ފީއަލީ ޑިވެލޮޕްމަންޓް ސޮސައިޓީ (އެފްޑީއެސް) އިން އިންތިޒާމު ކޮށްގެން ކުރިއަށް ގެންދާ ފުޓުބޯޅަ މުބާރާތުގައި، ނައިޓް ކިންގްސްއާ ދެކޮޅަށް ކުޅުނު މެޗުން ޑީޓެން އެކްސްޕްރެސް މޮޅުވެއްޖެ އެވެ.

ހޯމަ ދުވަހުގެ ހަވީރު ފީއަލީ ފުޓުބޯޅަ ދަނޑުގައި ކުޅުނު މެޗު ޑީޓެން އިން ކާމިޔާބު ކުރީ 6-2 ގެ ނަތީޖާ އަކުންނެވެ.

މެޗުގެ ފުރަތަމަ ހާފުގައި ޑީޓެން އިން ދެ ލަނޑު ޖެހިއިރު، ނައިޓް ކިންގްސް އިން ވެސް ލަނޑެއް ޖެހި އެވެ. ޑީޓެން އިން އެ ޓީމުގެ އަނެއް ހަތަރު ލަނޑު ދެ ވަނަ ހާފުގައި ޖެހިއިރު، މި ހާފުގައި ނައިޓް ކިންގްސް އިން ވެސް ލަނޑެއް ޖެހި އެވެ.

މެޗުގެ ފުރަތަމަ ހާފުގެ 18 ވަނަ މިނެޓުގައި ޑީޓެން އަށް ލީޑު ނަގައިދިނީ އިސްމާއީލް ނަސީރު (އިއްސެ) އެވެ. އޭގެ ފަހުން އެ ޓީމުންް ލީޑު ފުޅާ ކުރީ އާދަމް ޢަބްދުﷲ ޖެހި ލަނޑުންނެވެ. ފުރަތަމަ ހާފުގައި ނައިޓް ކިންގްސްގެ ހަމައެކަނި ލަނޑު ޖެހީ މަސީހު އަޙުމަދު އެވެ.

މެޗުގެ ދެ ވަނަ ހާފު ފަށައިގެން 22 ވަނަ މިނެޓުގައި އިޒްދާން އުސްމާން ޖެހި ލަނޑުން ޑީޓެން ވަނީ ލީޑު އިތުރަށް ފުޅާ ކޮށްފަ އެވެ. އޭގެ ފަހުން ނައިޓް ކިންގްސްގެ އައްސަދު ވަނީ ލަނޑެއް ޖަހައިފަ އެވެ.

މެެޗުގައި ޑީޓެންގެ ހަތަރު ވަނަ ލަނޑު ޖެހީ އިއްސެ އެވެ. އޭގެ ފަހުން އެ ޓީމުގެ ޢަބްދުﷲ ޒަމީރު ވަނީ އެ ޓީމުގެ ފަސް ވަނަ ލަނޑު ޖަހައިފަ އެވެ. މެޗުގައި ޑީޓެންގެ ހަ ވަނަ ލަނޑު ޖަހައި އިއްސެ ވަނީ މެޗުގައި ހެޓްރިކް ހަމަކޮށްފަ އެވެ.

މެޗުގެ މޮޅު ކުޅުންތެރިޔަކަށް ހޮވުނީ ވެސް އިއްސެ އެވެ.

ފަސް ޓީމު ވާދަކުރާ މުބާރާތުގެ ފައިނަލަށް ދާނީ، ލީގު ބުރުގެ އެއް ވަނަ އަދި ދެ ވަނަ ޓީމެވެ. ފައިނަލްގެ ޖާގަ ލިބޭ ދެ ޓީމު ކަށަވަރު ވާނީ މުބާރާތުގެ ފަހު ދެ މެޗުންނެވެ.