ޔުއެފާ ޗެމްޕިއަންސް ލީގުގެ ކުއާޓާ ފައިނަލް ފުރަތަމަ ލެގުގައި ރޭ އެސްޓަން ވިލާއާ ދެކޮޅަށް ކުޅުނު މެޗު 3-1 ގެ ނަތީޖާއަކުން ޕީއެސްޖީން ކާމިޔާބުކޮށްފިއެވެ.

ޕީއެސްޖީގެ ދަނޑުގައި ކުޅުނު މި މެޗުގައި އެ ޓީމުން ވަނީ ރަނގަޅު ކުޅުމެއް ދައްކައި އެސްޓަން ވިލާގެ ގޯލަށް ނުރައްކާތެރި ގިނަ ހަމަލަތަކެއް ފޮނުވާލާފަ އެވެ.

މޮޅަސް ކުޅެ ގިނަ ހަމަލާތަކެއް އުފެއްދި ނަމަވެސް ފްރާންސްގެ ލީގު ޗެމްޕިއަން ޕީއެސްޖީ އަށް ސިހުން ލިބިގެންދިޔައީ މެޗުގެ 35 ވަނަ މިނިޓުގައި އެސްޓަން ވިލާއިން ލަނޑު ޖަހައި ލީޑު ހޮދުމުންނެވެ. އެދސްޓަން ވިލާއަށް ލީޑު ހޯދައިދިން މި ލަނޑު ޖަހައިދިނީ ޔޫރީ ޓިއެލެމަންސް އަރިމަތިން ނަގައިދިން ހުރަހަކުން މޯގަން ރޮޖާރސް އެވެ.

އެސްޓަން ވިލާއިން މެޗުގެ ލީޑު ހޯދި ނަމަވެސް އެ ލިޑުގައި އެޓީމަށް ދެމި އޮވެވުނީ އެންމެ ހަތަރު ވަރަކަށް މިނެޓަށެވެ. ޕީއެސްޖީގެ ޑިސަޔާ ޑޯއޭ ވަނީ ލަނޑެއް ޖަހާ މެޗުގެ ނަތީޖާ އެއްވަރުކޮށްފަ އެވެ. މި ލަނޑަކީ އޭރިޔާ ބޭރުން ފޮނުވާލައިގެން އޭނާ ކާމިޔާބުކޮށްފައިވާ ވަރަށް ރީތި ލަނޑެކެވެ.

މި މެޗުގެ ދެވަނަ ހާފުގެ ކުޅުން ފެށުނުތާ ހަތަރުވަނަ މިނިޓުގައި ޕީއެސްޖީއަށް ކުޅެމުންދާ ޖިއޯޖިއާގެ މިޑްފީލްޑަރ ކަވީޗާ ކްވަރަޓްސްކޭލިއާ ވަނީ އިތުރު ލަނޑެއް ޖަހާ މި މެޗުގައި ފުރަތަމަ ފަހަރަށް ޕީއެސްޖީއަށް ކުރި ހޯދަދީފަ އެވެ.

މި މެޗުގައި ޕީއެސްޖީ އިން އުފެއްދި ގިނަ ހަމަލަތަކެއް އެސްޓަން ވިލާގެ ގޯލުކީޕަރު އެމިލިއާނޯ މާޓިނޭޒް ވަނީ ވަރަށް ހުށިޔާރު ކަމާއެކު ދިފާއުކޮށްފަ އެވެ. ޕީއެސްޖީ އިން މި މެޗުގައި ޖެހި ތިންވަނަ ލަނޑު މެޗުގެ އިތުރު ވަގުތުގެ ކުޅުމުގައި އެ ޓީމަށް ކާމިޔާބުކޮށްދީފައިވަނީ ނޫނޯ މެންޑޭޒް އެވެ.

މި ނަތީޖާ އާއިއެކު އަންނަ ހަފްތާގައި އެސްޓަން ވިލާގެ ދަނޑުގައި މި ދެ ޓީމުގެ ދެވަނަ ކުރިމަތިލުމަށް ނިކުންނައިރު އެސްޓަން ވިލާއަށް ކުރަން ޖެހިފައިވާ މަސައްކަތް ވަނީ ބޮޑުވެފަ އެވެ. އަދި މި ،މެޗުން މޮޅުވުމުން ޕީއެސްޖީއަށް ސެމީއަށް ދިއުމަށް އޮތް މަގު ވަނީ ފަސޭހަވެފައެވެ.