ފީއަލީ ޑިވެލޮޕްމަންޓް ސޮސައިޓީ (އެފްޑީއެސް) އިން އިންތިޒާމު ކޮށްގެން ކުރިއަށް ގެންދިޔަ، އެފްޑީއެސް އަންހެން ވޮލީ ބޯޅަ މުބާރާތުގެ ޗެމްޕިއަންކަން ފަރުކަން ސްޕޯޓްސް ކުލަބުން ހޯދައިފި އެވެ.

ހޯމަ ދުވަހުގެ ރޭ ފީއަލީ އެއް ނަންބަރު ވޮލީ ކޯޓުގައި ކުޅުނު ފައިނަލް މެޗު ފަރުކަން އިން ކާމިޔާބު ކުރީ ތިން ސެޓު އެއް ސެޓުންނެވެ.

މުބާރާތުގެ ލީގު ބުރުގައި ވެސް މި ދެ ޓީމު ވަނީ ބައްދަލު ކޮށްފަ އެވެ. ތިން ސެޓު އެއް ސެޓުން އެ މެޗު ކާމިޔާބު ކުރީ ޑްރީމަރސް އެވެ.

ފައިނަލް މެޗުގެ ފުރަތަމަ ސެޓު ކާމިޔާބު ކުރީ ފަރުކަން އިންނެވެ. ނަމަވެސް، ވާދަވެރި ކުޅުމަކަށްފަހު ޑްރީމަރސް އިން ވަނީ ދެ ވަނަ ސެޓު ކާމިޔާބު ކޮށްފަ އެވެ.

ކޮންމެ ޓީމެއް އެއް ސެޓު ކާމިޔާބު ކުރިއިރު، ދެން ކުޅުނު ދެ ސެޓު ވެސް ފެނުނީ ވާދަވެރި ކޮށެވެ. ތިން ވަނަ ސެޓާއި، ހަތަރު ވަނަ ސެޓުގައި ކުރި ހޯދައި ފަރުކަން އިން ވަނީ މުބާރާތުގެ ޗެމްޕިއަންކަން ހޯދައިފަ އެވެ.

ފައިނަލް މެޗުގެ މޮޅު ކުޅުންތެރިޔަކަށް ހޮވުނީ ފަރުކަންގެ ނަރީމާ އިދުރީސް އެވެ.

މުބާރާތުގެ ޑްރީމް ޓީމުގައި ހިމެނުނީ ޗެމްޕިއަން ފަރުކަން ގެ ނަރީމާ، ވަރުދާ، ޝާހިރާ މުޙައްމަދުގެ އިތުރުން، ޑްރީމަރސް ގެ ލީމް އަޙުމަދު، އަހުލާމާ އަދި ކެމަލްގެ އިބާ ޢަބްދުﷲ އެވެ. މުބާރާތުގެ އެންމެ މޮޅު ލިބަރޯ އަކަށް ހޮވުނީ ޑްރީމަރސް ގެ އައިޝަތު ޝިޔާ އެވެ.

މުބާރާތުގެ އެންމެ އުންމީދީ ކުޅުންތެރިޔަކަށް ހޮވުނީ ކެމަލް ގެ ރިވާ ޖަލީލް އެވެ. މުބާރާތުގެ އެންމެ މޮޅު ކުޅުންތެރިޔަކަށް ހޮވުނީ ޑްރީމަރސް ގެ އައިޝަތު ރީމާ އެވެ. މީގެ އިތުރުން މުބާރާތުގެ އެންމެ މޮޅު ކޯޗަކަށް ހޮވުނީ ޗެމްޕިއަން ފަރުކަންގެ ވިސާމް އަޙުމަދު އެވެ.

މުބާރާތުގެ ފެއާ ޕްލޭ ޓީމަކަސް ހޮވުނީ ނައިޓް ކުއީންސް އެވެ.

އެފްޑީއެސް އިން އިންތިޒާމު ކޮށްގެން ކުރިއަށް ގެންދިޔަ އަންހެން ވޮލީ މުބާރާތުގައި ހަތަރު ޓީމު ވަނީ ބައިވެރިވެފަ އެވެ.