މިހާރު ކުރިއަށްދާ، ފީއަލީ ޑިވެލޮޕްމަންޓް ސޮސައިޓީ (އެފްޑީއެސް) އިން އިންތިޒާމު ކޮށްގެން ކުރިއަށް ގެންދާ ފުޓުބޯޅަ މުބާރާތުގެ ފަހު މެޗުގައި ޑީޓެން އެކްސްޕްރެސް ބަލިކޮށް ކެމަލް އިން މުބާރާތުގެ ފައިނަލްގެ ޖާގަ ހޯދިއިރު، ފަހު މެޗަށް އިންތިޒާރު ކުރި އަލް ޙަދީދު މުބާރާތުން ކަޓައިފި އެވެ.

ފަސް ޓީމު ވާދަކުރާ މި މުބާރާތް ކުރިއަށް ގެންދަނީ ލީގު އުސޫލުންނެވެ. ލީގު ބުރުގެ ކުޅުން ނިމޭއިރު، އެއް ވަނަ ޓީމު އަދި ދެ ވަނަ ޓީމު މުބާރާތުގެ ފައިނަލަށް ދާ ގޮތަށެވެ.

އެއް ވަނައިގައި މުބާރާތުގެ ފައިނަލްގެ ޖާގަ ހޯދީ ފަރުކަން ސްޕޯޓްސް ކުލަބުންނެވެ. ދެ ވަނައިގެ ޖާގަ އަށް އޮތީ ވާދަވެރިކަން ބޮޑުވެފަ އެވެ. އެއީ އަލް ޙަދީދު އަދި ކެމަލްގެ ދެ މެދުގަ އެވެ.

މުބާރާތުގެ ފަހު މެޗުގައި ޑީޓެން އަދި ކެމަލް ބައްދަލު ކުރިއިރު، އެ މެޗުން މޮޅުވެ ފައިނަލަށް ދިޔުމުގެ ފުރުސަތު ކެމަލް އަށް އޮތެވެ. އެ މެޗުގައި ޑީޓެން އިން ކެމަލް ބަލިކޮށްފި ނަަމަ، ނުވަތަ މެޗު އެއްވަރުވެއްޖެ ނަމަ އަލް ޙަދީދަށް ފައިނަލްގެ ފުރުސަތު އޮތެވެ.

ބުދަ ދުވަހުގެ ހަވީރު ކުޅުނު މެޗު ކެމަލް އިން ކާމިޔާބު ކުރީ 4-2 އިންނެވެ. އެއީ މެޗުގައި ޑީޓެން އިން ލަނޑު ޖަހައި ކުރި ހޯދާފައި ވަނިކޮށް، ފަހަތުން އަރައި ހަތަރު ލަނޑު ޖަހައިގެންނެވެ.

މެޗު ފަށައިގެން ފަސް ވަނަ މިނެޓުގައި ޑީޓެން އަށް ލީޑު ނަގައިދިނީ އަލީ އަސްވީން އެވެ. ނަމަވެސް، ހަތް ވަނަ މިނެޓުގައި މުޙައްމަދު އަހުސާން ޖެހި ލަނޑުން ކެމަލް ނަތީޖާ ހަމަހަމަ ކުރި އެވެ.

މެޗުގައި ކެމަލް އިން ލީޑު ނެގީ ވެސް އަހުސާމް ޖެހި ލަނޑުންނެވެ. އެ ޓީމުގެ ފަހު ދެ ލަނޑު ޖެހީ އަލޫފް ޢަބްދުﷲ އަދި ފަވާޒް ޢަބްދުﷲ އެވެ. މެޗުގައި ޑީޓެންގެ ފަހު ލަނޑު ޖެހީ އާދަމް ޢަބްދުﷲ އެވެ.

މެޗުގެ މޮޅު ކުޅުންތެރިޔަކަށް ހޮވުނީ ކެމަލް އަށް ދެ ލަނޑު ޖަހައިދިން އަހުސާމް އެވެ.

ފަރުކަން އަދި ކެމަލް ބައްދަލު ކުރާ ފައިނަލް މެޗު އޮންނާނީ ހުކުރު ދުވަހުގެ ހަވީރު އެވެ.