މި ސަރުކާރުގެ ފުރަތަމަ ޓުއަރިޒަމް މިނިސްޓަރ އިބްރާހިމް ފައިސަލްގެ ގެކޮޅަށް ފުލުހުން ރެއިޑްކުރަން އުޅުނު ކަމަށް ދެކެވޭ ވާހަކަތަކައް ފުލުހުން ދޮގުކޮށްފިއެވެ.

ހޯމަ ދުވަހު، ބައެއް މީޑިއާތަކުން ރިޕޯޓްކޮށްފައިވާ ގޮތުން ރެއިޑްކުރަން އުޅުނީ މާލޭގައި ފައިސަލް ދިރިއުޅުއްވި ގެކޮޅެވެ. އަދި ރެއިޑްކުރަން އުޅުނީ ޓުއަރިޒަމް މިނިސްޓަރުގެ މަގާމުން ޖެނުއަރީ 28، ގައި ފައިސަލް ވަކި ކުރުމަށްފަހު ކަމަށް ވެސް އެ މީޑިއާތަކުން ރިޕޯޓްކޮށްފައި ވެއެވެ.

އެކަމާއި ގުޅިގެން ފައިސަލް އަށް ވަޓްސްއެޕް އިންނާއި ފޯނުން ގުޅާ، މެސެޖު ކުރި ނަމަވެސް ފައިސަލް ފޯނަށް ޖަވާބު ނުދެއްވާތީ މިކަމާއި މެދު ފައިސަލްގެ ބަހެއް ވަނީ ލިބޭ ގޮތް ނުވެފައެވެ.

ފައިސަލް އާއި ގުޅުންހުރި އެއްވެސް މައްސަލަ އެއް ފުލުހުން ބަލަމުންދޭތޯ ސުވާލުކުރުމުން ފުލުހުން ވަނީ އެކަން ދޮގުކޮށްފައެވެ. އަދި ފައިސަލްގެ ގެކޮޅަށް ރެއިޑްކުރަން އުޅުނު ކަމަށް ބުނާ ވާހަކަ ވެސް ދޮގުކޮށްފައިވެއެވެ.

އެހެންނަމަވެސް ނަންހާމަ ނުކުރުމަށް ޝަރުތުކޮށް އިތުބާރު ހުރި މަސްދަރަކުން ރާއްޖެއެމްވީ އަށް މައުލޫމާތު ދިން ގޮތުގައި ފައިސަލްގެ ގެކޮޅަށް ރެއިޑްކުރުމަށް މަސައްކަތް ކޮށްފައި ވަނީ ފުލުހުންގެ އިދާރާގައި ތިބި ސަރުކާރަށް އިތުބާރު ކުރެވޭ ބައެއް އޮފިސަރުންނާއި، އެ އޮފިސަރުންނަށް އިތުބާރު ކުރެވޭ ވަކި ފުލުހުންތަކެއް މެދުވެރިކޮށް ވަރަށް ސިއްރުންނެވެ. އަދި ފައިސަލް ދިރިއުޅުއްވާ ގެކޮޅު ރެއިޑްކުރުމަށް ކޯޓު އަމުރު ހޯދުމަށް ބައެއް ފަނޑިޔާރުންނާއި މުއާމަލާތު ކުރި ކަމަށް އެނގިފައިވާ ކަމަށް އޭނާ ވަނީ ބުނެފައެވެ.

އޭނާ ބުނި ގޮތުގައި އެކަން ނުވީ ފަނޑިޔާރުންގެ ފަރާތުން އެއްބާރުލުން ނުލިބުމުން ކަމަށް ފުލުހުންގެ އިދާރާގެ އެތެރޭގައި އަޑު ފެތުރިފައިވެއެވެ. އަދި ފައިސަލްގެ ބައްޕާފުޅު މަޖިލީހުގެ ރައީސް އަބްދުއްރަހީމް އަބްދުﷲގެ ސަމާލުކަމަށް ފައިސަލްގެ ގެކޮޅަށް ރެއިޑްކުރަން އުޅޭކަން އައުމުން، ފައިސަލްގެ ގެކޮޅަށް ރެއިޑް ނުކުރެވުނީ ކަމަށް ވެސް ފުލުހުންގެ އިދާރާގެ އިސް ބައެއް މީހުން މި މައްސަލައިގައި ވާހަކަދައްކަމުން ބުނެފައިވާ ކަމަށް އޭނާ ހާމަކުރިއެވެ.

އެހެންނަމަވެސް ރަސްމީކޮށް މިކަމާއި ގުޅޭގޮތުން ފުލުހުން ވަކި އެއްޗެއް ހާމަ އެއް ނުކުރެއެވެ. އެހެންކަމުން ފައިސަލްގެ މައްސަލަ އެއް ފުލުހުން ބަލާކަމެއް، އަދި އޭނާ އަށްކުރަނީ ކޮން ތުހުމަތުތަކެއް ކަން ސާފެއް ނޫނެވެ. ކުއްލި ގޮތަކަށް ފައިސަލް މަގާމުން ވަކި ކުރި ރަސްމީ ސަބަބު ރައީސް ޑރ.މުހައްމަދު މުއިއްޒު ވެސް އަދި ސަރުކާރުން ވެސް ހާމަ އެއް ނުކުރައްވައެވެ.