދާ ތަހުގީގުގައި، ފުލުހުންގެ އިދާރާއިން މައުލޫމާތު ހާމަ ކުރުމުގެ ކުރިން ސައްހަ ނޫން މައުލޫމާތު އެހެން ފަރާތްތަކުން އާއްމުކުރާ ކަމަށެވެ. މިކަމުގެ ތެރޭގައި އެތައް ބައެއްގެ ހައްގުތައް ގެއްލިގެންދާ ކަމަށާއި، ވިކްޓިމްއާއި، ވިކްޓިމްގެ އާއިލާގެ ކަރާމާތް ވަރަށް ބޮޑަށް ގެއްލޭ ކަމަށް މިނިސްޓަރު އިހުސާން ވިދާޅުވިއެވެ.
މިނިސްޓަރު އިހުސާން ވިދާޅުވީ ހައްސާސީ މައްސަލަތަކުގައި ހަގީގަތާ ހިލާފު ވާހަކަތައް ދައުރުވާ މައްސަލާގައި، ރައްޔިތުންގެ މަޖިލީހުން ގާނޫނީ އޮނިގަނޑުގެ ތެރެއިން ކޮންމެވެސް ކަހަލަ ހައްލެއް ގެންނަން ޖެހޭ ކަމަށެވެ. ނަމަވެސް ނޫސްވެރިކަމަށް ލިބިފައި އޮންނަ ބާރުތައް ހަނިކޮށް ނޫސްވެރިކަމަށް ހުރަސްއެޅުމަކީ ސަރުކާރުން ގަބޫލުކުރާ ކަމެއް ނޫން ކަމަށް ވެސް މިނިސްޓަރު އިހުސާން ވިދާޅުވިއެވެ.
އަޅުގަނޑުމެން ފުލުހުންގެ ތަހުގީގެއްގައި ރައްޔިތުންނާ ހިސާބަށް މައުލޫމާތު ހާމަކުރެވޭ ވަރު ވެގެން އެ މައުލޫމާތު ހާމަކުރެވޭއިރުގައި މިހާރުގައި މިކަންކަން އޮންނަ ގޮތުން ސައްހަ ނޫން މައުލޫމާތު ފެތުރެމުން ފެތުރެމުން ގޮސް މިތިބެނީ ވަކި އެއްޗެއް ގަބޫލުކުރާ ހާލަތުގައި. އެހެންވީމަ އަޅުގަނޑުމެން ފުލުހުން އެ މައުލޫމާތުތައް ސައްހަ މައުލޫމާތުތައް ހޯދައިގެން ތަހުގީގަށް ކަށަވަރުކުރެވިގެން އެ މައުލޫމާތު ރައްޔިތުންނާ ހިސާބަށް ގެންނައިރު ބައެއް ފަހަރު މާ ލަސްވެސް އެބަވޭ. މިކަމުގެ ތެރޭގައި އެތައް ބައެއްގެ ހައްގުތައް ގެއްލިގެންދޭ. އަޅުގަނޑު ގަބޫލުކުރާ ގޮތުގައި އިއްޒަތްތެރި މަޖިލީހުން އަޅުގަނޑުމެންގެ ގާނޫނީ އޮނިގަނޑުގެ ތެރެއިން ބައްލަވާފައި ކޮންމެވެސް ކަހަލަ ހައްލެއް ގެންނަވަންޖެހިދާނެ މައްސަލައެއް ކަމަށް އަޅުގަނޑު ގަބޫލުކުރަން.ހޯމް މިނިސްޓަރު އަލީ އިހުސާން
ފުލުހުން ތަހުގީގު ކުރަމުންދާ ބައެއް މައްސަލަތަކުގައި ސައްހަ ނޫން މައުލޫމާތުތައް އާއްމު ކުރަމުންދާތީ ގާނޫނީ އޮނިގަނޑުގެ ތެރެއިން ކޮންމެވެސް ހައްލެއް ގެންނަންޖެހޭ ކަމެއް މިނިސްޓަރު އިހުސާން ވިދާޅުވިއިރު، ފުރާޅެއްގެ މައްޗަށް ވެއްޓިފައި އޮއްވައި ފެނުނު އުމުުރުން 21 އަހަރުގެ ޒުވާން އަންހެން މީހާގެ މައްސަލާގައި ފުލުހުން މައުލޫމާތު ހިއްސާކޮށްފައިވަނީ 22 އޭޕްރީލް 2025 ވީ އަންގާރަ ދުވަހުގެ ރޭގެ ވަގުތެއްގައެވެ.
އެއީ އެކްސްގައި ހަރަކާތްތެރިވާ ހަސަން ކްރުސީ އެކައުންޓުން މި ކޭސްއާ ގުޅޭ ގިނަ މައުލޫމާތުތަކެއް އާއްމު ކުރިފަހުން ފުލުހުންނަށް މަޖުބޫރުވެގެން ބޭއްވި ނޫސްވެރިންގެ ބައްދަލުވުމެއް ކަމަށް ގިނަ ބަޔަކު ދަނީ ތުހުމަތު ކުރަމުންނެވެ.
