ދައުލަތުގެ ބަޖެޓުން ޕީއެންސީއަށް 13 މިލިއަން ރުފިޔާ ދީފި
2025 ވަނަ އަހަރުގެ ބަޖެޓުން ސިޔާސީ ޕާޓީތަކަށް 27،981،256 ރުފިޔާ ދޫކުރި
ސިޔާސީ ޕާޓީތަކަށް 27 މިލިއަން ރުފިޔާ ވަނީ ދޫކޮށްފައި
2025 ވަނަ އަހަރުގެ ބަޖެޓުން ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕިއެންސީ) އަށް 13 މިލިއަން ރުފިޔާ ދޫކޮށްފި އެވެ.
އިލެކްޝަންސް ކޮމިޝަނުން ބުނީ އެ ކޮމިޝަނުގައި ރަޖިސްޓްރީ ކޮށްފައިވާ ސިޔާސީ ޕާޓީ ތަކުގެ ތެރެއިން 2025 ވަނަ އަހަރުގެ ބަޖެޓުން ރައްޔިތުންގެ މަޖިލިހުން ފާސްކުރި ދުވަހާ ހަމައަށް 10،000 މެންބަރުން ހަމަވި ސިޔާސީ ޕާޓީތަކަށް 2025 ވަނަ އަހަރުގެ ދައުލަތުގެ ބަޖެޓުގައި އާމްދަނީ އިން ސިޔާސީ ޕާޓީތަކަށް ދޫކުރާ 0.01 އިންސައްތައަށްވާ 27،981،256 ރުފިޔާ ބަހާފައިވާ ކަމަށެވެ.
އެގޮތުން އިލެކްޝަންސް ކޮމިޝަނުން އާންމުކުރި މައުލޫމާތު ދައްކާގޮތުން އެންމެ ގިނައިން ފައިސާ ދިފައިވަނީ ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ) އަށެވެ. ދެވަނަ އަށް އެންމެ ގިނައިން ފައިސާ ދީފައިވަނި އިދިކޮޅު މައި ޕާޓީ ދިވެހިރައްޔިތުންގެ ޑިމޮކްރަޓިކް ޕާޓީ (އެމްޑީޕީ) އަށެވެ. އަދި ތިންވަނައަށް އެންމެ ގިނަ ފައިސާ ދޫކޮށްފައިވަނީ ޖުމްހޫރީ ޕާޓީ އަށެވެ. މީގެ އިތުރުން އަދާލަތު ޕާޓީ އަދި މޯލްޑިވްސް ޑިވޮލަޕްމަންޓް އެލަޔަންސް (އެމްޑީއޭ) އަށް ވެސް ފައިސާ ދޫކޮށްފައިވެ އެވެ.
ފައިސާ ދޫކުރި ގޮތުގެ ތަފްސީލު
- ޕީޕަލްސް ނެޝަނަލް ކޮންގްރެސް (ޕީއެންސީ) - 13،326،689.57 ރުފިޔާ
- ދިވެހިރައްޔިތުންގެ ޑިމޮކްރަޓިކް ޕާޓީ (އެމްޑީޕީ) - 8،454،780.51 ރުފިޔާ
- ޖުމްހުރީ ޕާޓީ (ޖޭޕީ) - 2،671،598.57 ރުފިޔާ
- މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ) - 1،779،648.69
- އަދާލަތު ޕާޓީ (އޭޕީ) - 1،748،538.65 ރުފިޔާ
5 ޕާޓީއަކަށް ފައިސާ ދީފައިވާ އިރު، 4 ޕާޓީއަކުން ގާނޫނާއި ގަވާއިދާ ހިލާފުވެގެން ކޮށްފައިވާ ޖޫރިމަނާގެ ތެރެއިން ނުލިބިހުރި ފައިސާ ވަނީ އުނިކޮށްފަ އެވެ.
އެގޮތުން ޖޫރިމަނާގެ ފައިސާ އުނިކޮށްފައި ނުވަނީ އިދިކޮޅު މައި ޕާޓީ އެމްޑީޕީންނެވެ. ޕީއެންސީ އަދި އެމްޑީއޭ 10،000 ރުފިޔާގެ ޖޫރިމަނާއެއް އޮތް އިރު ޖުމްހޫރީ ޕާޓީގެ 15،000 ރުފިޔާގެ ޖޫރިމަނާއެއް އަދި އަދާލަތު ޕާޓީގެ 35،000 ރުފިޔާގެ ޖޫރިމަނާއެއް އޮތެވެ.
ޖޫރިމަނާ ފައިސާ އުނިކުރުމަށްފަހު ދޫކުރި ފައިސާގެ ޖުމްލަ
- ޕީޕަލްސް ނެޝަނަލް ކޮންގްރެސް (ޕީއެންސީ) - 13،316،689.57 ރުފިޔާ
- ދިވެހިރައްޔިތުންގެ ޑިމޮކްރަޓިކް ޕާޓީ (އެމްޑީޕީ) - 8،454،780.51 ރުފިޔާ
- ޖުމްހުރީ ޕާޓީ (ޖޭޕީ) - 2،656،598.57 ރުފިޔާ
- މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ) - 1،769،648.69
- އަދާލަތު ޕާޓީ (އޭޕީ) - 1،713،538.65 ރުފިޔާ
31 ޑިސެމްބަރު 2024 ގެ ނިޔަލަށް މެންބަރު ތިބި އަދަދަށް ބަލާއިރު، ޕީޕަލްސް ނެޝަނަލް ކޮންގްރެސް (ޕީއެންސީ) ގައި ތިބީ 68،968 މެންބަރުންނެވެ. ދިވެހިރައްޔިތުންގެ ޑިމޮކްރަޓިކް ޕާޓީ (އެމްޑީޕީ) ގައި ތިބީ 43،755 މެންބަރުންނެވެ. އަދި ޖުމްހުރީ ޕާޓީ (ޖޭޕީ) ގައި 13،826 މެންބަރުން ތިބި އިރު، މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ) ގައި ތިބީ 9،210 އަދި އަދާލަތު ޕާޓީ (އޭޕީ) ތިބީ 9،049 މެންބަރުންނެވެ.
ދައުލަތުގެ ބަޖެޓުން ސިޔާސީ ޕާޓީތަކަށް ފައިސާ ދޭން ޕާޓީތައް ކަނޑައަޅަނީ ކޮންމެ އަހަރެއްގައި ވެސް ރައްޔިތުންގެ މަޖިލީހުން ކުރިއަށް އޮތް އަހަރަށް ބަޖެޓް ފާސްކުރާ ދުވަހު ސިޔާސީ ޕާޓީތަކުގެ މެންބަރުންގެ ގޮތުގައި 10،000 މެންބަރުން ހަމަވާ ޕާޓީތަކަށެވެ. އަދި އެ ދުވަހު ޕާޓީތައް ކަނޑައެޅި ނަމަވެސް ޕާޓީތަކަށް ފައިސާ ދޫކުރަނީ އަހަރު ނިމޭ ދުވަހު ޕާޓީގައި ތިބި މެންބަރުންގެ އަދަދަށް ބަލާފަ އެވެ.
މިއަހަރުގެ ބަޖެޓް މިދިޔަ އަހަރު ފާސްކުރީ 27 ނޮވެމްބަރުފައެވެ. އެހެންކަމުން 31 ޑިސެމްބަރު 2024 ގެ ނިޔަލަށް އަދާލަތު ޕާޓީ އަދި އެމްޑީއޭއިން ވަނީ ހާހަކަށް ވުރެ ގިނަ މެންބަރުން އުނިވެފަ އެވެ.
