ދިވެހިބަހާއި އަދަބިއްޔާތަށް ގިނަ ޚިދުމަތްތަކެއް ކޮށްދެއްވި މަޑުލު މުޙައްމަދު ވަޙީދު އަވަހާރަވެއްޖެ

ދިވެހިބަހާއި އަދަބިއްޔާތަށް ގިނަ ޚިދުމަތްތަކެއް ކޮށްދެއްވި މަޑުލު މުޙައްމަދު ވަޙީދު އަވަހާރަވެއްޖެ އެވެ.

އޭނާ އަވަހާރަވީ އައިޖީއެމްއެޗްގެ އައިސީޔޫގައި ފަރުވާ ދެމުންދަނިކޮށެވެ. އަދި އޭނާ އަވަހާރަވެފައި ވަނީ އާލާސްކަންފުޅާ އުޅުއްވާތާ ދުވަސްކޮޅެއް ފަހުންނެވެ.

1985 ވަނަ އަހަރު އާޢްމު ޚިދުމަތުގެ އިނާމް ހާސިލްކުރައްވާފައިވާ މުހައްމަދު ވަޙީދު އަކީ ދިވެހިބަހުގެ ލިޔުންތެރިކަން ކުރިއެރުވުމުގެ ރޮނގުން އަދި 2019 ޝަރަފުވެރިކަމުގެ ޤައުމީ އިނާމު ހާސިލްކުރައްވާފައިވާ ބޭފުޅެކެވެ.

މުޙައްމަދު ވަޙީދަކީ، ލިޔުންތެރިކަމުގެ ރޮނގުން ފާހަގަކޮށްލެވުނު ކުޅަދާނަ ބޭފުޅެކެވެ. މަދަރުސީ ދައުރުގައި އޭނާ ބޮޑަށް މަޝްހޫރުވެވަޑައިގެންފައި ވަނީ ހޯރަފުށީ ވަޙީދުގެ ނަމުންނެވެ. އޭނާ އަކީ ފެންނަ މަންޒަރާއި އިވޭ އަޑުތައް އެއްވެސް ފޮރުވުމެއްނެތި ލިޔުއްވުމަށް ޝައުޤުވެރިކަން ބެހެއްޓެވި ބޭފުޅެކެވެ.

އޭނާ އަކީ ރޭޑިޔޯއަށް ލިޔުމާއި، ޚަބަރު ލިޔުމުގެ ތަމްރީން އިންޑިޔާއިންނާއި، އިނގިރޭސިވިލާތުންނާއި، ޔޫގޯސްލޭވިޔާއިން ހާސިލްކުރައްވާފައިވާ ބޭފުޅެކެވެ.

އޭނާގެ ލިޔުންތެރިކަމަށް ބަލާ އިރު އޭނާގެ ލިޔުންތެރިކަމުން އިނގިރޭސިބަހުން ދިވެހިބަހަށް ތަރުޖަމާކުރެއްވި ލިޔުންތައް ހިމެނެއެވެ. މީގެ އިތުރުން އިޖްތިމާޢީ މައްސަލަތަކާއި، މީހުންނަށް ދިމާވާ އާދަޔާ ޚިލާފު ދަތި ޙާލަތު ސިފަކޮށްދޭ އަސަރުގަދަ ލިޔުންތައް އޭނާ ވަނީ އާއްމުންނާއި ހަމައަށް ގެނެސްދެއްވާފައެވެ.

މުހައްމަދު ވަހީދަކީ 1973ވަނަ އަހަރުން ފެށިގެން މެދުނުކެނޑި 10 އަހަރުވަންދެން ބޭރު ދުނިޔޭގެ ޚަބަރުތައް ގެނެސްދެއްވި ބޭފުޅެއް ވެސް މެއެވެ.

މީގެ އިތުރުން އޭނާ ވަނީ 1966 އިން ފެށިގެން ސަރުކާރުގެ ޚިދުމަތުގައި 35 އަހަރަށްވުރެ ދިގު މުއްދަތެއް ހޭދަކުރައްވާފައިވެއެވެ.